04/11/2025
https://www.facebook.com/share/17o9T3E3Jj/
▃ ▂ ▁ 你夠唔夠膽食？英國堆填區「種菜」計劃 ▁ ▂ ▃
垃圾堆填區可以變身做農場？🥦🌱 你以為堆填區淨係可以處理垃圾？錯啦！雖然好難想像，但現時嘅堆填區已經有好多新用途，甚至可以種菜！英國威爾特郡（Wiltshire）推出咗「全球首創」堆填區温室種植計劃👨🌾。呢個項目除咗減碳，仲為當地人帶嚟新鮮又供應穩定嘅農產品。但問題係：你敢唔敢食😆😆？
✺ 🤔堆填區點樣可以種菜？ ✺
聽到「堆填區種菜」未免有啲嚇人，但其實唔係直接喺垃圾堆上面種植。原理係利用堆填區產生嘅氣體作能源，喺場地內設置温室種植水果同蔬菜🍎。計劃由英國廢物處理公司 Crapper & Sons Landfill Limited 主導，根據官方資料，做法係先平整堆填區部分區域，再建成有混凝土內襯嘅坑槽，用作安全存放垃圾並收集其分解出嚟嘅甲烷。
甲烷係一種強效温室氣體，如果任由佢哋排放，會大大加劇氣候變化🏭。但與此同時，甲烷都係高效燃料，所以回收後係一種寶貴資源。呢個堆填區種菜大計會先收集從垃圾釋出嘅甲烷，去除當中嘅雜質同細菌後，氣體可以用嚟發電同產熱🔥。呢啲能源可以用嚟為温室加熱，令嗰到一年四季都變得適宜耕種，提升農作物產量🌾。而產電排放出嚟嘅二氧化碳則被導入温室，為水果與蔬菜進行光合作用提供額外養分。換句話講，垃圾氣體變成推動農業嘅資源，一啲嘢都冇嘥到😎！
✺ 環保效益有幾大？✺
計劃嘅願景係雙重：社區同環境都受惠。温室會種植番茄、綠葉蔬菜，甚至係英國較少商業種植嘅牛油果 🥑，再賣畀周邊居民。長遠仲想將當地嘅廚餘攞返去堆填區處理，繼而生產較平價嘅電力。呢個計劃目標係滿足當地約八成蔬果需求，減少從外地進口食品嘅長途運輸排放；而捕獲嘅堆填氣體經淨化後用作發電⚡️，為當地企業提供低過電網成本嘅電力。根據官方公布數字，項目每年可減少約 3,800 噸二氧化碳排放，相當於約 600 架汽車一年排放量，一舉兩得🚗。
✺ 香港例子：堆填區生產燃料 ✺
香港都有大片堆填區，類似嘅轉廢為能方案有冇得諗💭？其實早喺 1999 年起，Towngas 已開始喺堆填區設置沼氣處理站，將淨化嘅生物沼氣經地底喉管輸送至煤氣公司生產廠房應用。依家佢哋喺將軍澳堆填區推展嘅「綠氫」項目☘️，都係用到堆填嘅生物沼氣，轉化佢做氫氣，實現「轉廢為能」♻️，預計2026年首季呢啲本地製綠氫就會面世啦！
雖然香港暫時未有「堆填區種菜」計劃，但如果有朝一日，當你遇到一粒「堆填區番茄仔」🍅，唔好嚇親，放心開餐啦！
———
◑ 能量，是物理學上推動改變的源動力。立即追蹤「能源百科」，推動我們繼續發布更多好的內容！
#堆填區種菜 #轉廢為能 #能源百科 #智慧城市 #智慧能源
