12/07/2021
*ಕೊಡವಾಮೆರ ಕೊಂಡಾಟ*(ರಿ)
ಅವ್ವ ಪಾಜೆರಉಳಿಕೆಬೊಳ್ಚೆಕಾಯಿತ್
*ದೇವ ನೆಲೆ*
*ಶ್ರೀ ಮಲೆ ಮಹದೇಶ್ವರ ತಿರಿಕೆ*
ವಿರಾಜಪೇಟೆ ತಾಲ್ಲೂಕ್'ರ ಮಗ್ಗುಲ ಗ್ರಾಮತ್'ರ ಮಲೆ ತಿರಿಕೆ ಕುಂದಲ್ ಶ್ರೀ ಮಲೆ ಮಹದೇಶ್ವರ ದೇವಸ್ಥಾನ ಉಂಡ್. ಅಂದಾಜ್ 800 ಕಾಲತ್'ರ ಇತಿಹಾಸ ಉಳ್ಳ ಈ ದೇವಸ್ಥಾನ ತುಂಬಾ ಆಕರ್ಷಣೀಯವಾಯಿತುಂಡ್.
ದೇವಸ್ಥಾನತ್ರ ಗರ್ಭಗುಡಿಲ್ ಈಶ್ವರ ಲಿಂಗ ಉಂಡ್ ಗುಡಿರ ಬಲ್ತ ಬರಿಲ್ ಗಣಪತಿ ದೇವಡ ಗುಡಿ ಉಂಡ್. ಪೋರಂಗಣತ್'ಲ್ ದೇವಸ್ಥಾನತ್'ರ ಬಯ್ಯ ಬರಿಲ್ ಅಯ್ಯಪ್ಪ ಸ್ವಾಮಿರ ಸ್ಥಾನ ಪಿಂಞ ನಾಗದೇವಡ ಸ್ಥಾನ ಉಂಡ್. ಪೊರಾಂಗಣತ್ ಬ್ರಹ್ಮರಾಕ್ಷಸಂಡ ನೆಲೆಯೂ ಉಂಡ್. ದೇವಸ್ಥಾನತಿಂಜ ಚೆನ್ನ ದೂರತ್ ಬಸವಂಡ ಕಟ್ಟೆ ಉಂಡ್. ದೇವಡ ಪೂಜೆಕ್ ಅಲ್ಲಿಯೇ ಉಳ್ಳ ಕಣತೆರೆರ ನೀರ್'ನ ಬಳಸುವ.
ಸುಮಾರ್ ಕಾಲಕ್ ಬಯ್ಯ ಕುಂದ್'ರ ಕೋಡಿವೋಲಿ ಎಣ್ಣ್'ವಯಿಂಗ ಓರ್ ಬಾಲನ ಕೂಟಿಯಂಡ್ ಪಾಬಳ್ಳಿ (ಪಾಡ್ ಬಳ್ಳಿ) ತೇಡಿಯಂಡ್ ಕಾಡ್ಲ್ ಸುತ್ತಿಯಂಡಿಂಜತ್. ಬೇಲಿಕಟ್ಟೋಕ್ ಕೇರ್'ರನ್ನನೆ ಈ ಪಾಬಳ್ಳಿ ಬಳಸುವ. ತೇಡಿಯಂಡ್ ಪೋಪಕ ದೂರ ತೋರ್ ಜಾಗತ್ ಪಾಬಳ್ಳಿನ ಬಾಲಕ ಕಂಡಿತ್ ಕೋಡಿವೋಲಿಕ್ ಕಾಟೋಕ ಅದ್'ನ ಕೊಜ್ಜಬಪ್ಪಕ್ ಎಣ್ಣ್'ವ ಬಾಲ ಪೋಯಿತ್ ಬಳ್ಳಿಕ್ ಕೈ ಇಡೋಕ ಬಳ್ಳಿ ನನ್ನ ತೊಡತೇಂದ್ ಎಣ್ಣ್'ನನ್ನನೆ ಕೇಪಕ, ಬಾಲ, ಕೋಡಿವೋಲಿರ ಮೂಡ್ ನೋಟ್'ಚಿ., ಕೋಡಿವೋಲಿಕು...,ಬಳ್ಳಿ,ನನ್ನ ತೊಟ್ಟತೇಂಗಿ ನೀರ್'ರ ಜಾಗತ್ ಚೋರೆ ಬಪ್ಪಾಂದ್ ಎಣ್ಣ್'ನ ಮಾದ್ರಿ ಆಚಿ. ಈ ವಿಸ್ಮಯ ನಡ್ಂದ ಅರೆಗಳಿಗೆಲ್ ಕೋಡಿ ಮೋಲಿರ ಮೇಲ್'ಕ್ ದೇವಡ ಆವಾಹನೆ ಆಚಿ. ದೇವ ಕೋಡಿವೋಲಿರ ಮೇಲ್'ಕ್ ಪೊದ್ದಿಯಂಡ್ ಜೋರ್'ತೆ ಕೂತ್'ಟ್ಟತ್.