Министерство за правда

19/06/2026

⚖️ Собраниските комисии дадоа поддршка на Предлог-законот за парничната постапка во второ читање ✅

Комисијата за политички систем и односи меѓу заедниците и Законодавно-правната комисија денес дадоа поддршка на Предлог-законот за парничната постапка во второ читање, со што е направен значаен чекор во процесот на усвојување на едно од најважните реформски законски решенија во областа на правосудството. Голем дел од суштинските поднесени амандмани беа прифатени.

Предлог-законот претходно беше предмет на јавна расправа, во која активно учествуваа претставници на правосудниот систем, академската и стручната јавност, како и други засегнати страни. Нивните забелешки и предлози беа земени предвид со цел да се обезбеди современо, квалитетно и функционално законско решение.

Со новиот Закон за парничната постапка се воведуваат суштински реформи насочени кон модернизација на судските постапки, зголемување на ефикасноста на судовите и зајакнување на правната сигурност. Предвидени се решенија што овозможуваат поефикасно водење на постапките, поголема улога на судот во утврдувањето на фактичката состојба, можност за вештачење и увид по службена должност, како и целосна дигитализација преку електронска достава и одржување расправи по електронски пат.

📌 Особено значајни се мерките за забрзување на постапките во споровите од мала вредност, воведувањето поправедни и попропорционални глоби, како и новиот механизам на претставнички тужби за заштита на колективните интереси и права, со што дополнително се унапредува пристапот до правда.

Предложените законски решенија се усогласени со повеќе системски закони и европските стандарди и претставуваат важен придонес кон изградбата на модерен, ефикасен и правно кохерентен правосуден систем. 🇪🇺

19/06/2026

⚖️ Стратешко партнерство за модерно, ефикасно и дигитално правосудство

🤝 Министерот за правда, Игор Филков, оствари средба со постојаната координаторка на Обединетите нации во Македонија, Рита Колумбија, регионалната директорка на Канцеларијата на Обединетите нации за проектни услуги (UNOPS), Микела Талин, претставничката на Канцеларијата на Високиот комесар на Обединетите нации за човекови права, Тања Темелкоска, како и со Марко Вујачиќ, раководител на Програмата на UNOPS за Југоисточна Европа.

На средбата се разговараше за можностите за воспоставување стратешко партнерство во процесот на дигиталната трансформација на правосудството, како еден од клучните предуслови за создавање поефикасен, потранспарентен и подостапен правосуден систем.

📌 Договорени се идни чекори со акцент на:
• модернизација и надградба на АКМИС;
• воспоставување систем за електронска достава во судските постапки;
• унапредување на системот за аудио и видео снимање на судските рочишта;
• подобрување на интероперабилноста меѓу институциите;
• зајакнување на сајбер-безбедноста во правосудниот сектор.

Искуствата што UNOPS веќе ги има реализирано во земјите од регионот претставуваат значајна основа за поддршка на реформските процеси и во нашата држава.

🇲🇰 Министерството за правда останува посветено на создавање современо, ефикасно и дигитално трансформирано правосудство кое ќе одговори на потребите на граѓаните и ќе биде во согласност со европските и меѓународните стандарди.

✅ Поддршката од Обединетите нации и UNOPS во овој процес е од исклучително значење за успешно спроведување на реформите и забрзување на дигиталната трансформација на правосудниот систем.

18/06/2026

🗳️ Се финализираат измените и дополнувањата на Изборниот законик

Денес се одржа деветтата седница на Работната група за реформи во изборното законодавство, на која продолжи разгледувањето на предлог-измените и дополнувањата на Изборниот законик.

Во текот на досегашната работа, Работната група разгледа и усогласи низа клучни прашања, вклучително и препораките на ОБСЕ/ОДИХР, како и предлозите доставени од државните институции и политичките партии. Дел од решенијата беа усогласени со консензус, додека за одредени прашања се водеше интензивна и конструктивна дебата.

🤝 По комплетирањето на процесот и финализирањето на предлог-решенијата, измените и дополнувањата на Изборниот законик ќе бидат доставени во понатамошна постапка.

Работната група и понатаму останува посветена на обезбедување инклузивен и транспарентен процес, во насока на унапредување на изборната рамка согласно демократските стандарди и меѓународните препораки. 🇪🇺

17/06/2026

16/06/2026

Предлог-законите за судска служба и за јавнообвинителска служба се резултат на повеќегодишна работа, широк и инклузивен консултативен процес, како и усогласување со актуелната законска рамка и реформските приоритети на државата.⚖️

Работната група ги изработи текстовите на законите пред една година, по што истите беа објавени на ЕНЕР на јавна консултација. Беа доставени бројни забелешки и предлози од релевантни институции, стручната јавност и засегнатите страни, кои беа внимателно разгледани и соодветно вградени во нацрт-текстовите.

Во меѓувреме беше донесен новиот Закон за административни службеници, а беа склучени и колективни договори за вработените во судовите и јавните обвинителства. Поради овие новонастанати околности беше неопходно дополнително усогласување на законските решенија. Како системски закон, Законот за административни службеници веќе го уредува статусот на дел од судските и јавнообвинителските службеници кои непосредно работат на предмети, поради што новите закони се усогласени со оваа правна рамка.

