30/08/2022
ကရုဏာရှင် လူငယ်များအသင်း (၁၂) နှစ်ပြည့် နှစ်ပတ်လည်နေ့ (30-08-2010 _ 30-08-2022)
၂၀၁၀ ပြည့်နှစ်၊ ဩဂုတ်လ( ၃၀) ရက်နေ့ ကရုဏာရှင်အသင်းဟာ မြောင်းမြမှာ စတင်သန္ဓေတည်ခဲ့ပါသည်။ မြောင်းမြရဲ့ ဝေဒနာတွေကို မျှဝေခံစားရင်း ကရုဏာရဲ့ ဝေဒနာစုဘူးလေးဟာ တစ်နှစ်ထက်တစ်နှစ် ကြီးမားလာခဲ့ပါတယ်။ ဆယ်စုနှစ်တစ်ခုကျော်ကာလအတွင်း မြောင်းမြသားတွေဟာ ကရုဏာရဲ့ ရပ်ဝန်းလေးကို ကာယအား၊ ဥာဏအား၊ ဓနအားတွေနဲ့ ရေလောင်းပေါင်းသင်ပေးခဲ့ပါတယ်။ ဒီရပ်ဝန်းလေးကနေ ကိုယ်ချင်းစာတရားတွေ မြို့ပေါ် ကျေးလက် မြောင်းမြတစ်ခွင် စီးဆင်းရစ်ခဲ့ကြတယ်။ ရောဂါအန္တရာယ် ကပ်တိုင်းဟာ မြောင်းမြကိုလာချင်ရင် မြို့အဝင်မှာ ကရုဏာရှင်တွေ့နဲ့ စီးချင်းတွေ့ရမတဲ့လေ…ကနေ့အချိန်တော့ ကျွန်တော်တို့ မြောင်းမြကို အားနာနေမိပါတယ်။ မြောင်းမြကျန်းမာပါစ_ မြောင်းမြအဆင်ပြေပါစ_မြောင်းမြဟာ မြောင်းမြပီသပါစေ။
ကျွန်တော်တို့အားလုံးရဲ့ မြို့လွမ်းဝေဒနာဟာ အိမ်လွမ်းရတာထက် ပိုကဲနေမလား….မြို့ပျောက်နေတဲ့ လူငယ်တွေဟာ အုန်းပင်တွေရှိတဲ့ အရပ်ကိုမျက်နှာမူရင်း အုန်းပင်တွေရှိတဲ့ မြို့ကိုလွမ်းနေကြတယ်။
ကျွန်တော်တို့တွေ ခဏခဏ အိမ်မက်မက်ကြပါတယ်။ ငြိမ်သက်နေရင်းနဲ့ ဝုန်းခနဲ့ ဝုန်းခနဲ့ ထလှုပ်ရှားရတက်တဲ့ ရုံးခန်းလေးအကြောင်းတွေပေါ့။ အဲ့ဒီနေ့က အိမ်မက်ထဲမှာ သွေးလှူရှင် ရှာနေကြတယ်_ လူနာတင်ကားတွေ တဝီဝီမောင်းနေကြတယ်_ ဆေးရုံကြီးရှေ့မှာ မနက်တမောင်း ညနေတမောင်း အာဟာရတွေ မောင်းနေကြတယ်_ ဆေးရုံကြီးထဲ ဟိုအဆောင် သည်အဆောင်ကူးပြီး ဆေးလိုတဲ့ လူနာတွေ ဆေးလှူနေကြတယ်_ မြို့အစွန် ချောင်းအစပ်က ရေမျောကမ်းတင် အလောင်းတစ်လောင်းကို သယ်တဲ့အဖွဲ့က သယ်ကြတယ်_ အိမ်မက်တွေပါပဲ။ အိမ်မက်ဆိုတာလဲ အနာဂတ်မဟုတ်ပါလား။ တရုန်းရုန်းနဲ့ ငါတို့အားလုံး မြောင်းမြမှာပြန်ဆုံကြအုန်းမှာပါ။
တို့တွေဟာ လောကဓမ္မကို နှလုံးသွင်းတယ်။ လောကမှာ မရှိမဖြစ်ဆိုတာမရှိ တို့အသိုက်အဝန်းလေးမရှိသည့်တိုင် မြောင်းမြဆိုသောအရပ်မှာ မေတ္တာ၊ ကရုဏာ၊ စေတနာမျိုးစေ့တွေ ပေါလှပါတယ်။ ကောင်းကောင်းပေါက်ရောက်ရှင်သန်ကြီးထွားနိုင်တဲ့ မြေလည်းရှိပါတယ်။
ကရုဏာရှင်လူငယ်များအသင်းရဲ့ ၁၂ နှစ်ပြည့် နှစ်ပတ်လည်မှာ မြို့ပျောက်နေတဲ့ လူငယ်တွေက ဆုတောင်းလိုက်ပါတယ်။
“နှလုံးစိတ်ဝမ်းငြိမ်းချမ်းပါစေ မြောင်းမြရေ”
_ တို့ညီအစ်ကို မောင်နှမတွေ တရုန်းရုန်းနဲ့ မြောင်းမြမှာ ပြန်ဆုံကြပါစို့
