06/06/2026
प्रेस विज्ञप्ति
जोर्थाङ, 06/06/2026
सिटिजन एक्सन पार्टी–सिक्किमको महिला परिषदको समन्वय सभा जोर्थाङस्थित पार्टीको क्षेत्रीय कार्यालयमा श्रीमती सुमती छेत्रीको अध्यक्षतामा सफलतापूर्वक सम्पन्न भयो।
सभामा बुनियादी सुविधाका लागि आम नागरिकले निरन्तर संघर्ष गरिरहेको अवस्था, युवाहरूको सपना तथा भविष्यसँग भइरहेको खेलवाड, र अन्य जनसरोकारका विषयहरूमा विस्तृत छलफल गरियो। सहभागीहरूले नागरिकका समस्याहरू समाधानका लागि सिटिजन एक्सन पार्टी–सिक्किमले निरन्तर रूपमा आवाज उठाउँदै आएको र त्यसका कारण विभिन्न समस्याहरू समाधानतर्फ उन्मुख भएको विषयमा विशेष चर्चा गरे।
गहन छलफलपश्चात् सोरेङ जिल्लाको सिटिजन एक्सन पार्टी–सिक्किम महिला परिषदको कार्यकारिणी समितिमा शान्ति तामाङ, नमिता राई, रेनु तामाङ, याङ्छेन शेर्पा, जमुना थापा तथा सबिना सुवेदीलाई चयन गरिएको छ।
अध्यक्षीय सम्बोधनका क्रममा श्रीमती सुमती छेत्रीले घरपरिवार सञ्चालनको मुख्य जिम्मेवारी प्रायः महिलाहरूले निर्वाह गर्ने गरेको उल्लेख गर्दै वर्तमान समयमा ग्यास सिलिन्डरको मूल्यवृद्धिका कारण महिलाहरूले प्रत्यक्ष रूपमा विभिन्न समस्या भोग्नुपरेको बताइन्।
उनले ग्रामीण क्षेत्रका नागरिकहरूले ग्यास सिलिन्डरका लागि औसत मूल्यभन्दा दोब्बर वा तेब्बर रकम तिर्न बाध्य भएको अवस्थाप्रति चिन्ता व्यक्त गर्दै, यस समस्यालाई वर्तमान सरकारले बुझेर पनि आवश्यक सम्बोधन र समाधानका पहल नगरेको आरोप लगाइन्। यसले जनसरोकारका विषयप्रति सरकारको इमानदारिता माथि प्रश्न उठाएको उनको भनाइ थियो।
श्रीमती छेत्रीले सत्ता र व्यक्तिगत सुविधाका लागि मात्र राजनीति नगरी आम नागरिकको सुविधा, अवसर र अधिकारका लागि पनि काम गर्नुपर्ने चुनौती पी०एस गोले नेतृत्वमा रहेको सरकारलाई दिइन्।
उनले सिटिजन एक्सन पार्टी–सिक्किमलाई सिक्किमे नागरिकको पक्षमा इमानदारीपूर्वक मुद्दा उठाउने तथा सत्तापक्षका गलत नीतिविरुद्ध जनचेतना फैलाउने एकमात्र राजनीतिक संगठन भएको दाबी गर्दै महिला परिषदलाई पार्टीको मेरुदण्डका रूपमा सक्रिय भूमिका निर्वाह गर्न आह्वान गरिन्।
सभालाई सन्जु राई, बिना शर्मा, अर्पणा राई, दिलमती लिम्बु, अन्जु शर्मा, इडु छिरिङ भुटिया, शान्ति तामाङ, कर्मा दिछेन भुटिया, इन्दिरा प्रदान लगायतका नेतृहरूले सम्बोधन गरेका थिए।
प्रीतिसा छेत्रीले सञ्चालन गरेको उक्त सभामा स्वागत मन्तव्य तथा महिला परिषदको प्रतिवेदन अमृता सुब्बाले प्रस्तुत गरेकी थिइन्।
अर्पणा राई
महासचिव, महिला परिषद
सिटिजन एक्सन पार्टी–सिक्किम