Особено значајно е што во двата закона е изрично утврдено дека ниту едно стекнато право на постојните вработени не се губи. Напротив, сите права остануваат целосно заштитени, со што се обезбедува правна сигурност и институционален континуитет.✅

Во делот на платите, една од клучните цели на реформската агенда беше унапредување на материјалниот статус на судските и јавнообвинителските службеници. Оваа цел веќе е реализирана преку колективните договори, а нивните решенија се инкорпорирани и во законските одредби.📜

Новите законски решенија воспоставуваат посебен и современ систем за судската и јавнообвинителската служба, прилагоден на нивната специфична улога во правосудниот систем. Се воведуваат јасни, транспарентни и мерит-базирани правила за вработување, унапредување, оценување и мобилност, врз основа на однапред утврдени и објективни критериуми. Истовремено се зајакнува институционалната функционалност преку поефикасно управување со човечките ресурси и намалување на административните пречки.

Законите предвидуваат и современи механизми за задржување и мотивација на стручниот кадар, вклучително преку додатоци на плата, наградување за исклучителни резултати и унапредени можности за професионален развој.🎖️

Со овие законски решенија се исполнуваат обврските од Реформската агенда и Развојната секторска стратегија за правосудство 2024–2028, се зајакнуваат капацитетите на правосудните институции и се создаваат предуслови за поефикасен, понезависен и поквалитетен правосуден систем во интерес на граѓаните.🇪🇺

16/06/2026

Јавна расправа за Предлог-законите за судска служба и за јавнообвинителска служба 📄⚖️

Денес во Собранието се одржа јавна расправа за Предлог-законите за судска служба и за јавнообвинителска служба, со активно учество на експерти, претставници на судската и јавнообвинителската служба, институции, синдикати и други засегнати страни.

На расправата беа разгледани предложените законски решенија и клучните измени насочени кон унапредување на статусот на судските и јавнообвинителските службеници, воспоставување поефикасен систем за вработување и напредување, зајакнување на професионалноста и независноста на службите, како и обезбедување подобри услови за работа и кариерен развој.

Предложените решенија се резултат на континуирана координација и усогласување со сите надлежни институции. Предлог-законите се целосно усогласени со Министерството за финансии, Министерството за јавна администрација и Секретаријатот за законодавство, при што се земени предвид нивните забелешки и предлози со цел обезбедување квалитетни, применливи и финансиски одржливи законски решенија.

Учесниците имаа можност да ги споделат своите мислења, предлози и забелешки, со цел создавање квалитетни законски решенија што ќе придонесат за поефикасна судска и јавнообвинителска служба и поквалитетни услуги за граѓаните.

Отворениот дијалог и вклученоста на стручната јавност се клучни за градење силен, професионален и независен правосуден систем ⚖️🤝

12/06/2026

Работната група за реформи во изборното законодавство денеска ја одржа осмата седница, на која беа разгледани преостанатите отворени прашања поврзани со подготовката на измените и дополнувањата на Изборниот законик. 🗳️

На покана на Министерството за правда, на седницата присуствуваа претставници на институциите кои претходно доставија предлози, мислења и препораки во рамките на процесот на подготовка на измените на Изборниот законик, за кои беа потребни дополнителни појаснувања.

Со цел обезбедување поцелосна и поаргументирана расправа, институциите имаа можност непосредно пред членовите на Работната група да ги презентираат своите предлози и да дадат дополнителни образложенија по прашањата што беа предмет на разгледување. 🤝

Веќе следната недела ќе бидат вградени усогласените решенија во текстот на Предлог-законот за изменување и дополнување на Изборниот законик, кој ќе биде доставен до членовите на Работната група за дополнителен увид и евентуални забелешки. 📝

Министерството за правда изразува благодарност до сите членови на Работната група, претставниците на институциите и политичките субјекти за нивниот активен придонес во процесот на подготовка на реформите во изборното законодавство.

12/06/2026

✅Македонија ја зајакнува еколошката правда: потпишан Меморандум за соработка со француските партнери 🇲🇰🇫🇷

Министерството за правда и Министерството за животна средина и просторно планирање потпишаа Меморандум за разбирање со Експертиза Франција (Expertise France), Француската агенција за развој (AFD) и Амбасадата на Франција во Република Северна Македонија, со што официјално се потврдува заедничката заложба за унапредување на климатската и еколошката правда во земјата. ⚖️ 🌱

Меморандумот ја воспоставува рамката за спроведување на регионалниот проект „Конвергенција на климатската и еколошката правда“ (CEJ Convergence), чија цел е да го подобри пристапот до правда и да го зајакне учеството на јавноста во прашања поврзани со животната средина во Северна Македонија, Албанија и Црна Гора, во согласност со европските стандарди и законодавството на Европската Унија.

Со потпишувањето на документот, институциите ја потврдуваат својата посветеност на јакнењето на владеењето на правото во областа на животната средина, унапредувањето на институционалните капацитети и поттикнувањето на поширока вклученост на граѓаните во процесите на носење одлуки што влијаат врз животната средина и климатските политики. 🇪🇺

Проектот ќе овозможи техничка поддршка, размена на експертиза, организирање обуки и развој на механизми за подобра примена на принципите на еколошката правда. Во рамките на соработката ќе бидат воспоставени управни и советодавни тела кои ќе обезбедат координирано, ефикасно и транспарентно спроведување на активностите. 🤝

Министерството за правда и Министерството за животна средина и просторно планирање ќе работат заедно со француските институции на унапредување на националните капацитети и приближување на земјата кон европските практики во областа на заштитата на животната средина и пристапот до правда. ⚖️

11/06/2026

Преку координирана работа и јасно дефинирани приоритети, продолжуваме со реализација на реформите во интерес на граѓаните и на ефикасните институции. ⚖️

Министерството за правда останува посветено на спроведувањето на реформската агенда, зајакнувањето на владеењето на правото и унапредувањето на услугите за граѓаните. 🤝🇪🇺