25/09/2026
ബിജെപിയുടെ പോളിംഗ് ഏജന്റായി പ്രവർത്തിക്കുന്ന തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പുറത്താക്കണമെന്നാവശ്യപ്പെട്ട് ഡൽഹിയിൽ സമരം ചെയ്ത ഡിവൈഎഫ്ഐ - എസ്എഫ്ഐ നേതാക്കളെ അറസ്റ്റ് ചെയ്തതിൽ പ്രതിഷേധിച്ച് ഡിവൈഎഫ്ഐയുടെ നേതൃത്വത്തിൽ കൊല്ലത്ത് പ്രകടനം നടത്തി. കൊല്ലം റസ്റ്റ് ഹൗസിനു മുന്നിൽ നിന്നും ആരംഭിച്ച പ്രകടനം ചിന്നക്കട ബസ് ബേയിൽ സമാപിച്ചു. തുടർന്ന് നടന്ന പ്രതിഷേധയോഗം ഡിവൈഎഫ്ഐ ജില്ലാ പ്രസിഡന്റ് എം ഹരികൃഷ്ണൻ ഉദ്ഘാടനം ചെയ്തു. ബ്ലോക്ക് സെക്രട്ടറി മുഹമ്മദ് ബിലാൽ അധ്യക്ഷനായി. ഡിവൈഎഫ്ഐ സംസ്ഥാന കമ്മിറ്റിയംഗം ടി പി അഭിമന്യൂ, കാർത്തിക്, ജ്യോതി മൈക്കിൾ, മനു മോഹൻ, അനന്ദു, മനോജ്, തൻസീർ, അരുൺ ബാബു, വൃന്ദ എന്നിവർ സംസാരിച്ചു.
