თბილისის ტელეანძა — დამოუკიდებლად მდგომი სტრუქტურა საკომუნიკაციო მიზნებისთვის აშენდა 1955 წელს; მდებარეობს თბილისში, მთაწმინდაზე.
1972 წელს მოხდა პირველი ანძის დემონტაჟი, რომელიც გადატანილ იქნა ქალაქ გორთან, ხოლო მის ადგილას თანამედროვე ანძა აშენდა. ტელეანძას „საქართველოს ტელერადიოცენტრი“ მართავს, რომელიც 1955 წელს დაარსდა. ანძის საკომუნიკაციო სისტემები მოიცავს ტრანსლირებას, MMDS, პეიჯერსა და მობ
ილურ გადამცემებს და კომერციულ ტელევიზიას. საქართველოს ტელერადიოცენტრი ექსპლოატაციას უწევს 36 ანძას, რომელთა საშუალებით საშუალებით ტელე-რადიო, სატელეფონი თუ სხვა საკომუნიკაციო სიგნალი მიეწოდება ქვეყნის მოსახლეობას. ანძის სიმაღლეა 274,5 მ / 901 ფუტი და ზღვის დონიდან 719,2 მეტრის სიმაღლის მთაზე დგას.
საქართველოს ტელერადიოცენტრი ემსახურება 30-ზე მეტ რადიო და 16 ტელეკომპანიას. მისი საშუალებით ვრცელდება საქართველოს საზოგადოებრივი მაუწყებლის, რუსთავი 2-ს, იმედის და სხვა სამაუწყებლო კომპანიების სიგნალები საქართველოს მთელ ტერიტორიაზე.
ქვეყნის ტერიტორიაზე მაუწყებლობა რეგულირდება საქართველოს კომუნიკაციების ეროვნული კომისიის მიერ, რომელიც მუდმივმოქმედ დამოუკიდებელ სახელმწიფო ორგანოს წარმოადგენს და არც ერთ სახელმწიფო უწყებას არ ექვემდებარება. კომისია სახელმწიფო ბიუჯეტიდან არ ფინანსდება, მისი შემოსავლის წყარო ელექტრონული კომუნიკაციების და მაუწყებლობის სფეროში ავტორიზებული პირების და ლიცენზიის მფლობელი ორგანიზაციების მიერ გადახდილი რეგულირების საფასურია.
