05/07/2026
വിദ്യാർത്ഥികളുടെ സുരക്ഷിതവും സുഗമവുമായ യാത്ര ഉറപ്പാക്കാൻ കൈകോർത്ത് ഷൊർണ്ണൂർ നഗരസഭ; 'സ്റ്റുഡന്റ് ട്രാവലിംഗ് ഫെസിലിറ്റി കമ്മിറ്റി' യോഗം ചേർന്നു. ✨🚌
നമ്മുടെ നാടിന്റെ പ്രതീക്ഷകളായ വിദ്യാർത്ഥികൾക്ക് സ്വകാര്യ ബസുകളിൽ തടസ്സങ്ങളില്ലാതെയും, തർക്കങ്ങളില്ലാതെയും യാത്ര ചെയ്യുന്നതിനുള്ള സൗകര്യം ഒരുക്കുക എന്ന ലക്ഷ്യത്തോടെ 'സ്റ്റുഡന്റ് ട്രാവലിംഗ് ഫെസിലിറ്റി കമ്മിറ്റി'യുടെ പ്രത്യേക യോഗം നഗരസഭയിൽ വെച്ച് കൂടുകയുണ്ടായി.
ബസ് ജീവനക്കാരും വിദ്യാർത്ഥികളും തമ്മിലുള്ള തർക്കങ്ങൾ പൂർണ്ണമായും ഒഴിവാക്കി, കുട്ടികൾക്ക് സ്മൂത്തായി യാത്ര ചെയ്യാനുള്ള അന്തരീക്ഷം ഒരുക്കുകയാണ് ഈ കമ്മിറ്റിയുടെ പ്രധാന ലക്ഷ്യം.
നഗരസഭ വൈസ് ചെയർമാൻ ശ്രീ. അനുരാജ് സ്വാഗതം ആശംസിച്ച യോഗത്തിൽ നഗരസഭ സെക്രട്ടറി, വിവിധ സ്കൂളുകളിലെ എച്ച്.എംമാർ, പി.ടി.എ പ്രസിഡന്റുമാർ, ബസ് ഓണേഴ്സ് അസോസിയേഷൻ ഭാരവാഹികൾ, പോലീസ് ഉദ്യോഗസ്ഥർ എന്നിവർ പങ്കെടുത്തു.
യോഗത്തിൽ എടുത്ത പ്രധാന തീരുമാനങ്ങൾ:
ബസ് സ്റ്റോപ്പുകളുടെ ക്രമീകരണം: ഷൊർണ്ണൂർ ബസ് സ്റ്റാൻഡ്, വികാസ്, കെ.വി.ആർ തുടങ്ങി വിവിധ ഭാഗങ്ങളിലേക്ക് പോകുന്ന വിദ്യാർത്ഥികൾ ഏതെല്ലാം ബസ് സ്റ്റോപ്പുകളിൽ നിന്നാണ് കയറേണ്ടത് എന്നതിനെക്കുറിച്ച് കൃത്യമായ ക്രമീകരണങ്ങൾ തീരുമാനിച്ചിട്ടുണ്ട്.
കൃത്യമായ മേൽനോട്ടം: കുട്ടികൾ ഏതൊക്കെ ബസുകളിലാണ് യാത്ര ചെയ്യുന്നത് എന്നതിനെക്കുറിച്ച് അധ്യാപകർ കൃത്യമായ രേഖാമൂലമുള്ള ലിസ്റ്റ് തയ്യാറാക്കുകയും, കുട്ടികളുടെ യാത്ര സുരക്ഷിതമാക്കാൻ അധ്യാപകർക്ക് പ്രത്യേക ചുമതല നൽകുകയും ചെയ്യും.
വാട്സാപ്പ് കൂട്ടായ്മ: അടിയന്തര കാര്യങ്ങളും നിർദ്ദേശങ്ങളും വേഗത്തിൽ പങ്കുവെക്കുന്നതിനായി സ്കൂൾ അധികൃതരും, ബസ് ഭാരവാഹികളും, പോലീസും, നഗരസഭയും ഉൾപ്പെടുന്ന ഒരു പ്രത്യേക വാട്സാപ്പ് ഗ്രൂപ്പ് രൂപീകരിക്കും.
കുട്ടികളുടെ യാത്രാക്ലേശം പരിഹരിക്കുന്നതിനും സുരക്ഷിതത്വം ഉറപ്പാക്കുന്നതിനും എല്ലാവരുടെയും ആത്മാർത്ഥമായ സഹകരണം പ്രതീക്ഷിക്കുന്നു.
