14/02/2023
ബഹു. ആൻ്റണി............
" വിശുദ്ധരിൽ ഏറ്റവും സൗമ്യനും ദയയുള്ളവനുമായ വിശുദ്ധ അന്തോനീസ്, നിങ്ങളുടെ ദൈവത്തോടുള്ള നിങ്ങളുടെ ജ്വലിക്കുന്ന സ്നേഹം, നിങ്ങളുടെ ഉന്നതമായ സദ്ഗുണം, നിങ്ങളുടെ സഹജീവികളോടുള്ള നിങ്ങളുടെ മഹത്തായ ദാനധർമ്മം, ഭൂമിയിൽ മറ്റൊരു വിശുദ്ധർക്കും നൽകാത്ത അത്ഭുത ശക്തികൾ സ്വന്തമാക്കാൻ നിങ്ങളെ യോഗ്യരാക്കി........."
സത്യമേ പറയാവു....പക്ഷെ എല്ലാ സത്യങ്ങളും തുറന്നു പറയുവാൻ എല്ലാവർക്കും സാധിക്കാറില്ല.......ശ്രീ. എ.കെ ആൻ്റണി ശരീര ഭാഷയിലൂടെ ധീരത പ്രകടിപ്പിക്കാറില്ലെങ്കിൽ തന്നെയും ആരും പറയാൻ ധൈര്യപ്പെടാത്ത വസ്തുതകൾ പലപ്പോഴും തുറന്നു പറയാനുള്ള ആർജ്ജവം കാണിച്ചിട്ടുണ്ട്.
ഹിന്ദു മതസ്ഥരായ ഈശ്വര വിശ്വാസികളെ ഹിന്ദു മത വർഗീയവാദികളായി ചിത്രീകരിച്ച് പ്രസ്ഥാനങ്ങളിൽ നിന്ന് ഒറ്റപ്പെടുത്തിയാൽ അവർ ബി.ജെ.പിയിൽ അണിനിരക്കുകയും മോദി വീണ്ടും അധികാരത്തിൽ വരികയും ചെയ്യുമെന്നാണ് അദ്ദേഹം പൊതുവായി പറഞ്ഞു വച്ചത്.
അദ്ദേഹം ഒരു ദേശീയ നേതാവായത് കൊണ്ടാണ് ഇന്ത്യയുടെ CONTEXT ൽ പറഞ്ഞത്.
സത്യത്തിൽ ഇത് പ്രമുഖ മതേതര കക്ഷികളെ മാത്രം ലക്ഷ്യം വച്ച് പറഞ്ഞതാണ്.
ഈ രാഷ്ട്രീയ കക്ഷികളിൽ പ്രവർത്തിക്കുന്ന ഹിന്ദു മതസ്ഥരായ ഈശ്വര വിശ്വാസികളായ രാഷ്ട്രീയ പ്രവർത്തകർ, അവരുടെ വിശ്വാസത്തിൻ്റെ ഭാഗമായ ആചാരങ്ങൾ (custom) സ്വീകരിക്കുന്നതിനെ ഹിന്ദു വർഗീയതയായി ചിത്രീകരിച്ച് പ്രസ്ഥാനങ്ങളിൽ അവരെ ഒറ്റപ്പെടുത്താൻ ആസൂത്രിത ശ്രമം നടക്കുന്നു എന്ന് തന്നെയാണ് അദ്ദേഹം പറഞ്ഞ് വച്ചത്.
മതേതര പ്രസ്ഥാനങ്ങളിലുള്ള മുസ്ലിം മത വിശ്വാസി 5 നേരം നിസ്ക്കരിക്കുന്നു. വെള്ളിയാഴ്ച്ച നടക്കുന്ന സംസ്ഥാന - ജില്ലാ കമ്മറ്റി യോഗത്തിൽ നിന്ന് ഉച്ച നിസ്ക്കാരത്തിനായി പോയി വരുന്നു. ക്രിസ്തു മത വിശ്വാസി ഞായറാഴ്ച്ച യോഗം തൻ്റെ അനുഷ്ഠാനങ്ങൾക്കനുസരിച്ച് ക്രമീകരിക്കുന്നു. ഇത് മാറ്റി നിർത്തുന്നത് ചുരുക്കം ചില ഭാരവാഹികൾ മാത്രം. കാരണം ഇതൊക്കെ ഒഴിവാക്കി ഒരു ജീവിതം അവർക്കില്ല.
ശ്രീ. എ കെ ആൻ്റണി പറഞ്ഞതു പോലെ..... രാവിലെ വൃത്തിയായി കുളിച്ച് ക്ഷേത്ര ദർശനം നടത്തി കുറി ചാർത്തി (ഹിന്ദു മത അനുഷ്ഠാനങ്ങളുടെ ഭാഗം - അതിലുപരി ഭാരതീയ സംസ്കാരത്തിൻ്റെ ഭാഗം) സംഘടനാ പ്രവർത്തനത്തിനെത്തുന്ന ഒരു ഭാരവാഹിയെ ദൈവ മാർഗ്ഗം സ്വീകരിക്കുന്ന വ്യക്തി ആയിട്ടാണോ അതോ മൃദു ഹിന്ദുത്വമെന്ന 'പുത്തൻ വ്യാഖ്യാനത്തിൻ്റ ' പരിധിയിൽ പെടുത്തുമോ ?
