28/08/2026
දකුණු පළාත් ක්රීඩා හා යෞවන කටයුතු, ග්රාම සංවර්ධන, සංස්කෘතික හා කලා කටයුතු, සමාජ සුබ සාධන, පරිවාස හා ළමා රක්ෂක සේවා, වනිතා කටයුතු, ගෘහ ආර්ථික ප්රවර්ධන, නිවාස හා ඉදිකිරීම් සහ මිනිස් බල හා රැකි රක්ෂා අමාත්යාංශයේ 2027 වර්ෂයට අදාළ සංවර්ධන සැලැස්ම සකස් කිරීම සම්බන්ධයෙන් වූ විශේෂ සාකච්ඡාවක් දකුණු පළාත් ආණ්ඩුකාර ආචාර්ය සුසිරිපාල මානවඩු මහතාගේ ප්රධානත්වයෙන් සහ වෘත්තීය අධ්යාපන නියෝජ්ය අමාත්ය නලින් හේවගේ මහතා, හම්බන්තොට දිස්ත්රික් සංවර්ධන කමිටු සභාපති පාර්ලිමේන්තු මන්ත්රී නිහාල් ගලප්පත්ති මහතා, ගාල්ල දිස්ත්රික් පාර්ලිමේන්තු මන්ත්රීවරුන් වන නීතිඥ හසාරා ලියනගේ මහත්මිය සහ තිලංක යූ. ගමගේ මහතා, හම්බන්තොට දිස්ත්රික් පාර්ලිමේන්තු මන්ත්රී වෛද්ය සඳරුවන් මදරසිංහ මහතාගේ සහභාගීත්වයෙන් අද (28) පෙරවරුවේ දකුණු පළාත් ප්රධාන ලේකම් කාර්යාලයීය ශ්රවණාගාරයේදී පැවැත්විණි.
මෙහිදී 2027 වර්ෂය සඳහා අමාත්යාංශය මගින් ක්රියාත්මක කිරීමට අපේක්ෂිත සංවර්ධන වැඩසටහන් හා ව්යාපෘති පිළිබඳව පුළුල් ලෙස සාකච්ඡා කෙරුණු අතර, පසුගිය වසරවල සංවර්ධන සැලසුම් ක්රියාත්මක කිරීමේදී හඳුනාගත් අඩුපාඩු, ගැටලු සහ අභියෝග පිළිබඳව ද අවධානය යොමු කෙරිණි. එම අත්දැකීම් මෙන්ම පසුගිය වසරවල ක්රියාත්මක කළ වැඩසටහන්වල ප්රතිඵල ද සැලකිල්ලට ගනිමින්, 2027 වර්ෂයේදී වඩාත් ඵලදායී හා ජනතා අවශ්යතා මත පදනම් වූ සංවර්ධන වැඩසටහන් ක්රියාත්මක කිරීමේ අවශ්යතාව පිළිබඳව මෙහිදී අවධාරණය කෙරිණි.
ජවසම්පන්න, සෞඛ්ය සම්පන්න සහ විනයගරුක සමාජයක් බිහිකිරීමේ අරමුණින් ක්රීඩා ක්ෂේත්රයේ ගුණාත්මකභාවය ඉහළ නැංවීම, පළාතේ ක්රීඩා යටිතල පහසුකම් සංවර්ධනය කිරීම, තරුණ ප්රජාව ක්රීඩා හා ඵලදායී ක්රියාකාරකම් වෙත යොමු කිරීම මෙන්ම තරුණයන්ගේ දක්ෂතා හඳුනාගෙන ඒවා සංවර්ධනය කිරීම සම්බන්ධයෙන් ද මෙහිදී සාකච්ඡා කෙරිණි.
එමෙන්ම ග්රාම සංවර්ධන ක්ෂේත්රය ශක්තිමත් කිරීම, ග්රාමීය ජනතාවගේ ජීවන තත්ත්වය නංවාලීම, ග්රාමීය යටිතල පහසුකම් හා ප්රජා අවශ්යතා සපුරාලීම, දකුණු පළාතේ සංස්කෘතික හා කලා ක්ෂේත්රය සංරක්ෂණය හා ප්රවර්ධනය කිරීම, දේශීය කලාකරුවන් හා නිර්මාණකරුවන් සඳහා අවශ්ය පහසුකම් සැලසීම පිළිබඳව ද අවධානය යොමු විය.
තවද, අඩු ආදායම්ලාභී හා අවශ්යතා සහිත ජනතාව සඳහා සමාජ සුබසාධන වැඩසටහන් පුළුල් කිරීම, පරිවාස හා ළමා රක්ෂක සේවා තවදුරටත් ශක්තිමත් කිරීම, ළමා අයිතිවාසිකම් හා ආරක්ෂාව තහවුරු කිරීම මෙන්ම, කාන්තාවන්ගේ ආර්ථික හා සමාජීය සවිබලගැන්වීම සඳහා වනිතා කටයුතු යටතේ නව වැඩසටහන් ක්රියාත්මක කිරීම පිළිබඳව ද සාකච්ඡා කෙරිණි.