ಆ ಕೂತ್'ರ ಸದ್ದ್'ಕ್ ಕುಪ್ಪಚ್ಚಿರ ವಯಸ್ಸಾನ ಓರ್ ವ್ಯಕ್ತಿ ಅಲ್ಲಿಕ್ ಬಂತ್ ಆ ದೃಶ್ಯ ಕಂಡಿತ್ ಆಶ್ಚರ್ಯ ಆಚಿ. ಆ ವ್ಯಕ್ತಿನ ನೋಟ್'ನ ದೇವ ನೀನ್ ನಾಡ ಜೋತೆಲಿರ್ಂದ್ ಎಣ್ಣಿತ್ ನಾಡ ಆರಾದಕ ಆಂಡೂಂದ್ ಆಜ್ಞೆ ಮಾಡ್'ಚಿ.ಕುಪ್ಪಚ್ಚಿರ ಅಜ್ಜ ದೇವಡ ಆಜ್ಞೆಕ್ ಒತ್ತಂಡ್ ಭಕ್ತಿಲ್ ಕೈ ತೊತ್ತತ್. ಅಲ್ಲಿಂಜ ಚೆಂಬೆ ಬೆಳ್ಳೂರ್'ರ ಅಜ್ಜನಿ ಕಂಡ ಕುಟುಂಬತ್'ರ ಪಿಂಞ ಕೊಳುವಂಡ ಕುಟುಂಬತ್'ರ ಒರೋರ್ ಸದಸ್ಯಂಗ ಆ ದಿಕ್ಕ್'ಲ್ ಬಪ್ಪ. ಅಯಿಂಗಕ್ ದೇವ ಅಲ್ಲಿಯೋರ್ ದೇವಸ್ಥಾನ ಕಟ್ಟೋಕ್ ಆಜ್ಞೆ ಮಾಡುವ.
ದೇವಳ ಕಂಡಯಿಂಗಎಲ್ಲಾರು ಕೂಡಿಯಂಡ್ ವಾಪಸ್ ಬಂದಂಡಿಪ್ಪಕ ಚಾರಿಮಂಡ ಕುಟುಂಬತ್'ರ ಒರ್ ಸದಸ್ಯನ ಕಾಂಬಕ್ ಕ್'ಟ್ಟ್'ವ.ಅವಂಗ್ ದೇವಡ ವಿಚಾರ ಎಣ್ಣ್'ವ.ನನ್ನ ಬುಟ್ಟಿತ್ ನಿಂಗಳೇ ಎಲ್ಲಾ ತೀರ್ಮಾನ ಮಾಡಿಟಿರಾಂದ್ ಕೇಪಕ ಅವಂಗೂ ದೇವಸ್ಥಾನತ್'ರ ಜವಾಬ್ದಾರಿನ ವಹಿಸುವ. ಆಚೇಂಗಿ ಚಾರಿಮಂಡ ಸದಸ್ಯ ನಿಂಗಡ ತಕ್ಕ್'ಕ್ ಆದಾರ ಬೋಂಡುಂದ್ ಕೇಪಕ ಅಯಿಂಗ ಮುದ್ರೆ ಉಳ್ಳ ಪಿಚ್ಚಾಳೆರ ವೋಯಿರತ್'ನ ಆದಾರ ಆಯ್ತ್ ಕೊಡ್ಪ. ಪಿತ್ಯಾಂದ್ ಎಲ್ಲಾರೂ ಕೂಡಿತ್ ಸುತ್ತಮುತ್ತ ಲುಳ್ಳ ಮೂಂದ್ ನಾಲ್ ಗ್ರಾಮ ಸುತ್ತಿತ್ ದೇವಸ್ಥಾನ ಕಟ್ಟ್'ವ ತೀರ್ಮಾನ ಮಾಡುವ. ಕುಂದಿರ ಪಿಂಞ ಕುಪ್ಪಚ್ಚಿರ ಕುಟುಂಬಕಾರ ಭಂಡಾರ ತಕ್ಕಂಗ, ಕೊಳುವಂಡ ಪಿಂಞ ಅಜ್ಜಿನಿಕಂಡ ಕುಟುಂಬಕಾರ ದೇವತಕ್ಕಂಗಳಾಚಿ. ಚಾರಿಮಂಡ ಕುಟುಂಬ ಕಾರ ಉಗ್ರಾಣ ಉಸ್ತುವಾರಿ ಕಾರ್ಯ ವಹಿಸಿಯಂಡತ್
ಈ ದೇವಸ್ಥಾನಕ್ ಮಗ್ಗುಲ, ಐಮಂಗಲ, ಚೆಂಬೆ ಬೆಳ್ಳೂರು ಪಿಂಞ ಕುಕ್ಲೂರು ಗ್ರಾಮ ಕೂಡುವ. ಈ ಗ್ರಾಮಸ್ಥಂಗ ಎಲ್ಲಾ ಕೂಡಿತ್ ಪ್ರತೀಕಾಲ ನಡ್ಪ ನಮ್ಮೆನಾಳ್'ಕ್ ಬೋಂಡಿಯಾಪ ಅಕ್ಕಿ ಪಿಂಞ ಪಣತ್'ನ ಚಂದ ರೂಪತ್ ಒಪ್ಪ್'ಚಿಟಿತ್ ನಮ್ಮೆ ಕಯಿಪ.