തികഞ്ഞ ദൈവ വിശ്വാസികളായ ന്യൂനപക്ഷ മതസ്ഥർ വിശ്വാസികളായ ഹിന്ദുക്കളുടെ ആചാരങ്ങളെയും അനുഷ്ഠാനങ്ങളെയും ദൈവ മാർഗ്ഗമായി മാത്രമെ കാണുന്നുള്ളു.
അതായത് രാജ്യത്തിൻ്റെ ജനാധിപത്യ മതേതര മൂല്യങ്ങൾ ഉയർത്തി പിടിക്കുന്ന തികഞ്ഞ ഹിന്ദു മത വിശ്വാസികളായ ഭാരവാഹികളെ വർഗീയ വാദികളായി ചിത്രീകരിച്ച് പ്രസ്ഥാനങ്ങളിൽ ഒറ്റപ്പെടുത്താൻ ശ്രമിക്കുന്നത് ന്യൂനപക്ഷ മത വിശ്വാസികളല്ല, മറിച്ച് ചില രാഷ്ട്രീയക്കാർ മാത്രമാണെന്നാണ് അദ്ദേഹം പറഞ്ഞു വയ്ക്കുന്നത്.
ന്യൂനപക്ഷ മതവിശ്വാസം ദൈവമാർഗവും ഹിന്ദു മത വിശ്വാസം വർഗീയതയും !
ഇക്കാരണത്താൽ കേരളത്തിൽ ബി.ജെ.പി യുടെ പടയോട്ടം സംഭവിക്കുമെന്ന അദ്ദേഹത്തിൻ്റെ വിലയിരുത്തലിനെ കുറിച്ച്.....
കേരളത്തിൽ ശ്രീ. ആൻ്റണി വെളിപ്പെടുത്തിയ മാനസികാവസ്ഥ മതേതര കക്ഷികളിൽ പ്രവർത്തിക്കുന്ന ഹിന്ദുക്കളിൽ പലർക്കും ഉണ്ടായാൽ തന്നെയും ബി.ജെ.പിയുടെ കേന്ദ്ര നേത്യത്വത്തിലുള്ള ' TEAM WORK ' കേരളത്തിലെ ബി ജെ.പി ഘടകത്തിലും അവർ പ്രതീക്ഷിക്കും.
ബി.ജെ.പിയുടെ കേന്ദ്ര നേത്യത്വത്തിലുള്ള ' TEAM WORK ' കേരള ഘടകത്തിൽ ഉണ്ടാകണമെന്നത് നിലവിലെ ബി.ജെ.പി പ്രവർത്തകരുടെയും ചിരകാല സ്വപ്നമാണ്.
ഏതൊരു രാഷ്ട്രീയ പ്രസ്ഥാനത്തിലും പുതുതലമുറയെ പ്രചോദിപ്പിക്കുന്ന, കൂട്ടായ്മക്ക് മുൻതൂക്കം നൽകുന്ന ആദ്യ നിര നേതാക്കൾ അനിവാര്യമാണ്. ആദ്യ നിര നേതാക്കൾക്ക് പാർട്ടിയെ ' Lift ' ചെയ്യുവാൻ സാധിക്കുന്നില്ലെങ്കിൽ ആ പ്രസ്ഥാനത്തിൻ്റെ വളർച്ച മന്ദഗതിയിലാകും.
കോൺഗ്രസിനെ കേരളത്തിൽ ' Lift ' ചെയ്യുവാൻ ഡോ.ശശി തരൂരിന് സാധിക്കുമെന്ന പാർട്ടി പ്രവർത്തകരുടേയും യു.ഡി.എഫ് ഘടക കക്ഷികളുടേയും ബോധ്യം നാം കണ്ടതാണ്.
ബി.ജെ.പി യോട് അഭിമുഖ്യം പുലർത്തി സ്വമേധയാ മുന്നോട്ട് വന്ന ശ്രീ. ഇ.ശ്രീധരൻ, ശ്രീ.അൽഫോൻസ് കണ്ണന്താനം, ശ്രീ.സുരേഷ് ഗോപി, ശ്രീ. ജേക്കബ് തോമസ് തുടങ്ങിയവരെ വേണ്ട വിധം ഉപയോഗപ്പെടുത്തി ആദ്യ നിരയിൽ എത്തിച്ചിരുന്നുവെങ്കിൽ ആൻ്റണി വെളിപ്പെടുത്തിയ ഈ ' അസംതൃപ്തർ ' ബി.ജെ.പിയിലേക്ക് ഒഴുകുകയും മറ്റ് സംസ്ഥാനങ്ങളിലേത് പോലെ കേരളത്തിലും ബി.ജെ.പി വൻ മുന്നേറ്റം നടത്തുന്ന സാഹചര്യം സൃഷ്ടിക്കപ്പെടുമായിരുന്നു.
ശ്രീ.ആൻ്റെണിയുടെ ഈ വെളിപ്പെടുത്തലിനെതിരെ യാതൊരു എതിരഭിപ്രായവും ഉയർന്നില്ലായെന്നത്, വസ്തുതകൾ അംഗീകരിക്കാനുള്ള പക്വത രാഷ്ട്രീയ പ്രവർത്തകരും കൈവരിച്ചിരിക്കുന്നു എന്നതിൻ്റെ ഉത്തമ ദൃഷ്ടാന്തമാണ്.
