Tranombokim-pirenena eto Madagasikara - BNM

29/08/2026

Mbola mitohy ny fitsidihana ireo Ivotoerana famakiana boky sy hetsika ara-kolontsaina na CLAC ataon'ny ekipa mpandrindra izany eo anivon'ny Tranombokim-pirenena eto Madagasikara - BNM

Teo anelanelan'ny volana jolay sy aogositra 2026 dia dimy ambinifolo (15) amin'ireo ivotoerana fito ambiroapolo (27) no efa nanaovana ny dingana voalohany amin'ny fanavaozana ireto ivotoerana ireto, ao anatin'izany ny :
- fanomezana tan-tsoroka ho an'ireo mpanentana sy mpitantana ny ivotoerana CLAC
- fihaonana amin'ireo COGES na ny Komity mpiara-mitantana
- fanaovan-tsonia ny fanavaozam-piaraha-miasa eo amin'ny Minisiteran'ny Serasera sy ny Kolontsaina amin'ny alalan'ny Tranombokim-pirenena sy ny Kaominina voakasik'izany.

Tsiahivina fa ireo ivotoerana 27 manerana ny nosy no voakasik'ity fanavaozana ity araky ny fifanaraham-piaraha-miasa eo amin'ny Minisitera sy ny Vondron'ireo tany mampiasa amin'ny ampahany na manontolo ny teny frantsay na Organisation internationale de la Francophonie (OIF) . 16 amin'izy ireo no ahazo ny fampitaovana vaovao ny voalohandohan'ny taona 2027 raha aorian'izay ireo 11 ambiny.

28/08/2026

«FAMOAHANA BOKY: ENY, MILA VOLA! TSIA,TSY MILA VOLA!... ARY NY TENY TONGA BOKY!» : io indray ny lohahevitra zarain'i Hobiana Poeta Mpanoratra sy Zara Ainga amintsika ao anaty zara haizatra am-pamoloana ny alarobia 02 septembra 2026 amin'ny 2ora sy 30minitra, eto amin'ny Tranombokim-pirenena eto Madagasikara - BNM.

Koa manasa antsika rehetra tsy ankanavaka indrindra fa isika misehetra anaty tontolon'ny boky.

21/08/2026

🏆 Am-pifaliana lehibe no nandraisan'ny Tranombokim-pirenena ny lanonana fizarana loka natao teto Anosy ny alarobia 19 aogositra 2026, ho fankalazana ny Semaine de la Francophonie 2026.

🎤 Nisy ny fifaninanana izay notontosain'ny fikambanana Tché Tché Bias Paris sy Mots et Merveilles Madagascar, notarihin-dRamatoa Annie Monia KAKOU sy Ramatoa Marina ANDRIAMIANDRISOA, nampiseho ny talenta amam-pahaizan'ny tanora malagasy amin'ny resadresaka sy ny fitenim-pirenena frantsay.

🥈 Nahazo ny loka faharoa amin'ny sokajy Lycée i Anaïs Nirintsoa RAKOTONJANAHARY, tanora nanome voninahitra ny fahaizany niteny sy ny fatokisan-tenany teo amin'ny fitenenana.

19/08/2026

Adidy voafaritry ny lalàna ny fametrahana ara-dalàna (Dépôt légal)ho an'ny mpamoaka boky sy gazety eto Madagasikara . Tsy maintsy mametraka dika dimy amin’ny asa navoakany ato amin’ny Tranombokim-Pirenena ny mpanoratra, mpamokatra na mpanaparitaka boky sy gazety vita pirinty, anisan’izany ny gazety mivoaka ara-potoana, araka ny voafaritry ny lahatsoratra sy fitsipika manan-kery.

18/08/2026

📅 22 Aogositra 2026 :
« AKANGA TSARA SORATRA»
Hetsika peotika entina hanandratana sy hampiroboroboana indray ny literatiora malagasy eto amin'ny Tranombokim-pirenena eto Madagasikara - BNM.

📢 Maimaim-poana . Tongava maro !!!

13/08/2026

📚 FAMPAHAFANTARANA BOKY: "RANTIMBOLANA HAIFIKAJIANA"

Tontosa anio alakamisy 13 Aogisitra 2026 teto amin’ny Tranombokim-pirenena Anosy ny fampahafantarana ilay boky nosoratan'ny mpanoratra INDRIANJAFY Georges Martial, mitondra ny lohateny : "RANTIMBOLANA HAIFIKAJIANA", novokarin'ny Edisionina Mpariaka boky.

Ny fotoana dia notronon-dRamatoa tale misahana ny Fampirobiroboana ny teny malagasy teto anivon'ny Minisiteran'ny Serasera sy ny Kolontsaina, Andriamifidy Bakolalaina, sy Ramatoa Filohan'ny Akademia malagasy, profesora Rabenoro Irène izay nanao ny teny fanolorana ny boky sy ireo akademisianina ary ireo vahiny nasaina.

Zava-dehibe ho an'ny Minisiteran'ny Serasera sy ny Kolontsaina amin'ny alalan'ny Tranombokim-pirenena eto Madagasikara ny fampahafantarana boky toy izao satria haren-tsaina ary fanomezan-danja ny teny malagasy ny rantimbolana toy izao.

Ny boky "RANTIMBOLANA HAIFIKAJIANA" dia rakibolana fandikana, famaritana sy fanazavana amin'ny teny malagasy ny voambolana teknika amin'ny "informatique". Miisa 600 ny teny iditra, 400 ny sary fandravahana ary manana pejy miisa 380 ny boky.
Teny fampiasa andavanandro no maro ao amin'ity rantimbolana ity ka manamora ny fandraisan'ny olona ny hevi-teny sy ny fitadidiana azy.
Ny firafitry ny boky indray dia : teny frantsay no nataony teny iditra, ary arahan'ny teny anglisy izany. Avy eo omeny ny filazana avy amin'ny teny malagasy ary hazavainy ny heviny.
Ohatra: binaire (binary) TAROA [relatif à la numérisation base 2], ilazana ny zavatra misy ifandraisany amin'ny FANISAROA (numérisation binaire). Ohatra: "isa taroa"="nombre binaire".

INDRIANJAFY Georges Martial moa efa nanoratra rakiblona amin'ny teny frantsay mikasika ny haitaon'ny fanamboarana ( technologie de fabrication mécanique) mitondra ny lohateny "Toute la mécanique industrielle", Éditions Eyrolles sy AFNOR, nivoaka tamin'ny 2023 izay manana pejy miisa 1000.

Ary nanamarika ny fotoana ihany koa ny fanaovan'ny Edisionina Mpariaka boky ny "dépôt légal" an'ireo boky novokariny miisa 22 teto anivon'ny Tranombokim-pirenena satria anisan'ny andraikitry ny Tranombokim-pirenena eto Madagasikara - BNM ny mitahiry ireo vakoka an-tsoratra sy asasoratra vokarina eto Madagasikara.

Ny fampahafantarana boky toy izao dia ho entina ho fampiroboroboina ny rohin'ny boky eto Madagasikara ary ho fanentanana ny fananana Kolontsaina manjifa ny asasoratra novakarin'ireo mpisehatry ny boky eto Madagasikara.

11/08/2026

10/08/2026

07/08/2026

« Ankason-tany» : teatira poetika hiarahina amin'ny fikambanana RENTY.
📅 alarobia 26 aogositra 2026 amin'ny 2ora sy 30 minitra
Tranombokim-pirenena eto Madagasikara - BNM Efitrano DOX