ಈ ದೇವಸ್ಥಾನತ್ ಮಹಾಶಿವರಾತ್ರಿನಾ ವಿಶೇಷ ರೀತಿಲ್ ಆಚರಣೆ ಮಾಡುವ. ಆ ದಿವಸ ಕೂಳ್ ಪ್ರಸಾದವು ಇಪ್ಪ. ಪ್ರತಿ ಕಾಲ ಮಾರ್ಚ್ ಪದ್ ನಂಜಂಗ್ ಕೊಡಿಮರ ಬೆಚ್ಚಿತ್ ದೇವಡ ಉತ್ಸವಕ್ ಚಾಲನೆ ಕೊಡ್ಪ. ಅಂದ್ ಕುಂದಿರ ಮನೆಲಿಂಜ ಭಂಡಾರ ಬಪ್ಪ. ಪದ್'ನಾರಂಗ್ ಮಜ್ಜಣ ಮಹಾಪೂಜಾಸೇವೆ, ಬೈಟ್ ಕಾಪು, ವಿಶೇಷ ಪೂಜೆ ಇಪ್ಪ. ಪದ್'ನೇಳಂಗ್ ಪೊಲಾಕ ಇರ್ ಬಳ್'ಕ್, ಮಹಾಪೂಜಾಸೇವೆ ಇಪ್ಪ. ಪದ್'ನ'ಟ್ಟಂಗ್ ಬಲ್ಯ ನಮ್ಮೆ, ಪೊಲಾಕ ನೇರ್ತೆ ಇರ್ ಬಳ್'ಕ್, ಮಜ್ಜಣ ನೆರ್ಪು, ಎತ್ತ್ ಪೋರಾಟ, ತೆಂಗೆಕ್ ಬೊಡಿ ಬೆಪ್ಪೊ, ಮೂಂದ್ ಗಂಟೇಕ್ ದೇವಡ ದರ್ಶನ, ವಸಂತ ಪೂಜೆ, ಒಯಿಪತ್ ಆರ್ ಗಂಟೇಕ್ ಪೇಟೆಲ್ ಉತ್ಸವ ಮೂರ್ತಿರ ಮೆರವಣಿಗೆ ಇಪ್ಪ. ಪತ್ತೊಯಿಂಬದಾಂಗ್ ದೇವಡ ಅವಭ್ರತ ಕುಳಿ. ಆ ದಿವ್ಸ ದೇವ ಚೆಂಬೆ ಬೆಳ್ಳೂರ್' ಲುಳ್ಳ ದೇವಡ ಕೆರೆಲ್ ಕುಳ್ಚಿತ್ ಬಪ್ಪ. ಅಲ್ಲಿಂಜ ದೇವಡ ನೃತ್ಯ ಇಪ್ಪ. ಇರುವದಂಗ್ ಶುದ್ದ ಕಲಶಮಹಾಪೂಜೆ ಇಪ್ಪ. ಇನ್ನನೆ ದೇವಡ ನಮ್ಮೆ ಅಂಜಿ ದಿವ್ಸ ಬಾರಿ ಜೋರ್'ಲ್ ನಡ್ಪ.
ಬಾರಿ ಎಲ್ಲಾರೂ ಪೋಯಿತ್, ಚಾಯಿ ಕುಂದ್'ರ ಕೊಡಿಲುಳ್ಳ *ಶ್ರೀ ಮಲೆಮಹದೇಶ್ವರಂಡ*ದರ್ಶನ ಪಡ್ಂದೋನ🙏
*ಓಂ ಶ್ರೀ ಮಲೆ ಮಹದೇಶ್ವರಾಯ ನಮ:🙏*
*ಬಬಿತ ನೂರೇರ✍*
(ಇದಿಚ್ಚಕ್ ಉಳುವಂಗಡ ಕಾವೇರಿ ಉದಯ ಅಯಿಂಡ "ಕೊಡಗ್'ರ ದೇವ ನೆಲೆ " ಪುಸ್ತಕ ತಿಂಜ ಆಂಜದ್)
