04/06/2026
Lëvizja Arbëria🇦🇱 i përcjell urimet më të sinqerta Universitetit të Tetovës dhe Prof. Dr. Kushtrim Ahmetit për zgjedhjen në detyrën e Rektorit të Universitetit të Tetovës.
Njëkohësisht, shprehim respekt dhe vlerësim për të gjithë kandidatët që morën pjesë në këtë proces, duke dëshmuar kulturë akademike, përgjegjësi institucionale dhe përkushtim ndaj misionit universitar.
Universiteti i Tetovës përfaqëson një nga arritjet më të mëdha kombëtare, arsimore dhe kulturore të shqiptarëve në Maqedoninë e Veriut. I lindur nga sakrifica, përkushtimi dhe aspirata e një populli për dije, barazi dhe liri, ai mbetet simbol i qëndresës intelektuale dhe i të drejtës së patjetërsueshme për arsimim në gjuhën amtare.
Pikërisht për këtë arsye, ruajtja e autonomisë universitare, e meritokracisë, e lirisë akademike dhe e integritetit institucional duhet të mbetet një detyrim i përhershëm. Universiteti duhet të jetë tempull i dijes dhe i mendimit të lirë, ku debati shkencor, kërkimi akademik dhe formimi i brezave të rinj zhvillohen të lirë nga ndikimet politike dhe interesat e ngushta të çfarëdo natyre.
Universitetet e mëdha ndërtohen mbi dijen, integritetin, autonominë dhe guximin për të mbrojtur të vërtetën akademike. Besojmë se nën drejtimin e rektorit të ri, Universiteti i Tetovës do të vazhdojë të jetë jo vetëm qendër e ekselencës akademike, por edhe një institucion që kultivon lirinë e mendimit, përgjegjësinë qytetare dhe vetëdijen kombëtare.
Prof. Dr. Kushtrim Ahmetit i urojmë sukses, urtësi në vendimmarrje dhe vendosmëri në përmbushjen e kësaj përgjegjësie të lartë në shërbim të studentëve, shkencës, shoqërisë dhe misionit historik që Universiteti i Tetovës mbart prej themelimit të tij.
Urime dhe mbarësi në këtë mision fisnik në shërbim të dijes, lirisë dhe kombit.
