17/12/2025
Salon da aka bi wajen wannan bincike, da lokacin da aka yi shi, da kuma faɗin wuraren da aka kai samamen, duk sun haifar da manyan tambayoyi game da bin Kundin Tsarin Mulki da ka’idojin doka.
Duk da cewa babu wani ɗan ƙasa da ya fi doka ƙarfi, kowane bincike dole ne ya kasance bisa adalci, tsaka-tsaki, da bin hanyoyin doka yadda ya kamata, ba tare da nuna son kai ko amfani da iko fiye da kima ba.
A duk lokacin da shugaban hukumar da ke gudanar da bincike yana da alaƙa kai tsaye da abin da ake bincikawa, ka’idar adalci ta dabi’a (natural justice) tana buƙatar ya janye kansa daga jagorantar wannan bincike, domin a kiyaye amincewar jama’a da mutuncin hukuma.
Kai samame a lokaci guda a gidajen zama na sirri da ofisoshi, musamman nan take bayan an ambaci Babi na 9 na Rahoton Salami a bainar jama’a, yana haifar da fahimta a idon mai hankali cewa ana iya amfani da ikon bincike ne a matsayin ramuwar gayya ko tsoratarwa, ba kawai neman gaskiya ba.
Abubakar Malami, SAN, yana jaddada cewa yana a shirye ya miƙa kansa ga duk wani bincike na gaskiya, na doka, kuma wanda kotu ke sa ido a kai, amma yana ƙin amincewa da duk wani yunƙuri na tsoratarwa, shari’ar kafafen yaɗa labarai, ko amfani da iko ba bisa ka’ida ba.
Dole ne mulkin doka ya rinjayi son rai ko muradin kowane mutum.
