Ambasada e Republikës së Kosovës në Zagreb

18/06/2026

Diplomati i Ambasadës së Republikës së Kosovës në Republikën e Kroacisë, dr. Mentor Tahiri, mori pjesë në ceremoninë solemne të hapjes së Konsullatës së Nderit të Republikës së Sllovakisë në Osijek, e organizuar me ftesë të Ambasadës së Republikës së Sllovakisë.

Me këtë rast, z. Tahiri u prit nga Konsullja e Nderit e Republikës së Sllovakisë në Osijek, znj. Sandra Kralj Vukšić, e cila shprehu kënaqësinë për praninë e përfaqësuesve diplomatikë dhe institucionalë në këtë ngjarje të rëndësishme.

Ceremonia mblodhi përfaqësues të trupit diplomatik, autoritete lokale dhe rajonale, si dhe personalitete të jetës publike dhe ekonomike, duke dëshmuar rëndësinë që ka zgjerimi i rrjetit konsullor në forcimin e bashkëpunimit ndërkombëtar.

Hapja e Konsullatës së Nderit të Republikës së Sllovakisë në Osijek përfaqëson një hap të rëndësishëm në avancimin e marrëdhënieve ndërmjet Republikës së Sllovakisë dhe Republikës së Kroacisë, si dhe në promovimin e bashkëpunimit ekonomik, kulturor dhe institucional në rajonin e Slavonisë. Njëkohësisht, kjo nismë kontribuon në forcimin e pranisë diplomatike dhe në krijimin e urave të reja të bashkëpunimit ndërmjet institucioneve, komuniteteve të biznesit dhe qytetarëve të të dy vendeve.

Pjesëmarrja e përfaqësuesit të Ambasadës së Republikës së Kosovës në këtë ngjarje është dëshmi e marrëdhënieve të mira me partnerët diplomatikë në Kroaci dhe e përkushtimit për të mbështetur nismat që kontribuojnë në dialogun, bashkëpunimin dhe zhvillimin e marrëdhënieve ndërkombëtare në rajon.

16/06/2026

Ambasadori i Republikës së Kosovës në Republikën e Kroacisë, Dr. Martin Berishaj, u takua me Kryetarin e Bashkisë së Bjelovarit, Dario Hrebak

Ambasadori i Republikës së Kosovës në Republikën e Kroacisë, Dr. Martin Berishaj, u takua sot me Kryetarin e Bashkisë së Bjelovarit, Dario Hrebak, me të cilin diskutoi për pozitën e komunitetit shqiptar në rajonin e Bjelovarit dhe mundësitë e forcimit të mbështetjes institucionale për aktivitetet e tyre kulturore, arsimore dhe shoqërore.

Gjatë bisedës së përzemërt dhe përmbajtësore, vëmendje e veçantë iu kushtua rëndësisë së ruajtjes së identitetit kombëtar, gjuhës dhe trashëgimisë kulturore të shqiptarëve që jetojnë në Bjelovar dhe rrethinë. Bashkëbiseduesit theksuan se përfshirja aktive e pjesëtarëve të pakicave kombëtare në jetën shoqërore të komunitetit lokal përbën një kontribut të rëndësishëm në dialogun ndërkulturor, kohezionin shoqëror dhe zhvillimin e përgjithshëm të qytetit.

Ambasadori Berishaj e falënderoi Kryetarin Hrebak për gatishmërinë dhe hapjen ndaj bashkëpunimit, duke shprehur bindjen se Bashkia e Bjelovarit do të vazhdojë të ofrojë mbështetje institucionale për projektet që kontribuojnë në ruajtjen e identitetit dhe forcimin e pozitës së komunitetit shqiptar.

Nga ana e tij, Kryetari Hrebak rikonfirmoi përkushtimin e Bashkisë së Bjelovarit për promovimin e vlerave të multikulturalizmit, respektit të ndërsjellë dhe barazisë së të gjithë qytetarëve, duke theksuar se komuniteti shqiptar përbën një pjesë të rëndësishme dhe të çmuar të jetës shoqërore të qytetit.

Në takim u shpreh gjithashtu gatishmëria për thellimin e mëtejshëm të bashkëpunimit ndërmjet institucioneve të Republikës së Kosovës dhe Bashkisë së Bjelovarit përmes iniciativave kulturore, arsimore dhe ekonomike me interes të përbashkët.

06/06/2026

Të dashur shtetas të Republikës së Kosovës,

Ju njoftojmë se Qendra e Votimit në Ambasadën e Republikës së Kosovës në Zagreb është hapur në ora 07:00 dhe procesi i votimit po zhvillohet sipas planifikimit.

