25/12/2025
सेवा सहयोग ग्रामोदय प्रकल्प अंतर्गत लोंढे येथे किशोरवयीन मुलींच्या आरोग्यासाठी व्यापक जनजागृती उपक्रम !
उर्मी प्रकल्पांतर्गत ११० विद्यार्थिनींना वर्षभरासाठी सॅनिटरी किट वाटप..*
सेवा सहयोग फाउंडेशन, पुणे यांच्या सेवा सहयोग ग्रामोदय प्रकल्पांतर्गत राबविण्यात येणाऱ्या उर्मी प्रकल्पाच्या माध्यमातून लोंढे येथील स्व. सै. कै. रावसाहेब निकम उच्च माध्यमिक विद्यालय व ज. मा. विद्यालय येथे किशोरवयीन मुलींच्या आरोग्यविषयक व्यापक जनजागृती कार्यक्रम यशस्वीपणे पार पडला.
या कार्यक्रमात परिसरातील विविध गावांतून शिक्षणासाठी येणाऱ्या ११० किशोरवयीन विद्यार्थिनींना किशोरावस्थेतील शारीरिक व मानसिक बदल, हार्मोनल बदलांचे परिणाम, भावनिक अस्थिरता, आत्मविश्वास वाढविण्याचे उपाय, मासिक पाळीच्या काळात घ्यावयाची योग्य स्वच्छता, स्वच्छतेचे महत्त्व, संतुलित व पोषक आहार, नियमित व्यायाम तसेच वैयक्तिक आरोग्याची काळजी याबाबत सखोल, शास्त्रीय व समुपदेशनात्मक मार्गदर्शन करण्यात आले.
विशेषतः मासिक पाळीच्या काळात स्वच्छतेकडे दुर्लक्ष झाल्यास होणारे संसर्ग, रक्तक्षय (अॅनिमिया), त्वचारोग, गर्भाशयाशी संबंधित आजार व त्याचे दीर्घकालीन दुष्परिणाम याविषयी उदाहरणांसह माहिती देण्यात आली. यासोबतच मासिक पाळीविषयी समाजात असलेल्या अंधश्रद्धा, गैरसमज व संकोच दूर करून या विषयावर उघडपणे व आत्मविश्वासाने बोलण्याची गरज मार्गदर्शकांनी अधोरेखित केली.
मुलींचे आरोग्य म्हणजे कुटुंबाचे आरोग्य आणि कुटुंबाचे आरोग्य म्हणजे समाजाचे भविष्य” या भावनेतून हा उपक्रम राबविण्यात आला. कोणतीही मुलगी केवळ आर्थिक, सामाजिक किंवा कौटुंबिक कारणांमुळे आरोग्यापासून वंचित राहू नये, या उद्देशाने ११० विद्यार्थिनींना वर्षभरासाठी ‘उर्मी’ सॅनिटरी किटचे मोफत वाटप करण्यात आले.
या उपक्रमामुळे विद्यार्थिनींमध्ये आरोग्यविषयक जागरूकता वाढली असून स्वच्छतेबाबत सकारात्मक बदल घडतील, तसेच शिक्षणात खंड न पडता त्या आत्मविश्वासाने पुढे जातील, असा विश्वास आयोजकांनी व्यक्त केला.
कार्यक्रमात सौ. गोरीताई पेंडसे, सौ. दीप्तीताई बोगम, सौ. मनीषा निकम व सौ. वैशाली राठोड यांनी मार्गदर्शन केले. कार्यक्रमाच्या यशस्वी आयोजनासाठी दिंडी प्रमुख श्री. दयाराम सोनवणे, श्री. सोमनाथ माळी व श्री. प्रमोद पाटील यांनी सहकार्य केले.
या उपक्रमाचे लोंढे गावातील ग्रामस्थ, पालक, शिक्षकवर्ग व शालेय व्यवस्थापनाने मनःपूर्वक स्वागत करत सेवा सहयोग फाउंडेशनच्या शिक्षण, आरोग्य, रोजगार व पर्यावरण क्षेत्रातील सातत्यपूर्ण सामाजिक कार्याबद्दल विशेष समाधान व आभार व्यक्त केले.
Sahayog
सेवा सहयोग ग्रामोदय प्रकल्प, खान्देश