කාන්තාවන් සහ පවුල් ඒකකවල ආර්ථික ශක්තිය ඉහළ නැංවීම සඳහා ගෘහ ආර්ථික ප්රවර්ධන වැඩසටහන්, ස්වයං රැකියා හා කුඩා පරිමාණ ව්යවසායන් දිරිගැන්වීම, නිවාස අවශ්යතා සහිත ජනතාව සඳහා නිවාස හා ඉදිකිරීම් ක්ෂේත්රයට අදාළ වැඩසටහන් ක්රියාත්මක කිරීම පිළිබඳව ද මෙහිදී අවධානය යොමු විය.
එසේම, දකුණු පළාතේ තරුණ හා වැඩකළ හැකි ජනතාව සඳහා වෘත්තීය හා රැකියා අවස්ථා පුළුල් කිරීම, මිනිස් බල සංවර්ධනය, රැකියා අවස්ථා සඳහා තරුණයන් සූදානම් කිරීම සහ ස්වයං රැකියා හා ව්යවසායකත්වය දිරිගැන්වීම සම්බන්ධයෙන් ද 2027 වර්ෂයට අදාළව ක්රියාත්මක කළ යුතු වැඩසටහන් පිළිබඳව සාකච්ඡා කෙරිණි.
මෙහිදී අදහස් දැක්වූ ආණ්ඩුකාරතුමන් අමාත්යාංශය යටතේ පවතින සියලුම විෂය ක්ෂේත්රයන් ආවරණය වන පරිදි 2027 සංවර්ධන සැලැස්ම සකස් කිරීමේදී ජනතාවගේ සැබෑ අවශ්යතා හඳුනාගෙන ප්රමුඛතා අනුව සංවර්ධන වැඩසටහන් ක්රියාත්මක කළ යුතු බව ආණ්ඩුකාර ආචාර්ය සුසිරිපාල මානවඩු මහතා මෙහිදී පෙන්වා දුන්නේය.
පසුගිය වසරවල ක්රියාත්මක කළ වැඩසටහන්වල ප්රගතිය හා ප්රතිඵල විධිමත්ව ඇගයීමට ලක් කරමින්, හඳුනාගත් අඩුපාඩු හා ගැටලු මඟහරවා ගනිමින් 2027 වර්ෂයේ සංවර්ධන වැඩසටහන් වඩාත් කාර්යක්ෂමව හා ඵලදායීව ක්රියාත්මක කිරීමට කටයුතු කළ යුතු බවද ආණ්ඩුකාරතුමන් අවධාරණය කළේය.
විශේෂයෙන්ම ක්රීඩා හා යෞවන කටයුතු, ග්රාම සංවර්ධන, සංස්කෘතික හා කලා කටයුතු, සමාජ සුබසාධන, ළමා හා කාන්තා රක්ෂණය, ගෘහ ආර්ථික ප්රවර්ධනය, නිවාස හා ඉදිකිරීම් මෙන්ම මිනිස් බල හා රැකියා ක්ෂේත්රයන්හි වැඩසටහන් එකිනෙක සම්බන්ධ කර ගනිමින් පළාතේ ජනතාවගේ ජීවන තත්ත්වය ඉහළ නැංවීම අරමුණු කරගත් ඒකාබද්ධ සංවර්ධන ප්රවේශයක් අනුගමනය කිරීමේ වැදගත්කමද ආණ්ඩුකාරතුමන් පෙන්වා දුන්නේය.
මෙම අවස්ථාව සඳහා දකුණු පළාත් ක්රීඩා අමාත්යාංශ ලේකම් ඉන්දික සමරකෝන් මහතා, දකුණු පළාත් නියෝජ්ය ප්රධාන ලේකම් (සැලසුම් හා මෙහෙයුම්) එම්.කේ.ජී.එස්.පී.කේ. ජයසේකර මහතා, දකුණු පළාත් නියෝජ්ය ප්රධාන ලේකම් (පිරිස් හා පුහුණු) කසුන් එස්.කේ. වැල්ලහේවා මහතා, දකුණු පළාත් ආණ්ඩුකාරතුමන්ගේ පෞද්ගලික ලේකම් සුධර්මන් වෛද්යරත්න මහතා, සම්බන්ධීකරණ ලේකම්වරුන් වන සුනිසිත බණ්ඩාර මහතා සහ බී.ඩබ්ලිව්.පී.ජී. සරත් මහතා ඇතුළු දකුණු පළාත් ක්රීඩා අමාත්යාංශයේ වගකිවයුතු නිලධාරීන් රැසක් සහභාගී වූහ.
