24/04/2026
នាព្រឹកថ្ងៃទី២៣ ខែមេសា ឆ្នាំ២០២៦
រដ្ឋបាលក្រុងពោធិ៍សាត់ កំណត់ទិសដៅឆ្នាំ២០២៦ ប្រែក្លាយជាទីក្រុងគំរូ "ស្អាត បៃតង និងវៃឆ្លាត"
កិច្ចប្រជុំពិភាក្សាលើការចងក្រងផែនការប្រតិបត្តិឆ្នាំ២០២៦ របស់ការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈក្រុងពោធិ៍សាត់ ។
ក្នុងកិច្ចប្រជុំនេះ លោក ម៉ក់ រាត្រី ប្រធានស្តីទី បានបង្ហាញនូវរបាយការណ៍បូកសរុប និងចក្ខុវិស័យយុទ្ធសាស្ត្រសម្រាប់ឆ្នាំ២០២៦ ដែលផ្ដោតសំខាន់លើការប្រែក្លាយក្រុងពោធិ៍សាត់ ឱ្យទៅជាទីក្រុងគំរូផ្នែកអនាម័យ បរិស្ថាន និងវៃឆ្លាត (Smart & Green City) បានដាក់ចេញនូវគោលដៅធំៗចំនួន ៤ រួមមាន៖
១. ទំនើបកម្មសេវាអនាម័យ៖ ជំរុញការប្រមូលសំណល់រឹងឱ្យបានលើសពី ៩០% និងប្រើប្រាស់ប្រព័ន្ធបង់ប្រាក់ឌីជីថលឱ្យបាន ៣០%។
២. ពង្រឹងសណ្តាប់ធ្នាប់៖ បញ្ឈប់ការរំលោភចំណីផ្លូវសាធារណៈ និងរៀបចំចំណតយានយន្តឱ្យមានសណ្តាប់ធ្នាប់។
៣. អភិវឌ្ឍហេដ្ឋារចនាសម្ព័ន្ធបៃតង៖ ធានានិរន្តរភាពប្រព័ន្ធលូ ភ្លើងបំភ្លឺសាធារណៈ និងដាំកូនឈើលម្អ (ក្ងោក និងត្របែកព្រៃ) តាមដងផ្លូវសំខាន់ៗ។
៤. អភិបាលកិច្ចឌីជីថល៖ ពង្រឹងការប្រើប្រាស់បច្ចេកវិទ្យាដូចជា GPS, Luma និង App ROLUOS ដើម្បីគ្រប់គ្រងការងារ និងវាយតម្លៃដៃគូឯកជន។
ខ្ញុំសូមវាយតម្លៃខ្ពស់ចំពោះក្រុមការងារការិយាល័យ ដែលទោះបីជាមានមន្ត្រីចំនួនតិច ប៉ុន្តែបានបង្ហាញពីឆន្ទៈខ្ពស់ក្នុងការប្រើប្រាស់បច្ចេកវិទ្យាឌីជីថលមកជួយសម្រួលដល់ការងារផ្តល់សេវាសាធារណៈ។ ហើយបានសង្កត់ធ្ងន់ថា ការបែងចែកភារកិច្ចច្បាស់លាស់រវាងក្រុមជំនួយការរដ្ឋបាល-ហិរញ្ញវត្ថុ និងក្រុមភ្នាក់ងារគឺជាគន្លឹះក្នុងការធានានូវតម្លាភាពនៃចំណូល និងប្រសិទ្ធភាពនៃការចុះបញ្ជីអតិថិជនតាមខ្នងផ្ទះ។
ជាកិច្ចបញ្ចប់នៃកិច្ចប្រជុំ បានជំរុញឱ្យការិយាល័យជំនាញ បន្តសហការជិតស្និទ្ធជាមួយដៃគូ និងមន្ទីរពាក់ព័ន្ធ ដើម្បីដោះស្រាយបញ្ហាប្រឈមនានា ជាពិសេសការអប់រំប្រជាពលរដ្ឋឱ្យយល់ដឹងពីការញែកសំរាម និងការចូលរួមថែរក្សាសោភណភាពក្រុង ដើម្បីត្រៀមលក្ខណៈសម្រាប់ភាពរីកចម្រើននៃក្រុងពោធិ៍សាត់នាពេលអនាគត៕
