Vinstrihreyfingin - grænt framboð

14/09/2026

Rósa Björk á Samstöðinni 👇 Rætt var um fjárlagafrumvarp ríkisstjórnarinnar, aðhaldið frá vinstri, stöðu fjölmiðla, og stöðuna á vinnumarkaði og kjarasamninga.

Þau koma og ræða fréttir vikunnar og stöðu samfélagsins þau Rósa Bj...

14/09/2026

Á meðan beðið var eftir úrslitum í æsispennandi þingkosningum í Svíþjóð í gærkvöldi, var frábær opinn fundur um norræn stjórnmál hjá okkur í VG. Afskaplega gott að fá þingmenn í vinstri-grænu systurflokkunum okkar á Norðurlöndunum til að gefa okkur innsýn inn í stjórnmálastöðuna í hverju landi fyrir sig. Takk kære nordiske venner ! ❤️💚

13/09/2026

VG og óháð í Múlaþingi sendi frá sér yfirlýsingu í gær í kjölfar veitingu starfs-og rekstrarleyfis til Kaldvíkur vegna 10.000 tonna sjókvíaeldis í Seyðisfirði. Hér 👇 er hluti yfirlýsingarinnar þeirra sem hægt er að lesa alla á fb-síðu þeirra.

“Fréttir gærdagsins um veitingu MAST á starfs- og rekstrarleyfi til Kaldvíkur vegna 10.000 tonna sjókvíaeldis í Seyðisfirði voru vægast sagt mikil vonbrigði.

Íbúar og aðrir velunnarar Seyðisfjarðar hafa barist ötullega gegn þessum áformum síðustu ár. Athugasemdir, kærur og málarekstur hafa verið umfangsmikil og bent hefur verið á alvarlega ágalla og rangar upplýsingar í gögnum á ýmsum stigum málsins.

Þrátt fyrir ríka andstöðu íbúa, þrátt fyrir atvinnu sem mun tapast, helgunarsvæði sæstrengsins, álitamál um netlög, lögreglukæru á hendur fyrirtækinu, milljarða taprekstur og þúsundir tonna af laxi sem hafa drepist í kvíum fyrirtækisins, kemst MAST að þessari niðurstöðu.

En málinu er ekki lokið.

Byggingarleyfisumsókn Kaldvíkur er enn í ferli hjá HMS. Á sveitarstjórnarfundi síðastliðinn miðvikudag fjölluðu fulltrúar VG og óháðra um erindi sitt sem tekið var fyrir í Umhverfis- og framkvæmdaráði þann 28. ágúst 2026.

Í erindinu er óskað eftir því að Múlaþing nýti rétt sinn til að óska eftir endurskoðun strandsvæðisskipulagsins og taki enn skýrari afstöðu til byggingarleyfisumsóknar Kaldvíkur.”

11/09/2026

“Það er eðlilegt að spyrja hversu mikið af afkomu heimilanna sé réttlætanlegt að leggja að veði til þess að aðhaldið skili sér í vaxtalækkunum nógu hratt og hversu langt ríkisstjórnin eigi að ganga í því að treysta á að markaðurinn leysi úr hnútinum.” - úr grein Bjarka Hjörleifsson,varaformanns VG, um fjárlagafrumvarp ríkisstjórnarinnar ✅

10/09/2026

“Ábyrg ríkisstjórn á ekki að kynna hallalaus fjárlög og krossa fingur og vona að markaðurinn leysi vandann í framhaldinu. Ríkisstjórn á að boða ábyrga hagstjórn sem hún getur staðið við og passar upp á alla þjóðfélagshópa.” - Grein Rósu Bjarkar á Vísi ✅

09/09/2026

Stjórn VG nýtti helgina í afar góðan vinnufund á Vestfjörðum !

Helstu forgangsverkefni næstu mánaða rædd og mótuð og ákvarðanir teknar sem snúast um pólitíska, fjárhagslega og skipulagslega enduruppbyggingu ✅

Við erum meira en til í haustið og veturinn ! ❤️💚

07/09/2026

“ Í dag endurspeglast stjórnmálalegar áherslur ríkisstjórnarinnar og þær eru að boða ríkisreikning sem lítur út fyrir að vera í jafnvægi á blaði en gerir ekkert annað en að boða ójafnvægi og auka ójöfnuð í samfélaginu.” - Rósa Björk skrifar um fjárlög ríkisstjórnarinnar sem kynnt voru í dag.

Hallalaus fjárlög – en á kostnað hverra?

Þráhyggjustef ríkiststjórnar Samfylkingarinnar, Viðreisnar og Flokk fólksins raungerðist í dag í makalausri kynningu þeirra á hallalausum fjárlögum. Með þessum fjárlögum er ljóst að það er verið að þrengja útgjaldaramma Ríkissjóðs og setja mjög stíf markmið um afkomu hins opinbera á sama tíma og samfélagslegar þarfir aukast.

