28/07/2023
वृक्षारोपण गर्दा त्रिपुरासुन्दरीका अध्यक्ष राजु उप्रेतिले ‘भ्रष्टाचार’ गरेको आरोप’ !
धादिङ । धादिङको त्रिपुरासुन्दरी गाउँपालिका अध्यक्ष राजु उप्रेतीले वृक्षारोण आयोजनामा लाखौं रकम हिनामिना गरेकाे आरोप लागेको छ । वडा १ र २ भित्र पर्ने सल्यानटार मुल सडक किनारा वृक्षारोपण कार्यक्रम आर्थिक वर्ष २०७९/८० अन्तर्गत ४ हजार २ सय विरुवा वृक्षारोपण गरेको भनि आयोजनाको ६५ लाख २ हजार ३७५ रकम भुक्तानी लिएका थिए । गत असार ३ गते वन तथा भू–संरक्षण विभाग, काठमाडौं र उक्त गाउँपालिकाबिच भएको सम्झौताको सर्त विपरित पालिका अध्यक्ष उप्रेतीले वृक्षारोपणका लागि आफू खुसी सामग्री खरिद गरि कागजी प्रक्रिया पुर्याउन आफू निकटको उपभोक्ता समिति बनाई बोट विरुवा, तारजाली र मल खरिदको भुक्तानी लिएका हुन् ।
वन तथा भू–संरक्षण विभाग काठमाडौंको आर्थिक सहयोग र जिल्ला वन कार्यालय धादिङको प्राविधिक सहयोगमा सञ्चालन भएको उक्त आयोजनामा उप्रेती आफैले प्रति तारजाली (टिगार्ड) ७ सय रुपैयाँ बराबरको समान खरिद गरि १३ सय रकमको बिल भौचर पेश गरि भुक्तानी लिएको आरोप छ । प्रति टिगार्ड १३ सयका दरले ४२ सय विरुवामा हुन आउने अनुमानित ५४ लाख ६० हजार रकम हिनामिना भएको आरोप छ ।
पालिकाले अनुदानमा ल्याएको विरुवा समेत आयोजनामा समावेश गरि बृक्षारोपण गरेको आरोप स्थानियको छ ।
सर्तअनुसारको विरुवा वृक्षारोपण नगरि मापदण्ड विपरित बिजुलीका तार मुनि विरुवा रोपी झारा टार्ने र भुक्तानी लिने काम मात्रै भएको त्यहाँका स्थानीयको गुनासो छ । स्थानीयले आयोजनामा हिनामिना भएको भन्दै आवाज उठाएपछि कानुनी प्रक्रिया पुर्याउन मात्रै उपभोक्ता समिति खडा गरिएको जनगुनासो छ । अध्यक्ष उप्रेतिले समितिका पदाधिकारीलाई आर्थिक प्रलोभनमा पारेको आरोप छ ।
यस विषयमा दियोपोष्टले त्रिपुरासुन्दरी गाउँपालिकाका सूचना अधिकृत सुरेश रिजालसँग पटक–पटक सूचना माग गर्दा पनि उनले सूचना उपलब्ध गराउन आलटाल गर्दै आएका छन् । विरामी भएको बहानामा उनले सुचनाको हक सम्बन्धी प्रावधानमा उल्लेखित ७ दिने हदम्यादलाई समेत कटाएर बसेका छन् । दर्जनौँ कर्मचारी कार्यरत उक्त पालिकामा एक जना सुचना अधिकृत विरामी पर्दैमा सुचना नै रोकिने अवस्था कसरी भयो त्यो रहस्यको विषय छ ।
हामीले यस सम्बन्धमा पालिकाका अध्यक्ष उप्रेतीसँग सम्पर्क गर्दा उनी आफैले समाग्री खरिद गरिसकेपछि मात्रै उपभोक्ता समिति गठन गरेको स्विकार गरे । “हो, समिति बनाएर वेर्ना ल्याउँदासम्म ढिला हुने भएकाले वन कार्यलयको स्टमेट अनुसार मैले उपभोक्ता समिति गठन हुनु अगावै वृक्षारोपणका लागि सामान ल्याएको हुँ ।” उनले भने, “काम सम्पन्न भयो तर भुक्तानीबारे मलाई थाहा छैन यो समितिलाई जानकारी होला ।”
साथै उनले आफू माथि अनियमितताको आरोप लाग्नु स्वभाविक भएको बताए । “काम नै नगरि सुतिरहने मान्छेलाई केही विरोध आउँदैन, तर काम गर्ने मान्छेको विरोध आइहाल्छ ।” अनुदानको सम्बन्धमा हामीले राखेको प्रश्नमा उनले भने,“हो मैले अनुदानमा पनि मिलाएको थिएँ । त्यो अनुदानबाट ल्याएको विरुवा छुट्टै ठाउँमा वृक्षारोपन भएको छ ।”
तर यता उपभोक्ता समितिका अध्यक्ष चुणामणी छत्कुलीले भने सामान खरिद गर्नु अघि नै उपभोक्ता समिति गठन भएको विरोधाभाषपूर्ण अभिव्यक्ति दिए ।
उनले भने,“उपभोक्ता समिति गाउँपालिकाको कार्यलयमा बसेर सर्वदलिय, सर्वपक्ष रुपमा निर्माण भएको हो । उपभोक्ता समिति बनिसकेपछि मात्रै सामान खरिद गरिएको हो । काममा कुनै घोटाला भएको छैन, हामीले पारर्दशी ढंगले काम सम्पन्न गरेका छौं ।”
भुक्तानीको सम्बन्धमा आफूहरुले पेस्की लिएर चलिरहेको र भुक्तानी प्रक्रिया अघि बढेको बताए ।
तर, सार्वजनिक खरिद ऐन २०६३ अनुसार ५ लाख रुपैयाँ भन्दा माथिको खरिद प्रक्रिया टेन्डरबाट गरिन्छ ।
