Kva har så prestgarden i Vågå med Edvard Munch å gjera? Hagen på Ullinsvin i Vågå vart planlagt ca. 1745 av presten Johan Storm - tippoldefar til kunstnaren Edvard Munch. Johan Storm og familien hans var prestefolk i Vågå i 31 år. Oldeforeldra til Edvard Munch var deretter prestefolk i Vågå i 10 år. Oldefar Peder Munch, gifta seg med dotter til Johan og Magdalena Storm, Christine. Søster til
Christine, Gidsken, er bestemor til Ole Bull. Desse to søstrene er begge født og har vakse opp på prestegarden i Vågå. Dei er og begge gift i Vågåkyrkja. Oldemor Christine må ha vore ei sers dyktig og ”energisk” prestekone. Forutan å ha født 12 barn, var ho svært interessert i botanikk og legande urter, slik at ho kunne hjelpe til med medisinar, fordi ho visste kva som hjalp ved sjukdom. Vi veit difor at oldemor Christine hadde ein innhaldsrik og berømt urtehage. Marcus Fredrik Bang Wang vart seinare prest i Vågå ( 1803-1814). Han var gift med Jacobine Munch ( søster til Edvard, som er bestefaren til kunstnaren)
Fra å vera ein hage i renessanse og barokkstil, ser det ut til at hagen i denne perioden blir lagt om til ein meire landskapsstil. Bang Wang fekk laga to lysthus. Eit av tre som står nede i hagen, og eit spirea/syrinlysthus. Lysthuset av tre vart bygd ca. 1806-07. Dette lysthuset fekk i 1810 ein heilt spesiell inskripsjon på døra. Sonen til Jacobine Munch (fetter til far til kunstnaren) skreiv eit fantastisk dikt som står på døra den dag i dag. I ca. 80 år hadde Storm og Munch sete på prestegarden i Vågå - Ulllinsvin. Edvard Munch var sjølv svært knytt til Vågå og Ullinsvin. Han seier sjølv at han fekk mykje av inspirasjonen til Aulamaleria sine frå teikningane i alteret i Vågåkyrkja. Jo Visdal frå Vågå, studiekamerat av Edvard Munch frå Oslo og Paris, laga i 1886 ei byste av kunstnaren, visstnok den einaste som er laga av han. Denne bysten i gips, har Unn og Birger Bostad fått låne av barnebarn og einearving til Jo Visdal. Bysta er nå støypt i bronsje, og den skal avdukast den 8.juni 2013 i prestegardshagen. Vågå kommune er nå inkludert i Munchs nettverkskommuner, og skal markere Munchjubileet på forskjellige måtar. Hagegruppa under historielaget i Vågå har såvidt teke til med å få fram igjen denne kulturhistoriske hagen. Denne kulturhagen er tenkt å bli ein OASE - eit rekreasjonsområde, der folk ikkje berre søkjer kunnskap om Munch sine forfedrar og Edvard Munch sin sterke tilknytning til Vågåbygda og Ullinsvin, men og der bygdafolk og tilreisande søkjer opplevingar, inspirasjon, det estetisk vakre, ro og kvile. Hagegruppa har gjort kartleggingar og undersøkingar for å finne fram gamle stauder, gamle trapper, steinbenkar og liknande. Vi har hatt god hjelp av Madelene von Essen - den vel mest kjente spesialist når det gjeld historiske hagar. Det som har undra oss mest desse vekene er alle turistane som finn vegen opp til prestegarden. Dei har høyrt – gjennom andre og gjennom media - om Edvard Munch sin tilknytning til Vågå. Noko av det et som ser ut til å ”røre” dei mest er inskripsjonen på døra frå 1810.
