Biiroo Carraa Hojii Uumuufi Ogummaa Oromiyaa

09/06/2026

Xiinxala raawwii hojiiwwan Biiroo Carraa Hojii Uumuufi Ogummaa Oromiyaa waggoottan jahan darbanii (2013-2018) fi Karoora misoomaa waggoottan shanan dhufanii (2019- 2023) irratti marii'atame.

Waxabajjii 02, 2018 (Komn.BCHUOO)- Biiroon Carraa Hojii Uumuufi Ogummaa Oromiyaa xiinxala raawwii hojiiwwan isaa waggoottan jahan darbanii (2013-2018) fi marii karoora misoomaa waggoottan shanan dhufanii (2019- 2023) miseensota manaajimantii biirichaa waliin gaggeessaa jira.

Kaayyoo waltajjichaa kan ibsan Hogganaa Ittaanaan Biiroo Carraa Hojii Uumuufi Ogummaa Oromiyaa obbo Waasihuun Golgaa, waltajjichi raawwii sekterichaa waggoottan jahan darbanii gamaggamuudhaan karoorri misoomaa waggoottan shanan dhufanii bifa ragaa qulqulluu irratti hundaa'een, haala qabatamaa jiru giddugaleeffateefi imala ce'umsa naannichaa sadarkaa ittaanutti ceesisuuf dandeessisuun akka qophaa'u taasisuu irratti kan xiyyeeffate ta'uu himaniiru.

Waltajjicha irrattis gabaansi raawwii Agarsiistota Hojiilee Ijoo sekterichaa waggoottan jahan darbaniifi karoorri misoomaa waggoottan shanan dhufanii qophaa'e, akkasumas Wixineen Qajeelfama Carraa Hojii Ogummaan Durfamu Uumuuf qophaa'e dhiyaatee bal'inaan irratti marii'atamaa jira.

Hirmaattonni waltajjichaas karoorri sekterichaa qajeeltoo qophii karooraa bara 2019 imala galma utaalchoo qabame giddugaleeffachuun akka qophaa'u gochuufi wixinee qajeelfamichaas yaadota galtee ta'aniin gabbisuu akka qaban obbo Waasihuun kallattii kaa'aniiru.

Odeeffannoo haaraa argachuuf:
Tiiktookii keenya: https://vm.tiktok.com/ZMH3f9RdAj8Eb-l5CPk/
Feesbuukii keenya: https://www.facebook.com/BCHUOO
Teeleegraamii: https://t.me/OJCVBureau
Yuutuubii: https://www.youtube.com/
Weebsaayitii: https://www.ojocv.gov.et/
E-mail: [email protected]

09/06/2026

Dhaweeyyii Oromiyaa

09/06/2026

09/06/2026

Mootummaan Naannoo Oromiyaa indaastirii godoo akka bu’uura ce’umsa indaastiriifi birmadummaa dinagdee Oromiyaatti ilaaluun, sadarkaa tarsiimoo olaanaatti hojii ijaarsa sirnaafi haala dandeessisoo umuurratti hojii bal’aa hojjachaa jira. ~ Shimallis Abdisaa, Pirezidaantii MNO

Yeroo dheeraaf indaastiriin godoo akka hojii harkaa gara afaanii jeejee itti dabarfachuuf qofa hojjatamuutti ilaalamaa ture. Ilaalchi kun humna omishaa guddaa maatiifi hawaasa keenya keessatti dhokatee jiru akka hindagaagne, ogummaafi dhaweessummaanis akka hinguddanne taasiseera.

Har’a garuu kallattiin sun jijjiirameera. Indaastiriin godoo hojii xiqqaafi bittinnaa’aa qofa osoo hintaane, akka bu’uura ce’uumsa indaastiriifi birmadummaa diinagdee Oromiyaatti ilaalamaa jira. Mootummaan Naannoo Oromiyaa damee kana sadarkaa tarsiimoo irratti olkaasuun, hojii ijaarsa sirnaa irratti hundaa’e bal’inaan gaggeessaa jira.

Damichi yeroo dheeraaf rakkoolee hedduun marfamee ture. Haata’u malee, mootummaa naannichaatiin bara 2012 irraa eegalee imaammataafi tarsiimoo diriirsuun, waggoota afuriif hojii haala dandeessisoo uumu irratti xiyyeeffate bal’inaan hojjachaa tureera. Bu’uura kanaan sheedonni hojiifi wiirtuuleen omishaa bal’inaan ijaaramanii, omishtoonni kilaastaraan gurmaa’uun hojii isaanii bu’a qabeessa taasisuuf haalli mijataan umameera.

Hojii kanaan, sektaroota 12 keessatti sheedota hojii kuma 37 ol ijaaranii omishtoota kilaastara hojii kuma 9 ol keessatti gurmeessuun danda’ameera. Kunis namoota kuma lama qofaaf carraa hojii umuu irraa ka'uun, har'a lammiilee miliyoona tokkoofi kuma dhibba tokkoofi shantama (1.15 million) oliif carraa hojii umuu danda'eera.

