Баткен облустук дене тарбия жана спорт башкармалыгы

12/09/2026

12/09/2026

Бугун 2021–2022-жылдары кыргыз-тажик мамлекеттик чек арасында болгон куралдуу кагылышууларда курман болгон жоокерлерди эскерүү максатында Баткен облусунун аскер гарнизонунун аскер бөлүктөрүнүн арасында волейбол боюнча спорттук мелдеш өткөрүлдү.

Мелдештин негизги максаты — мекенди коргоодо курман болгон жоокерлердин жаркын элесин эскерүү менен бирге аскер кызматкерлеринин дене тарбиялык даярдыгын жогорулатуу, сергек жашоо образын жайылтуу жана аскер бөлүктөрүнүн ортосундагы достук мамилени бекемдөө.

Спорттук мелдешке Баткен облусунун аскер гарнизонундагы жалпы 10 аскер бөлүктөн аскер кызматкерлери катышып, күчтүү атаандаштыкта өздөрүнүн спорттук чеберчилигин көрсөтүштү. Мелдештин жүрүшүндө командалар жеңиш үчүн татыктуу күрөшүп, мыкты оюн көрсөтүштү.

Мелдештин жыйынтыгында
1-орун — 2053-аскер бөлүгү;
2-орун — 2051-аскер бөлүгү;
3-орун — «Илюирс» командасы;
4-орун — 2022-аскер бөлүгү.

Жеңүүчүлөргө жана байгелүү орундарга ээ болгон командаларга Баткен облустук дене тарбия жана спорт башкармалыгы тарабынан даярдалган кубок, диплом, медалдар жана акчалай сыйлыктар тапшырылды.

31/08/2026

Эгемендиктин 35 жылдыгына карата спорттук мелдештер өткөрүлдү.
Бүгүн, Кыргыз Республикасынын Эгемендүүлүгүнүн 35 жылдык мааракесине карата Баткен облусунда бир катар спорттук иш-чаралар уюштурулуп, жаштарды спортко тартуу жана сергек жашоо образын жайылтуу максатында майрамдык мелдештер өткөрүлдү.

Аталган иш-чаралар Баткен облустук дене тарбия жана спорт башкармалыгы тарабынан уюштурулуп, спорттун таяк тартыш, гиря көтөрүү жана кол күрөш түрлөрү боюнча спортчулар өз күчтөрүн сынашты. Ошондой эле шаардык дене тарбия жана спорт бөлүмү тарабынан улуттук спорттун өзгөчө түрү болгон кыргыз күрөшү боюнча мелдеш уюштурулду.

Мелдештер 75 кг чейинки жана 75 кг жогорку салмактагы ар түрдүү курактагы спорт сүйүүчүлөрү жана спортчулар катышып, күчүн, шамдагайлыгын, чыдамкайлыгын жана чеберчилигин көрсөтүштү. Өзгөчө улуттук спорт түрлөрүнө болгон кызыгуу жогору болуп, мелдештер достук жана атаандаштык маанайда өттү.

Иш-чаранын жүрүшүндө спортчуларга ийгилик каалап, алардын мекенчилдик сезимин жана спортко болгон кызыгуусун арттыруунун маанилүүлүгү белгиленди. Мындай мелдештер жаш муундарды сергек жашоого үндөп, улуттук спорттун каада-салтын сактоого жана өнүктүрүүгө чоң өбөлгө түзөт.

Мелдештердин жыйынтыгында мыкты көрсөткүчтөргө жетишкен жеңүүчүлөр жана байге ээлери аныкталып, аларга уюштуруучулар тарабынан дипломдор, медалдар жана акчалай сыйлыктар тапшырылды.

Спорттук мелдештер Кыргыз Республикасынын Эгемендүүлүгүнүн 35 жылдык мааракесин татыктуу белгилөөгө багытталган иш-чаралардын бири болуп, катышуучуларга жагымдуу маанай тартуулады.

Эгемендүүлүгүбүз түбөлүктүү, элибиздин ынтымагы бекем, өлкөбүздүн келечеги кең болсун!

02/07/2026

Бул — биздин сыймык, Баткен облусунун сыймыгы!

Таиланддын Паттайя шаарында өтүп жаткан 20 жашка чейинкилер (U20) арасындагы грек-рим күрөшү боюнча Азия чемпионатында Баткен облусунун жаш балбандары тарыхый ийгилик жаратып, Азия чемпиону болушту.

🏆 Мамыров Муслим — 87 кг салмакта U20 Азия чемпиону.
📍 Баткен облусу, Кызыл-Кыя шаары.

🏆 Алхам Абдрасулов — 60 кг салмакта U20 Азия чемпиону.
📍 Баткен облусу, Лейлек району.

🏆 Ырысбек Хамдамов — 72 кг салмакта U20 Азия чемпиону.
📍 Баткен облусу, Сүлүктү шаары.

Бул жеңиш — талыкпаган эмгектин, өжөрлүктүн жана күчтүү даярдыктын жыйынтыгы. Жаш балбандарыбыздын жеңиши менен жалпы кыргыз элин, өзгөчө Баткен облусунун тургундарын чын жүрөктөн куттуктайбыз!

Жеңишиңер кут болсун! Кыргыз желегин бийик көтөрүп, өлкөбүздүн намысын дүйнөлүк ареналарда да даңазалай бергиле! Силер менен сыймыктанабыз! Бар болгула.

16/06/2026

Кыргыз Республикасынын Министрлер Кабинетине караштуу Дене тарбия жана спорт мамлекеттик агенттиги тарабынан кызматкерлердин кесиптик билим деңгээлин жогорулатуу, методикалык ишмердүүлүктү өркүндөтүү, заманбап иш тажрыйбаларын өздөштүрүү жана өз ара тажрыйба алмашууну өнүктүрүү максатында уюштурулган «Методикалык иш алып баруу» аттуу окуу-семинар 2026-жылдын 10–14-июнь күндөрү Ысык-Көл облусунун Чок-Тал айылында ийгиликтүү өткөрүлдү.

Аталган окуу-семинарга Баткен облусунун аймагында иш алып барган балдар-өспүрүмдөр спорт мектептеринин методисттери, директорлордун окуу-тарбия жана спорттук иштер боюнча орун басарлары катышып, өздөрүнүн кесиптик билимдерин жана практикалык көндүмдөрүн өркүндөтүүгө мүмкүнчүлүк алышты.

Семинардын жүрүшүндө методикалык иштерди уюштуруунун заманбап ыкмалары, билим берүү жана машыктыруу процессин пландаштыруу, спорттук даярдыкты натыйжалуу жүргүзүү, отчеттук жана талдоо иштерин жүргүзүү, ошондой эле спорт мектептериндеги окуу-методикалык документацияларды туура алып баруу боюнча кеңири маалыматтар берилди. Катышуучулар теориялык сабактар менен катар практикалык тапшырмаларды аткарып, ар кандай тажрыйбалык кейстерди талкуулашты.

Мындан тышкары, семинарда спикерлер өздөрүнүн иш тажрыйбалары менен бөлүшүп, спорт тармагындагы актуалдуу маселелерди талкуулашты. Бул иш-чара кызматкерлердин кесиптик чеберчилигин жогорулатууга, методикалык иштердин сапатын жакшыртууга жана спорт мектептеринин ишмердүүлүгүн мындан ары өнүктүрүүгө чоң салым кошту.