Auðvitað er ekki markmið VG að reka eigi Ríkissjóð með halla. En hallalaus fjárlög er ekki góður árangur ef leiðin að því er sú að láta almenning bera enn meiri byrðar og veikja grunnkerfin okkar allra sem tryggja okkur öryggi, jöfnuð og lífsgæði.

Hvar erum við sem samfélag þegar við gerum hallalausan ríkissjóð að æðsta markmiði, en ekki markmiðið um að efla og styrkja enn frekar grunnþjónustuna við fólkið í landinu hvar þörfin fer vaxandi ?

Í hallalausu fjárlögunum er gert ráð fyrir að útgjaldarammi fjölskyldumála lækki árið 2027. Sama gildir um húsnæðis- og skipulagsmál og málaflokk vinnumarkaðar og atvinnuleysistrygginga. Forgangsröðunin þarna er kolröng og ekki í neinu samræmi við fyrirheit stjórnvalda um að verja tiltekna hópa samfélagsins. Þörfin fyrir þá vernd hefur í raun aukst enn meir en áður í ljósi þess að vextir og verðbólga hafa verið hærri og varað mun lengur en áður var talið.

Útgjöld til heilbirgðismála hækka að nafnvirði, en hækka þau útgjöld nægjanlega mikið þegar við stöndum frammi fyrir aukinni þjónustuþörf, öldrun þjóðarinnar, mönnunarvanda og uppsöfnuðum verkefnum sem þola enga bið? Duga fjármunirnir nægjanlega til að tryggja aðgengi að heilbrigðisþjónustu óháð efnahag?

Þegar rennt er yfir útgjaldaramma velferðarmála kemur í ljós að útgjaldarammi fjölskyldumála, húsnæðismála lækkar ( td með því að lækka stofnframlög til almennra íbúða um 3 mia.kr.) og lækkun útgjalda til vinnumarkaðsmála er kynnt.
Þá þurfum við að spyrja um áhrif þess á fólk sem nú þegar á erfitt með að ná endum saman.

Á sama tíma og herða á skilyrði um verðtryggð lán - sem mun auka greiðslubyrði og þyngja enn stöðu ungs fólks og tekjulægri hópa – rýrna barna og húsnæðisbætur að verðgildi og vaxtabótakerfið er lagt endanlega af….Og til að toppa þetta allt er ekki gripið til neinna aðgerða á húsnæðismarkaði !

Og svo er það umhverfis – og loftslagsmálin.
Framlög til þeirra eiga að lækka samkvæmt útgjaldaramma fjárlaga ríkisstjórnarinnar. Á sama tíma og loftslagsbreytingar, náttúruvá og hnignun líffræðilegrar fjölbreytni eru meðal stærstu áskorana sem við stöndum frammi fyrir.

Það er ekki nóg að tala um græna umbreytingu. Hún þarf að sjást í fjárlögum.

Útgjaldarammi umhverfismála er um 38,8 milljarðar króna árið 2027. Er þessi upphæð nógu há miðað við það risavaxna verkefni sem við stöndum frammi fyrir? Náttúruvernd, loftslagsaðgerðir, landgræðsla, mengunarvarnir og viðbrögð við náttúruvá eru ekki gæluverkefni. Þetta eru fjárfestingar í framtíðinni en líka samfélagsleg öryggismál. Umhverfismálin eru nefnilega lífsspursmál fyrir okkur Íslendinga eins og fyrir aðra.

Skoðum líka aðeins öryggis – og varnarmálin í fjárlögunum. Framlög til öryggis- og varnarmála. hafa aukist verulega á síðustu árum eða úr 6,6 ma.kr árið 2024 í 10,8 mia kr. 2026. Þessi stífa og markvissa hækkun til öryggis – og varnarmála endurspeglar alvarlega stöðu á alþjóðavettvangi, en kallar líka á skýra almenna umræðu um forgangsröðun þegar kemur að öryggismálum þjóðarinnar. Hvers konar öryggi viljum við byggja upp á Íslandi ? Hvernig tryggjum við að aukin útgjöld til varnarmála komi ekki niður á félagslegu öryggi þjóðarinnar?

Öryggi okkar er líka heilbrigðiskerfi sem virkar, að fólk hafi greiðan aðgang að húsnæði, öflugar almannavarnir, raforkukerfi sem virka, náttúruvernd og vernd sjávar. Netöryggi og lýðræðislegt heilbrigði samfélagslegrar umræðu.

En ekki síst samfélag þar sem ójöfnuður grefur ekki undan samstöðu og samtakamætti þjóðar.

