04/06/2026
මොණරාගල දිස්ත්රික් මහ රෝහල් පරිශ්රයේ අලුතින් ඉදිකරන ලද පස් මහල් මාතෘ සහ ශල්ය වාට්ටු සංකීර්ණය සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් අද(2026/06/04) දින ජනතා අයිතියට පත් කරන ලදි.
මෙම පස් මහල් මාතෘ සහ ශල්ය වාට්ටු සංකීර්ණය සඳහා සෞඛ්ය අමාත්යාංශය මගින් රුපියල් මිලියන 1457 මුදලක් දැනට වැය කර ඇත. මෙම වාට්ටු සංකීර්ණයේ බිම් මහල සහ පළමු මහල මාතෘ වාට්ටු වලින් සමන්විත වේ. දෙවන සහ තෙවන මහල්වල කාන්තා ශල්ය වාට්ටු ස්ථාපිත කර ඇත.
2019 වර්ෂයේදී ඉදිකිරීම් ආරම්භකර වසර දෙක හමාරක් තුළ 2022 පෙබරවාරි මාසයේ වැඩ අවසන් කිරීමට නියමිතව තිබිණි. එහෙත් 2025 වසර ආරම්භ වන විටත් එහි ඉදිකිරීම් සිදුකොට තිබුනේ 30%ක් පමණි. වත්මන් රජය මේ සඳහා නව කැබිනට් පත්රිකාවක් ඉදිරිපත් කර, අලුතින් ඇස්තමේන්තු සකස් කොට ඉදිකිරීම් කටයුතු කඩිනම් කරන ලදී. 2025 ඔක්තෝබර් මාසය වනවිට පළමු මහල් දෙකේ වැඩ කටයුතු නිම කිරීමට හැකි වූ අතර 2026 මැයි මාසය වන විට අවසන් කිරීමට හැකි විය. ඒ අනුව මේ වන විට එම ගොඩනැග්ල්ලේ මාතෘ වාට්ටු සහිත මහල් දෙකක් සහ කාන්තා ශල්ය වාට්ටු සහිත මහල් දෙකක් රෝගී සත්කාර කටයුතු ආරම්භ කර ඇත.
මෙම අවස්ථාවට ඌව පළාත් ආණ්ඩුකාර නීතීඥ කපිල ජයසේකර, මොණරාගල දිස්ත්රික් පාර්ලිමේන්තු මන්ත්රී සරත් කුමාර, මොණරාගල ප්රාදේශිය සභවේ සභාපති ජානක කුරුප්පු, සෞඛ්ය හා ජනමාධ්ය අමාත්යාංශයේ අතිරේක ලේකම් (ඉංජිනේරු සේවා) සාලින්ද බණ්ඩාර, නියෝජ්ය අධ්යක්ෂ ජනරාල් (ඉංජිනේරු සේවා) එච්. එම්.අයි.සී හේරත්, ඌව පළාත් සෞඛ්ය සේවා අධ්යක්ෂ විශේෂඥ වෛද්ය වෛද්ය ඩබ්ලිව්.ආර්.එම්. මහේන්ද්ර සෙනෙවිරත්න, මොණරාගල දිස්ත්රික් සෞඛ්ය සේවා අධ්යක්ෂ විශේෂඥ වෛද්ය සේනක හේවාමාන්න,
රෝහල් අධ්යක්ෂිකා විශේෂඥ වෛද්ය ඉරේෂා පතිරගේ, යන මහත්ම මහත්මීන් ඇතුලුව, විශේෂඥ වෛද්යවරුන්, වෛද්යවරුන්, හෙද හෙදියන් ඇතුළු ප්රදේශයේ රාජ්ය ආයතන නියෝජනය කරමින් නිලධාරින්, ප්රදේශයේ මහජනතාවද එක්ව සිටියහ.
