08/04/2020
സത്യം നിങ്ങളെ സ്വതന്ത്രരാക്കും - 26 - വിശുദ്ധ വാരം
യേശു 2000 വർഷം മുൻപ് അനുഭവിച്ച യാതനകളും കുരിശുമരണവും അയവിറക്കുന്ന വാരം. ലോകചരിത്രത്തിൽ ലക്ഷക്കണക്കിന് മനുഷ്യരെ-കള്ളന്മാരേയും, കൊലപാതകികളേയും-യേശുവിനേ-
ക്കാളേറെ (വേദനയുടെ കൂടിയ യുണിറ്റ് ആയ 62 ഡോൾസ് വരെ) വേദനിപ്പിച്ച് കൊന്നിട്ടുണ്ട്.
എന്നാൽ അവരെല്ലാം അതർഹിക്കുന്നു എന്ന മനോഭാവമാണ് ജനങ്ങൾക്ക് ഉണ്ടായിട്ടുള്ളത്.
നിഷ്കളങ്കനായ യേശു നമുക്കായി മരിച്ചത് കൊണ്ട് ആ മരണവേദനകൾ നാം പങ്ക് വെക്കുന്നു.
പക്ഷേ, ഇത് ക്രിസ്തുമരണത്തിൻറെ ഭൗതീക തലം മാത്രമാണ്; അതുകൊണ്ട് തന്നെ പരിമിതവുമാണ്.
2000 വർഷം മുൻപു നടന്ന സംഭവങ്ങളിൽ മുഴുകിയിരിക്കുന്നതിനേക്കാൾ, കുരിശുമരണശേഷം ലഭിച്ച ഉയർപ്പിലൂടെ അനന്ത പ്രപഞ്ചത്തിൽ വിലയം കൊണ്ട്, നിത്യമായി 'ജീവിക്കുന്ന' യേശുവിൻറെ പ്രജ്ഞയുമായി (christ concious) നേരിട്ട് സംവദിക്കുകയാണ് നാം എപ്പോഴും വേണ്ടത്.....
യേശു പറഞ്ഞ പോലെ സ്വന്തം മുറിയിലിരുന്ന് സ്വസ്ഥമായി ധ്യാനിച്ച് സ്വന്തം ഉപബോധമനസ്സിലൂടെ യേശുവിൻറെ പ്രജ്ഞയുമായി നേരിട്ട് സംവദിക്കാൻ ഈ കൊറോണക്കാലം നാം ഉപയോഗിക്കണം.
സ്റ്റാർട്ട് ആയി നിൽക്കുന്ന ബസ്സിനെ നോക്കുന്നതിനേക്കാൾ, അതിൽ കയറി ഇരിക്കുമ്പോൾ മാത്രം ബസ്സിൻറെ വിറയൽ അനുഭവപ്പെടുന്നത് പോലെ, ദൈവീക ചൈതന്യത്തിൻറെ ആ ഉന്നതതലത്തിലേക്ക് നമ്മുടെ ആത്മാവിൻറെ (ഉപബോധമനസ്സിൻറെ) സംവേദന തലം ഉയർത്തുമ്പോഴാണ് ആ ദൈവീക-പ്രജ്ഞയുടെ വൈബ്രേഷൻ (റേഡിയോയിൽ സ്റ്റേഷൻ പിടിക്കുന്നത് പോലെ) നമുക്ക് അനുഭവപ്പെടുക.
ആ വൈബ്രേഷൻ ലഭിക്കുംവരെ ഈ കൊറോണക്കാലത്ത് വീട്ടിലിരുന്ന് ധ്യാനിക്കുക....ധ്യാനിക്കുക.....
ദൈവീക അവബോധത്തിൽ ലയിച്ച് ആത്മീയമായി ധ്യാനിച്ചു കൊണ്ടേയിരിക്കുക.