Fjárlög hverrar ríkisstjórnar eru pólitísk. Í dag endurspeglast stjórnmálalegar áherslur ríkisstjórnarinnar. Þær eru að boða ríkisreikning sem lítur út fyrir að vera í jafnvægi á blaði en gerir ekkert annað en að boða ójafnvægi og auka ójöfnuð í samfélaginu.

31/08/2026

Það er margt sem fer um hugann þegar niðurstöður þjóðaratkvæðagreiðslunnar liggja nú fyrir. Það var gott að sjá svona góða kosningaþátttöku. Það felst í því styrkur fyrir útkomuna og sýnir vel að þjóðin hefur áhuga á að taka afstöðu til stórra mála, sama hvenær ársins er. Kjósendur hafa nú talað og stjórnvöld verða að hlusta.

Í úrslitunum liggja líka mörg skilaboð til okkar allra. Mikill munur er á afstöðu fólks eftir búsetu. Í Reykjavík er meirihlutinn hlynntur því að fara í aðildarviðræður, á meðan andstaðan er sterkari á landsbyggðinni.

Þennan afstöðumun þurfum við að skilja enn betur. Annað umhugsunarefni er hvernig samfélagsleg umræða fer fram og hvar. Hvar fær elsta og yngsta kynslóð kjósenda upplýsingar um samfélagslega mikilvæg mál af þessu tagi? Og hvernig má það vera að hægt sé að ausa ótakmörkuðum fjármunum í kosningabaráttu án nokkurs eftirlits?

Ég sagði fyrir kosningarnar að ég styddi að hefja að nýju aðildarviðræður við ESB, af því ég taldi að íslenska þjóðin eigi að hafa sem bestar og réttastar upplýsingar um mál sem varða framtíð hennar. Hvað þá í heimi sem er að verða sífellt meira ógnvekjandi og pólaríserandi.

Ég stend fyllilega við þá afstöðu.

En ég er líka formaður Vinstri grænna. Þar erum við ekki öll sammála um Evrópumálin, sum eru hörð á móti ESB og önnur vilja að Ísland gangi sem fyrst í ESB. Mörg eru hlutlaus.

Mín skoðun er að þetta sé ekki veikleikamerki fyrir okkar hreyfingu, heldur einmitt lýðræðislegt hraustleikamerki.

Það er líka hægt að koma fram sem formaður VG og hafa aðrar skoðanir á einstöku máli en hluti flokksfélaga. Það má líka vera ósammála mér sem formanni VG án þess að það sé túlkað sem veikleikamerki fyrir nýja forystu eða flokkinn.

Við í VG eigum nefnilega margt sameiginlegt sem skiptir mun meira máli en ágreiningur um afstöðu til ESB. Við viljum öll að íslenskt samfélag sé samfélag þar sem jöfnuður, félagslegt réttlæti, náttúruvernd, friður og mannréttindi séu í algjörum forgrunni. Það eru þau grundvallargildi sem sameina virka félaga og kjósendur okkar.

Niðurstaða þjóðaratkvæðagreiðslunnar verður því ekki að uppgjöri milli já og nei-sinna innan Vinstri grænna, heldur grunnur að samtali sem er þegar hafið innan okkar raða og víðar um samfélagið. Því spurningin um Evrópusamstarf og mögulega aðild Íslands að ESB hverfur ekki þótt atkvæðagreiðslan sé yfirstaðin. Amk ekki miðað við stöðuna í alþjóðamálunum um þessar mundir.

En afstaða mín og varaformanns VG til aðildarviðræðnanna endurspeglar líka kynslóðaskipti og áherslutóna nýrrar forystu. Það eru skýr skilaboð út af fyrir sig sem ég vek athygli á.

Þið sem þekkið mig vitið að ég fylgi minni sannfæringu og hef alltaf gert, en ég mun að sjálfsögðu hlusta á þau sem eru mér ósammála og virða og vinna vel með þeim sem deila ekki minni afstöðu til aðildarviðræðnanna. Við þurfum ekki að vera sammála um allt til að standa saman um það sem skiptir mestu máli.

En við þurfum líka öll að hlusta á hvert annað.

Við í nýrri forystu VG munum bera á borð sýn um hvernig framtíðin í íslensku samfélagi getur litið út. Þar sem jöfnuður og tækifæri fyrir öll eru til staðar. Þar sem víðsýni og opinn hugur leiðir okkur áfram í takt við kröfuna um minni stéttskiptingu og meiri samvinnu, meiri sátt við umhverfi og náttúru og virðingu fyrir friði, fjölbreytileika og mannréttindum.

Það er góð framtíðarsýn. Um hana eigum við að sameinast sem flest.

16/06/2026

Fjármálaáætlun ríkisstjórnarinnar fyrir næstu 5 ár var samþykkt af meirihlutanum á Alþingi í gær.