05/06/2026

Zëvendësministri i Mbrojtjes, Gegë Lleshi me bashkëpunëtorë mori pjesë në Konferencën Ndërkombëtare ASDA 2026 në Zagreb dhe zhvilloi aktivitete zyrtare në Kroaci

Zëvendësministri i Mbrojtjes i Republikës së Kosovës, z. Gegë Lleshi, së bashku me bashkëpunëtorët e tij, mori pjesë në Konferencën Ndërkombëtare të Mbrojtjes dhe Sigurisë ASDA 2026, e mbajtur në Zagreb të Kroacisë, një nga ngjarjet më të rëndësishme rajonale dhe evropiane në fushën e mbrojtjes, sigurisë dhe industrisë ushtarake.

Konferenca mblodhi përfaqësues të institucioneve shtetërore, forcave të armatosura, industrisë së mbrojtjes dhe ekspertë të sigurisë nga vende të ndryshme të botës. Ceremonia e hapjes u adresua nga Sekretari Shtetëror i Ministrisë së Mbrojtjes së Republikës së Kroacisë, Tomislav Galić, i cili theksoi rëndësinë e bashkëpunimit ndërkombëtar dhe të shkëmbimit të përvojave për përballimin e sfidave bashkëkohore të sigurisë.

Gjatë punimeve të konferencës, vëmendje e veçantë iu kushtua transformimit të industrisë së mbrojtjes përmes teknologjive të avancuara, inteligjencës artificiale, sistemeve autonome dhe dronëve, të cilat po ndryshojnë në mënyrë rrënjësore konceptin e operacioneve moderne ushtarake. Gjithashtu, u diskutua për menaxhimin e spektrit elektromagnetik, zhvillimin e industrisë vendore të mbrojtjes, investimet në kërkim dhe zhvillim, si dhe ndërlidhjen ndërmjet teknologjive të mbrojtjes dhe sektorit hapësinor.
Në margjina të takimit delegacioni u takua me kadetë nga Kosova si dhe gjeneral te luftës atdhetare në Kroaci.
Në kuadër të vizitës në Kroaci, delegacioni i Ministrisë së Mbrojtjes vizitoi edhe Vukovarin, qytetin simbol të qëndresës dhe sakrificës së popullit kroat gjatë Luftës së Pavarësisë së Kroacisë. Gjatë kësaj vizite u nderua kujtimi i viktimave dhe u theksua rëndësia e ruajtjes së memories historike, e cila shërben si themel për paqen, lirinë dhe stabilitetin në rajon.

Po ashtu, Zëvendësministri Lleshi zhvilloi një takim të veçantë me Dom Marjan Lorencin, fratin e Popullit, i cili gjatë Luftës së Kosovës qëndroi pranë qytetarëve dhe dha një kontribut të çmuar humanitar e shpirtëror në mbështetje të popullatës civile.
Gjatë takimit u vlerësua lart roli i Dom Marjan Lorencit në periudhën e luftës, ndërsa në emër të Ministrit të Mbrojtjes, z. Ejup Maqedonci, Zëvendësministri Lleshi i dorëzoi atij një dhuratë simbolike në shenjë mirënjohjeje për guximin, përkushtimin dhe qëndresën e treguar gjatë viteve të vështira të luftës në Kosovë.
Duke ndërlidhur përvojat historike të Kosovës dhe Kroacisë, Zëvendësministri Lleshi theksoi se kujtesa për sakrificën, solidaritetin dhe humanizmin mbetet një vlerë e përbashkët e dy popujve dhe një bazë e rëndësishme për forcimin e marrëdhënieve ndërmjet dy vendeve.
Pjesëmarrja në ASDA 2026, vizita në Vukovar dhe takimet e zhvilluara gjatë qëndrimit në Kroaci përbëjnë një mundësi të rëndësishme për forcimin e bashkëpunimit ndërinstitucional,
shkëmbimin e përvojave dhe avancimin e partneritetit ndërmjet Republikës së Kosovës dhe Republikës së Kroacisë në fushën e mbrojtjes dhe sigurisë.

30/05/2026

26/05/2026

Ambasada e Republikës së Kosovës në Kroaci uron përfundimin me sukses të programit “Defense Diplomacy Course”, i mbajtur nga 13 prilli deri më 26 maj 2026 në Akademinë e Mbrojtjes “Franjo Tuđman” në Zagreb.

Përgëzojmë Nënkolonel Agron Murati dhe Nënkolonel Ilir Beqiri për angazhimin dhe suksesin e treguar gjatë këtij programi profesional, i cili kontribuon në avancimin e kapaciteteve në fushën e diplomacisë së mbrojtjes dhe forcimin e bashkëpunimit ndërkombëtar.

