08/07/2026
Hels på Astrid Ekornrød Sætre (17).
Astrid elskar å lesa, og er ein trufast lånar her på biblioteket. Ho ønskjer at fleire skal oppdaga gleda ved lesing, og har derfor starta sommarfeiren sin med å skriva eit engasjerande innlegg om ei av favorittbøkene sine. Ho vil gjerne inspirera akkurat deg som les dette til å plukka opp ei bok no i sommar. Om du skulle få lyst til å lesa boka ho skriv om, so har me den her på biblioteket.
Les den fine bokmeldinga hennar her:
Eg har lest "Velkommen til Floras kafé" av Jenny Colgan!
Jenny Colgan er ein skotsk forfattar som er fødd i 1972. Ho er mest kjend for å skrive koselege romanar om vennskap, kjærleik og kvardagsliv. Mange av bøkene hennar går føre seg i små bygder eller ved sjøen i Skottland, og ho skriv ofte om bokhandlar, bakeri og kafear. Nokre av dei mest kjende bøkene hennar er "Velkommen til Floras kafé", "Den vesle bokhandelen på hjørnet" og "Bakeriet på strandpromenaden". Bøkene til Jenny Colgan er omsette til fleire språk og er populære over heile verden. Mange les bøkene hennar fordi dei er lett å lese, spennande og får lesaren til å kjenne seg glad.
"Velkommen til Floras kafé" er den første boka i Mure-serien. Heile denne serien består av seks bøker. Boka handlar om Flora MacKenzie som har flytta frå den vesle øya Mure i Skottland til London for å jobbe som advokat. Etter kvart flyttar ho tilbake til den vesle øya, fordi det er ein klient som trenger bistand av ho.
Når ho kjem til Mure må ho møte familien sin og den fortida ho prøvde å leggje bak seg. Etter kvart byrjar Flora å kjenne seg heime igjen. Ho finn den gamle oppskriftsboka etter mora si og oppdagar kor glad ho er i å lage mat. Derfor bestemmer ho seg for å opne ein kafé. Igjennom arbeidet på kaféen får ho meir sjølvtillit, nye vennskap og håp for framtida.
Eit viktig tema som denne boka tek opp er at du kan få til det du vil, så lenge du har trua på deg sjølv og ikkje gir opp. I boka tvilar Flora på seg sjølv i starten, men med tida blir ho modigare og tør å følgje draumane sine. Ho viser at det er mogleg å få ein ny start og skape eit godt liv, sjølv om ein nokre gongar kan møte motgang.
Med dette innlegget ønsker eg at fleire skal begynne å lese, fordi det gir deg ein unik moglegheit til å rømme frå kvardagen og gå inn i eit anna univers. Lesing er viktig, fordi det kan gi oss som lesarar nye opplevingar og lære oss nye og nyttige ting. Ei god bok kan gi både glede, spenning og ein pause frå alt det som skjer rundt oss. Derfor meiner eg at alle bør prøve å finne seg ei bok dei likar, fordi lesing er både lærerikt og kjekt. Om du ønsker å låne deg ei god bok som du kan nyte i sommarferien kan du gå innom eller ta kontakt med Austrheim folkebibliotek.
- Astrid Ekornrød Sætre -