Minnihluti hægrimanna mótmælti hástöfum því sem þau kalla umtalsverðar skattahækkanir, á meðan við vinstrimenn sjáum ekki nægjanlega útfærðar tekjuöflunarleiðir og alltof stífar aðhaldsaðgerðir.

Í áætluninni kemur því miður fram dapurleg sýn á grunnþjónustuna og samfélagið, á meðan fagstéttirnar benda sjálfar á að mönnunarvandi blasir við í kerfislega mikilvægum stéttum. Gert er ráð fyrir aðhaldsaðgerðum, fækkun ríkisstarfsmanna og ekki nægjanlegum metnaði í
uppbyggingu í lykilþjónustu.

Sérstaklega vekur áhyggjur að ekki sé gert ráð fyrir auknu fjármagni til framhaldsskóla á tímabilinu. Það er algjörlega óboðleg nálgun. Metnaðarleysið hvað varðar menntakerfið og niðurskurður á fjármagni í menntun ungs fólks á Íslandi er gríðarlegt áhyggjuefni.

Rauður þráður - sem jaðrar við þráhyggju - í gegnum áætlunina er að nú skuli fjárlög vera hallalaus. Það markmið er góðra gjalda vert þegar vel gengur. En þegar vaxtastig og verðbólga og atvinnuleysi hafa verið stöðugt yfir meðaltali og illa gengur að vinna á því, er hættan við þráhyggjuna um hallalaus fjárlög sú að ekki verði veitt nægjanlegt fjármagn til grunnþjónustu og við sitjum uppi með svo stífa aðhaldskröfu að niðurskurður bitni á grunnkerfunum.

Enda kemur það fram í áætluninni.

Aðhaldið á grunnþjónustuna kemur fram gagnvart ríkisstarfsmönnum og miðar ríkisstjórnin að þeim fækki um 1% á næsta ári og ríkisstofnunum fækki um 15% á kjörtímabilinu.

Þetta viðhorf ríkisstjórnar Samfylkingar, Viðreisnar og Flokk fólksins í garð opinberra starfsmanna helst í hendur við áform ríkisstjórnar um afnám áminningarskyldu til opinberra starfsmanna sem t.a.m BSRB hefur mótmælt hástöfum.

Meirihluti fjármálanefndar Alþingis fagnar hagræðingaraðgerðum hjá hinu opinbera upp á 170 milljarða og tekur því miður undir viðhorfið til ríkisstarfsmanna og launakrafa þeirra og kjarasamningsgerða og segir m.a. í sínu áliti; …” Til langs tíma ættu launahækkanir ekki að vera umfram framleiðniaukningu. Vísbendingar eru um að nauðsynlegt sé að auka sérstaklega aðhald á þessu sviði.” Er það virkilega framlag meirihlutans á þingi að kvarta yfir því að kjör opinberra starfsmanna sé fullgóð og nú þurfi að stemma við launahækkunum þeirra ?

Þessi nálgun meirihlutans og ríkisstjórnarinnar ber vott um skort á virðingu fyrir þeim stofnunum og því starfsfólki sem heldur uppi heilbrigðis-, mennta-, velferðar- og öryggisþjónustu landsins. Að boða fækkun ríkisstarfsmanna á sama tíma og stjórnvöld viðurkenna sjálf að mönnun sé ein stærsta áskorun heilbrigðiskerfisins er augljóst misræmi í stefnu ríkisstjórnarinnar.

Málefnaflokkar heilbrigðismála eru allajafna langstærsti útgjaldaliður Ríkissjóðs hverju sinni. Ríkisstjórnin ætlar sér því miður ekki þá nauðsynlegu hækkun sem þarf í þá málaflokka og nær aukningin engan veginn upp í þá aðkallandi þörf sem heilbrigðismálin þurfa nauðsynlega á að halda.

Vinstri græn sendu inn umsögn við fjármálaáætlunina og þar gagnrýnum við markmiðið um hallalaus fjárlög og að í of ríkum mæli sé ætlun ríkisstjórnarinnar að nota samdrátt á gjaldahlið til að ná því,fremur en með réttlátri og sjálfbærri tekjuöflun.

Stíf aðhaldsstefna sem birtist í fjármálaáætlun ríkisstjórnar Samfylkingarinnar, Viðreisnar og Flokk fólksins, felur ekki í sér ábyrga hagstjórn heldur einfaldlega meðvitaða ákvörðun um að þrengja að almannaþjónustu.

( mynd fengin af vef BB )

12/06/2026

Í stjórnmálaályktun Flokksráðsfundar VG 6.6.2026 var ályktað um ýmis mál og sérstaklega um brottfararbúðir.
Hér má lesa stjórnmálaályktun fundarins í heild sinni 👇🛑
📎https://vg.is/greinar/stjornmalaalyktun-flokksradsfundar-6-juni-2026/