03/11/2024
ਭਾਈ ਲਾਲੋ ਪੰਜਾਬੀ ਮੰਚ ਵੱਲੋਂ ਕੇਂਦਰੀ ਤੇ ਪੰਜਾਬ ਸਰਕਾਰ ਦੇ ਝੋਨੇ ਦੀ ਖਰੀਦ ਨਾ ਕਰਨ ਤੇ ਮਾਰਕੀਟ ਕਮੇਟੀ ਮਹਿਲ ਕਲਾਂ ਦੇ ਦਫਤਰ ਅੱਗੇ ਧਰਨਾ ਦਿੱਤਾ ਗਿਆ ! ਪੰਜਾਬ ਖੇਤੀ ਪ੍ਰਧਾਨ ਸੂਬਾ ਹੈ। ਛੇ ਮਹੀਨਿਆਂ ਬਾਅਦ ਆਉਂਦੀ ਫਸਲ ਨਾਲ ਪੰਜਾਬ ਦੀ ਆਰਥਿਕਤਾ ਦਾ ਪਹੀਆ ਘੁੰਮਦਾ ਹੈ। ਕਿਸਾਨਾਂ, ਮਜਦੂਰਾਂ , ਆੜਤੀਆਂ ਤੇ ਬਜਾਰਾਂ ਵਿੱਚ ਵਪਾਰੀਆਂ ਦਾ ਚੁੱਲ੍ਹਾ ਬਲਦਾ ਹੈ, ਲੈਣ ਦੇਣ ਚਲਦਾ ਹੈ। ਪਰ ਝੋਨਾ ਨਾ ਵਿਕਣ ਕਾਰਨ ਕਿਸਾਨ ਦੇ ਨਾਲ ਨਾਲ ਮੰਡੀਆਂ ਵਿਚਲਾ ਮਜਦੂਰ ਤੇ ਆੜਤੀਆ ਵੀ ਬਿਹਲਾ ਬੈਠਾ ਹੈ। ਮਜਦੂਰ ਦਾ ਕੰਮ ਤਾਂ ਹੀ ਚੱਲੇਗਾ ਜੇਕਰ ਝੋਨੇ ਦੀ ਬੋਲੀ ਲੱਗਣ ਤੋਂ ਬਾਅਦ ਲਿਫਟਿੰਗ ਸੁਰੂ ਹੋਵੇਗੀ। ਲਿਫਟਿੰਗ ਤਾਂ ਹੋਵੇਗੀ ਜੇਕਰ ਗੁਦਾਮਾ ਵਿੱਚ ਪਹਿਲਾ ਪਏ ਪਿਛਲੇ ਅਨਾਜ ਨੂੰ ਚੁੱਕ ਕੇ ਗੁਦਾਮ ਖਾਲੀ ਕੀਤੇ ਜਾਣ। ਪਹਿਲਾਂ ਤੋਂ ਪ੍ਰਬੰਧ ਨਾ ਕਰਨ ਦੀ ਸਰਕਾਰ ਦੀ ਨਲਾਇਕੀ ਕਾਰਨ ਸਾਰੀ ਗੜਬੜ ਹੋਈ ਹੈ। ਪੰਜਾਬ ਸਰਕਾਰ ਆਪਣੀ ਨਲਾਇਕੀ ਨੂੰ ਛੁਪਾਉਣ ਲਈ ਸਾਰਾ ਕੁਝ ਹੀ ਕੇਂਦਰ ਸਰਕਾਰ ਤੇ ਸੁੱਟ ਰਹੀ ਹੈ। ਇਥੇ ਕੇਂਦਰ ਸਰਕਾਰ ਵੀ ਦੋਸੀ ਹੈ। ਕੇਂਦਰੀ ਖੁਰਾਕ ਏਜੰਸੀਆਂ ਨੂੰ 15 ਸਤੰਬਰ ਤੋਂ ਪਹਿਲਾਂ ਪਹਿਲਾਂ ਆਪਣਾ ਅਨਾਜ ਗੁਦਾਮਾਂ ਵਿੱਚੋਂ ਚੁੱਕ ਕੇ ਗੁਦਾਮ ਖਾਲੀ ਕਰਨੇ ਚਾਹੀਦੇ ਹਨ ਤਾਂ ਕਿ ਨਵਾਂ ਅਨਾਜ ਟਿਕ ਸਕੇ। ਹਰ ਵਾਰ ਕੁੱਤ ਕਲੇਸ ਹੁੰਦਾ ਹੈ। ਸਰਕਾਰਾਂ ਅਫਸਰਾਂ ਦੀ ਜੁੰਮੇਵਾਰੀ ਤਹਿ ਕਰਨ। ਜੁੰਮੇਵਾਰ ਅਫਸਰਸਾਹੀ ਨੂੰ ਤੁਰੰਤ ਸਸਪੈਂਡ ਕਰਕੇ ਲਾਲ ਐਂਟਰੀ ਮਾਰਨ ਤਾਂ ਕਿ ਕੰਮ ਨਾ ਕਰਨ ਵਾਲੇ ਮੁਲਾਜਮ ਤਰੱਕੀਆਂ ਨਾ ਲੈ ਸਕਣ।
