06/06/2026
STQARRIJA TAL-PARTIT NAZZJONALISTA – 06/06/2026
NIRRIKONOXXU R-RIEDA TAL-POPLU IMMA NAGĦRFU L-KISBIET LI GĦAMILNA U NKOMPLU NISSAĦĦU
Il-Kap tal- Partit Nazzjonalista Alex Borg jgħid li f’ġimgħa aktar minn 800 persuna offrew li jgħinu lill-Partit Nazzjonalista u daħlu aktar minn 1,000 suġġeriment dwar kif il-PN jista’ jkompli jtejjeb il-ħidma tiegħu
Nirrikonoxxu dak li jrid il-poplu imma rridu nagħrfu wkoll il-kisbiet li għamilna. Il-poplu qed jerġa’ jara tama qawwija fil-Partit Nazzjonalista u dak li ġara fl-aħħar ġranet iqawwili qalbi. Wara r-riżultat elettorali mijiet ta’ nies urew ix-xewqa li jissieħbu mal-PN bħala voluntiera u daħlu mal-1,000 suġġeriment dwar kif il-Partit Nazzjonalista jista’ jkompli jtejjeb il-ħidma tiegħu.
Intervistat mill-Kap tat-Taqsima tal-Aħbarijiet ta’ NET News Robert CREMONA fuq NET FM, il-Kap tal-Partit Nazzjonalista Alex Borg dalgħodu qal li fl-ewwel jiem wara l-elezzjoni, aktar minn 800 persuna offrew il-ħin tagħhom biex jgħinu lill-PN, filwaqt li ħafna qed jibagħtu l-ideat u s-suġġerimenti tagħhom dwar kif il-Partit jista’ jkompli jissaħħaħ.
Dan, qal Alex Borg, ikompli juri kif in-nies qed jaraw fil-Partit Nazzjonalista tama ġdida għall-bidla li trid isseħħ.
Waqt din l-intervista l-Kap tal-Partit Nazzjonalista qal li l-kampanja pożittiva li ħadem biha l-PN fl-aħħar ġimgħat trid tibqa’ tkun it-timbru li biha jimxu kemm hu bħala Kap kif ukoll id-deputati u r-rappreżentanti tal-Partit u qal li l-kuntatt man-nies irid jibqa’ xi ħaġa kontinwa u konsistenti matul il-leġiżlatura kollha. Din, qal Alex Borg, hija l-politika tan-nies.
Filwaqt li l-PN tilef l-elezzjoni, ir-reazzjoni li kien hemm wara r-riżultat kienet waħda eċċezzjonali li turi kemm in-nies huma għatxana għal Partit Nazzjonalista dejjem aktar imsaħħaħ, u aħna għandna l-obbligu li naħdmu b’aktar enerġija.
Alex Borg qal li hu lest ikompli jservi bħala Kap tal-Partit Nazzjonlista jekk ikollu l-fiduċja tat-tesserati, iżda hemm process li jrid isir skont l-istatut u li jrid jieħu l-kors tiegħu.
Dwar l-għażla li jżomm it-13-il distrett, il-Kap tal-PN qal li hu ried juri lill-Għawdxin li hu magħhom mhux biss bil-kliem imma bil-fatti. Huwa sostna li għandu s-serħan il-moħħ li l-istatut jippermetti dan.
Mistoqsi dwar l-elezzjoni bikrija, Alex Borg qal li bla dubju li Robert Abela għażel li jmur għal elezzjoni sena qabel għax kien jaf li l-PN kien qed jagħmel avvanzi kbar. Hu sostna li r-riżultat elettorali kkonferma li r-raġuni vera ma kellha xejn x’taqsam mas-sitwazzjoni internazzjonali imma kienet marbuta mal-ħidma tal-Partit Nazzjonalista u din il-ħidma se tkompli għaliex il-PN, illum aktar minn qatt qabel, huwa a government in waiting.
Alex Borg ikkritika l-mod kif il-Partit Laburista fil-Gvern abbanduna lin-nies fl-aktar affarijiet bażiċi u fid-drittijiet tagħhom imma lejliet l-elezzjoni ftakar f’dawk li nesa u beda juża l-power of incumbency biex jagħmel dak li messu għamel snin ilu.
Mistoqsi dwar il-Kabinett, Alex Borg feraħ lill-membri kollha li ntgħażlu biex iservu u awguralhom ħidma siewja għall-ġid tal-pajjiż, iżda b’referenza għal Chris Fearne qal li ma jistax ma jkunx imħasseb bil-fatt li persuna li għadha akkużata kriminalment ingħatat kariga daqshekk importanti. Hu qal li filwaqt li jawgura li Fearne jinstab innoċenti, il-Partit Nazzjonalista se jibqa’ impenjat favur politika nadifa, trasparenza u governanza tajba.
Il-Kap tal-Partit Nazzjonalista temm jgħid li l-kampanja pożittiva tal-Partit Nazzjonalista se tissarraf f’aktar kuntatt man-nies matul il-ħames snin li ġejjin.
“L-enerġija li rajt fin-nies, mhux biss qabel u waqt il-kampanja, imma aktar u aktar issa li għaddiet l-elezzjoni, tkompli timlieni b’kuraġġ u tama li l-Partit Nazzjonalista se jasal biex dan il-proġett li bdejna, inwettquh għall-ġid tal-Maltin u l-Għawdxin”.
• Idħol f’dawn il-links biex tkun tista’ tkun parti mill-mixja magħna.
- Applikazzjoni ta’ voluntier
bit.ly/ApplikagħalVoluntier
- Feedback wara l-elezzjoni
bit.ly/FeedbackElezzjoni