Ky trajnim paraqet një dëshmi të përkushtimit profesional të pjesëtarëve të institucioneve tona të sigurisë dhe mbrojtjes, si dhe të partneritetit të shkëlqyer ndërmjet Republikës së Kosovës dhe Republikës së Kroacisë.

Urime dhe suksese të mëtejshme!

25/05/2026

AMBASADORI DR.BERISHAJ, MBAJTI LIGJERATË PARA DIPLOMATËVE TË RINJ KROAT

Ambasadori i Republikës së Kosovës në Zagreb, Dr. Martin Berishaj, pati kënaqësinë që para diplomatëve të rinj dhe stafit të Ministrisë Kroate për Punë të Jashtme dhe Evropiane, respektivisht në Akademinë Diplomatike Kroate, të mbajë një ligjëratë mbi rrugëtimin historik, politik, shoqëror dhe ushtarak të Kosovës, nga përpjekjet shumëvjeçare për liri dhe shtetformim deri te shpallja e pavarësisë dhe konsolidimi i tanishëm.

Në paraqitjen e tij, Ambasadori Berishaj foli për dimensionin historik të çështjes shqiptare në Ballkan, duke theksuar se Shteti i Kosovës përfaqëson një kompromis historik të shqiptarëve, të cilët padrejtësisht mbetën të ndarë në disa shtete, megjithatë arritën të ruajnë identitetin kombëtar, orientimin perëndimor dhe aspiratën e pandërprerë për liri, demokraci dhe integrim euro-atlantik. Ai potencoi se rrugëtimi i Kosovës nuk mund të kuptohet pa sakrificën kolektive të qytetarëve të saj dhe pa përkrahjen e aleatëve.

Ambasadori ndaloi veçanërisht tek sfidat aktuale gjeopolitike në Ballkan, duke folur për praninë dhe ndikimin destabilizues të faktorëve pro-rusë në rajon. Në këtë kontekst, ai vlerësoi se politikat hegjemone dhe narrativat nacionaliste të trashëguara nga regjimi i Millosheviqit vazhdojnë të manifestohen edhe sot përmes politikave të pushtetit në Serbi, të cilat, sipas tij, paraqesin rrezik për stabilitetin afatgjatë, sigurinë rajonale dhe perspektivën euro-atlantike të Ballkanit Perëndimor.

Duke folur për marrëdhëniet ndërmjet Republikës së Kosovës dhe Republikës së Kroacisë, Ambasadori Berishaj theksoi se ato janë marrëdhënie të shkëlqyera, miqësore dhe strategjike, të ndërtuara jo vetëm mbi bashkëpunimin modern diplomatik e institucional, por edhe mbi një taban të fuqishëm historik, përvoja të përbashkëta dhe mirëkuptim të ndërsjellë ndërmjet dy popujve. Ai nënvizoi mbështetjen e vazhdueshme që Kroacia i ka dhënë Kosovës në proceset shtetformuese, integruese dhe ndërkombëtare.

Në vijim, Ambasadori foli edhe për rëndësinë strategjike të bashkëpunimit në fushën e sigurisë dhe mbrojtjes ndërmjet Republikës së Kosovës, Republikës së Shqipërisë dhe Republikës së Kroacisë, duke e cilësuar këtë bashkëpunim si një perimetër të rëndësishëm sigurie dhe stabiliteti në rajon. Sipas tij, forcimi i aleancave ndërmjet vendeve që ndajnë vlera demokratike dhe orientim euro-atlantik është thelbësor për të parandaluar depërtimin e ndikimeve destabilizuese ruse dhe për të garantuar paqe, stabilitet dhe siguri afatgjate..

Ligjërata u prit me interes të veçantë nga diplomatët e pranishëm kroatë, të cilët shtruan pyetje të shumta dhe zhvilluan diskutime lidhur me rrugëtimin historik të Kosovës, proceset shtetformuese, zhvillimet aktuale politike dhe sfidat e sigurisë me të cilat përballet sot rajoni. Interes i veçantë u tregua edhe për perspektivën euro-atlantike të Ballkanit Perëndimor, raportet rajonale dhe rolin e Kosovës në ruajtjen e stabilitetit dhe sigurisë në Evropën Juglindore.

