കോഴിക്കോട് ജില്ലയിലെ വടകര താലൂക്കില് വടകര ബ്ളോക്കില് അഴിയൂര് വില്ലേജ് ഉള്പ്പെടുന്ന ഗ്രാമപഞ്ചായത്താണ് അഴിയൂര് ഗ്രാമപഞ്ചായത്ത്. 9.77 ചതുരശ്ര കിലോമീറ്റര് ആണ് പഞ്ചായത്തിന്റെ വിസ്തീര്ണ്ണം. വടക്ക് കേന്ദ്രഭരണപ്രദേശമായ മാഹിയും കണ്ണൂര് ജില്ലയിലെ ന്യൂമാഹി, ചൊക്ലി പഞ്ചായത്തുകളും, തെക്ക് ഒഞ്ചിയം, ഏറാമല പഞ്ചായത്തുകളും, പടിഞ്ഞാറ് അറബിക്കടലും, കിഴക്ക് ഏറാമല പഞ്ചായത്തും കണ്ണൂര് ജില്ലയിലെ ചൊക്ലി, കരിയാട്
പഞ്ചായത്തുകളും അതിരുകളായുള്ള അഴിയൂര് ഒരു കടലോര പഞ്ചായത്താണ്. ഇതോടൊപ്പം ഇതൊരു പുഴയോര പഞ്ചായത്തും കൂടിയാണ്. അഞ്ചുകിലോമീറ്ററോളം കടലോര പ്രദേശമുള്ള ഈ പഞ്ചായത്തില് കാപ്പുഴ മുതല് വടക്ക് പൂഴിത്തല വരെ കടലാക്രമണ ഭീഷണിയുള്ള പ്രദേശമാണ്. അഴിയൂരിന്റെ തെക്ക് ഭാഗത്തുള്ള കറപ്പക്കുന്ന്, ബംഗ്ളകുന്ന്, പാതിരിക്കുന്ന്, മാവിലാകുന്ന്, മലോല്കുന്ന് എന്നിവയും ഏറാമല പഞ്ചായത്തിലെ കളരിക്കുന്നും ഒഞ്ചിയം പഞ്ചായത്തിലെ കൈതോക്കുന്നും സൃഷ്ടിക്കുന്ന കവചം സുനാമി പോലുള്ള ഭീഷണികളില് നിന്ന് അഴിയൂരിന്റെ തെക്കന് പ്രദേശങ്ങളെ സംരക്ഷിക്കുന്നു. കേരളസംസ്ഥാനം രൂപീകരിച്ചതിനു ശേഷം ഒരു നോണ്പഞ്ചായത്ത് പ്രദേശമായിരുന്ന പഴയ അഴിയൂരംശം ഉള്പ്പെട്ട പ്രദേശത്ത് അഴിയൂര് പഞ്ചായത്ത് രൂപീകൃതമായി. പ്രഥമ പഞ്ചായത്ത് തെരഞ്ഞെടുപ്പില് അവിഭക്ത കമ്യൂണിസ്റ്റ് പാര്ട്ടിയുടെയും ഇന്ത്യന് യൂണിയന് മുസ്ളീം ലീഗിന്റെയും നേതൃത്വത്തിലുള്ള പൌരമുന്നണി അധികാരത്തില് വരികയും പി.ചാത്തു പ്രഥമ തെരഞ്ഞെടുക്കപ്പെട്ട പ്രസിഡന്റാവുകയും ചെയ്തു. ചരിത്രപരമായും ഭൂമിശാസ്ത്രപരമായും നിരവധി പ്രത്യേകതകളുള്ള ഒരു ഭൂവിഭാഗമാണ് അഴിയൂര് ഗ്രാമപഞ്ചായത്ത്. കടലും, പുഴയും, തോടുകളും, കുന്നുകളും വിശാലമായ മണല്പ്പരപ്പും, വയലുകളും തെങ്ങിന്തോപ്പുകളും മറ്റ് ജൈവവൈവിദ്ധ്യങ്ങളും കൊണ്ട് സമ്പന്നമാണിവിടം. കടത്തനാടിന്റെ സാംസ്കാരിക നവോത്ഥാനകേന്ദ്രങ്ങളിലൊന്നായി അറിയപ്പെട്ടിരുന്ന അഴിയൂര് എന്ന ഈ കൊച്ചു പ്രദേശത്തിന്റെ നാമകരണം തന്നെ അറബിക്കടല് എന്ന ആഴിയുടെയും മയ്യഴിപ്പുഴ എന്ന ആറിന്റെയും കരസ്പര്ശമേറ്റ് പരിലസിക്കുന്ന ഭൂപ്രദേശമെന്ന് അര്ത്ഥം വരുന്ന വിധത്തിലാണ്. വിലങ്ങാട് മലനിരകളിലെ പൂവത്തിന് ചോലയില് വെച്ച് ചെറുനീര്ചാലുകളില് നിന്ന് രൂപം കൊള്ളുന്ന മയ്യഴിപുഴ വിലങ്ങാട്, നരിപ്പറ്റ, വാണിമേല്, വളയം. നാദാപുരം, ചെക്കിയാട്, തൂണേരി, എടച്ചേരി എന്നീ വില്ലേജുകള്ക്ക് അതിരിട്ടു കൊണ്ട് ഒഴുകി ചെറ്റക്കണ്ടിപുഴയുമായി ചേര്ന്ന് ഏറാമല, കരിയാട് പഞ്ചായത്തുകള്ക്ക് അതിരിട്ടൊഴുകി തുരുത്തിമുക്കില്വെച്ച് കളയാംവെള്ളി പുഴയുമായി ചേര്ന്ന് അഴിയൂരിന്റെ തെക്ക് കിഴക്ക് ഭാഗത്തെത്തുന്നു. അഴിയൂര് അതിര്ത്തിയിലെത്തുമ്പോഴേക്കും ഈ പുഴക്ക് വീതി കൂടുന്നു. ശുദ്ധജലക്ഷാമം അഴിയൂരിന്റെ കടലോര പ്രദേശങ്ങളിലും ഉയര്ന്ന കുന്നിന് പ്രദേശങ്ങളിലുമുണ്ട്. ഈ പരിസഥിതിയിലാണ് അഴിയൂരില് തുരുത്തിപ്പുറം, കോട്ടാമലക്കുന്ന്, കോവുക്കല്, കറപ്പക്കുന്ന്, ബംഗ്ളാക്കുന്ന്, പാതിരിക്കുന്ന്, വേട്ടക്കരക്കുന്ന് എന്നീ മിനി വാട്ടര് സപ്ളൈ പദ്ധതികള് നടപ്പിലാക്കിയത്. ക്ഷേത്രങ്ങളോട് അനുബന്ധിച്ച് സസ്യാവരണക്കാടുകളുള്ള കാവുകള് അഴിയൂരിലുണ്ട്. കോറോത്ത് നാഗഭഗവതിക്ഷേത്രം, കൊളരാട് ഗണപതി ക്ഷേത്രം, ആവിക്കര ക്ഷേത്രം, കുന്നുമഠത്തില് ക്ഷേത്രം, പുലക്കണ്ടികാവ്, ഇമ്പിച്ചി കാവ് എന്നിവിടങ്ങളില് ഈ കാവുകള് കണ്ടുവരുന്നു.