23/05/2026

Pjesëmarrje në manifestimin “Dita e Pakicave Kombëtare të Qytetit dhe Prefekturës së Varazhdinit”

Më date 23 Maj, Ambasada e Republikës së Kosovës në Zagreb, mori pjesë në manifestimin “Dita e Pakicave Kombëtare të Qytetit dhe Prefekturës së Varazhdinit”, organizuar me rastin e “Ditës Botërore të Diversitetit Kulturor për dialog dhe ahvillim”.

Ambasadën e Republikës së Kosovës e përfaqësuan diplomati Tahiri dhe atasheu Kuqi, të cilët ndoqën nga afër programin kulturor dhe aktivitetet e komuniteteve që veprojnë në këtë rajon të Kroacisë.

Në kuadër të manifestimit u prezantua edhe komuniteti shqiptar i Qytetit dhe Prefekturës së Varazhdinit, udhëhequr nga Përfaqësuesi Shqiptar në Varazhdin z.Ali Rexhaj, duke kontribuar në promovimin e kulturës, traditës dhe identitetit shqiptar në një atmosferë miqësie dhe bashkëjetese multikulturore.

Pjesë e programit artistik ishte edhe SHKA “Shkëndija” nga Zagrebi, nën udhëheqjen e znj.Gentiana Lleshdedaj, e cila u paraqit me valle dhe interpretime tradicionale shqiptare, të mirëpritura nga publiku i pranishëm.

Manifestimi mblodhi përfaqësues të komuniteteve shqiptare, sllovene, serbe, rome, ukrainase dhe komuniteteve të tjera, duke dëshmuar rëndësinë e dialogut ndërkulturor dhe bashkëjetesës në shoqërinë kroate. Përmes muzikës, valleve dhe gastronomisë tradicionale, pjesëmarrësit promovuan diversitetin kulturor dhe forcimin e lidhjeve ndërmjet komuniteteve që jetojnë në Kroaci.

Pjesëmarrja e Ambasadës së Republikës së Kosovës në këtë aktivitet paraqet mbështetje për komunitetin shqiptar në Kroaci dhe përpjekjet e tij në ruajtjen dhe promovimin e identitetit kulturor shqiptar në jetën publike dhe kulturore të vendit.

Në kuadër të aktiviteteve që u mbajtën nën organizimin e Qytetit dhe Prefekturës së Varazhdinit, përfaqësuesit e Ambasadës së Republikës së Kosovës realizuan një bashkëbisedim me të parin e Prefekturës z..Anđelko Stričak dhe Kryesuesin e Kuvendit të Prefekturës z.Krunoslav Lukačić.

23/05/2026

Në kuadër të edicionit të pestë të Festivalit të Librit në Matica Hrvatska, u promovua romani i shkrimtarit të njohur shqiptar Stefan Çapaliku “Gjithkush çmendet në mënyrën e vet”, e perktheyer ne gjuhen kroate (Svako poludi na svoj način)një vepër që sjell me finesë artistike dhe ironi therëse dramat e individit bashkëkohor përballë absurditetit të jetës, tranzicionit dhe krizave të identitetit njerëzor.

Promovimi u zhvillua në ambientet e Matica Hrvatska në Zagreb, në praninë e dashamirësve të librit, studiuesve, përkthyesve dhe personaliteteve të jetës kulturore shqiptare dhe kroate. Gjatë diskutimit u theksua se romani i Çapalikut paraqet një reflektim të thellë mbi shoqërinë moderne, ku personazhet përballen me vetminë, çmendurinë e përditshme dhe kërkimin e kuptimit në një realitet shpesh kontradiktor.

Vepra u vlerësua për gjuhën e saj të pasur letrare, strukturën narrative origjinale dhe mënyrën se si autori arrin të ndërthurë humorin, groteskun dhe tragjiken në një univers artistik autentik. U theksua gjithashtu rëndësia e promovimit të letërsisë shqipe në hapësirën kulturore kroate dhe roli i saj në forcimin e dialogut kulturor ndërmjet dy popujve.

Promovimi i romanit “Gjithkush çmendet në mënyrën e vet” konfirmoi edhe një herë vendin e rëndësishëm që zë Stefan Çapaliku në letërsinë bashkëkohore shqiptare, si një autor me zë origjinal dhe me ndjeshmëri të veçantë ndaj realitetit njerëzor dhe shoqëror.

22/05/2026

Shfrytëzoni të drejtën tuaj për të votuar përmes postës nga 21 maji deri më 6 qershor 2026.
Adresa e kutisë postare në Republiken e Kroacisë për votuesit e regjistruar jashtë Kosovës për votim me postë në zgjedhjet e parakohshme për Kuvendin e Republikës së Kosovës është:

KQZ - Zgjedhjet Veleposlanstvo Republike Kosovo P. P. 510 10001 Zagreb