Madda faayinaansii furuufis tarkaanfilee gurguddoon fudhatamaniiru. Baankii Siinqee waliin ta'uun, liqiiwwan baankichi kennu keessaa dhibbeentaan 75 dhaabbilee xixiqqaafi giddu-galeessaaf akka oolu taasifameera. Dabalataan, Dhaabbanni Siinqee Liizii hundeeffamuun meeshaalee kaappitaalaafi teekinooloojii dhiyeessuuf hojii guddaa hojjachaa jira. Ji'oota kudhan darban qofa keessatti waldaaleefi intarpiraayizoota 836’f meeshaaleen kaappitaalaa Birrii bil. 3 olitti tilmaamamu kan dhiyaate yoota'u, walumaagalatti hanga ammaatti waldaalee 2,400 ta’aniif meeshaaleen Birrii bil. 5.7 olitti tilmaamamu dhiyaateera. Oromiyaan indaastirii alaa eeguu dhiisteen, qabeenya umamaafi humna hojii ummata ishee irratti hundaa’uun bu’uura indaastirii keessaa ofdanda'e ijaaraa jirti.

09/06/2026

Godina Booranaatti Ji'oottan 11n darbe namoota kuma 42 oliif carraan hojiin uumamuu Waajjiri Carraa Hojii Uumuufi Ogummaa Godina Booranaa beeksise

Waxabajjii 01, 2018 - Tarsiimoo carraa hojii ogummaan durfamuufi ittifufiinsa qabu bal'innaan uumuu qabamee hojjatamaa jiruun namoota hojii barbaadan kuma 56fi 560 calalamanii adda bahan keessaa kuma 42fi 900 oliif carraan hojii uumameera jedhe waajjirri Carraa Hojii Uumuufi Ogummaa godinichaa.

Carraan hojii kunis sektaraalee qonnaa jalatti furdisa loonii, looni aananii, horsiisa lukkuu, kanniisaa, daldala re'ee, loonii, lafa qonnaafi omisha nyaata horiirratti kan umameedha.

Bifuma walfakkaatuun tajaajilafi industirii godoo jalatti immoo dhiyeessii aananii, bunaaf shaayii, turizimii, hoteelaa, omisha albuudaafi tajaajila geejjibaa, hojii mukaafi sibiilaa, hodhaa huccuu, rifeensa tolchuu, omishaafi dhiyeessi meeshaalee faaya aadaarratti carraan hojii kun umamuu Ittigaafatamaan Waajjirichaa Obbo Moluu Dureettii himaniiru.

Namoota carraan hojii uumameef kana hojiitti galchuun dura leenjiin gaggabaabaafi leenjiin intarpiriinarummaa sadarkaa adda addaatti kennameefi qusannaa dhibbeentaa 10 ergaa qusatanii liqiin qarshii miliyoona 411fi kuma 219 olii kennamuufii Obbo Moluun dubbataniiru.

Waliigalatti bara kana Godinichatti qusannaan hawaasaa qarshiin miliyoona 589fi kuma 538 olii baankii siinqeetti taasifamee jiraachuus Obbo Moluun dabalataan himaniiru.

Kominikeeshinii Godinichaa

06/06/2026

06/06/2026

Qophiin kun Sagantaa "Hojiifi Ogummaa" Walta'iinsa Biiroo Carraa Hojii Uumuufi Ogummaa Oromiyaa fi OBN'tiin torbanitti yeroo tokko guyyaa Kamisaa galgala sa'aatii 2:40 irraa eegalee dhiyaatudha.

Hojiilee misooma ogummaafi Kalaqa Teekinooloojii Kolleejjii Poolii Teeknika Haroomaayaafi KLTO Baabbileetti hojjetamaa jiran irratti xiyyeeffate. Bara 2018.

05/06/2026

Dhaabbileen leenjii yaadama kolleejjii intarpiraayiziin galii keessoo isaanii cimsuun olitti qulqullina leenjii mirkaneessuuf akka meeshaa ijootti itti fayyadamuu qabu- obbo Nasraddin Qaadii.

Caamsaa 28, 2018 (Komn.BCHUOO)- Hogganaa Ittaanaan Biiroo Carraa Hojii Uumuufi Ogummaa Oromiyaa obbo Nasraddin Qaadii, Kolleejjii Poolii Teeknika Boqojjiitti hojiilee kenniinsa leenjiifi yaadama Kolleejjii intarpiraayizii milkeessuuf hojjetamaa jiran daawwataniiru.

Daawwannaa gaggeeffameenis kolleejjichatti leenjifamtoota ogummaa oomisha midhaanii leenji'aa jiraniif yaadama kolleejjii intarpiraayizii milkeessuuf oomishaalee kuduraafi muduraa gaggeeffamaa jiran irratti leenjiin gochaa qabatamaan kennamaa jiru qulqullina leenjii mirkaneessuu keessatti qooda olaanaa qabaachuu obbo Nasraddin himaniiru.

Dhaabbileen leenjiis yaadama kolleejjii intarpiraayizii hojiirra oolchuuf hojiilee hojjetan galii keessoo isaanii cimsuun olitti qulqullina leenjii mirkaneessuuf akka meeshaa ijootti itti fayyadamuu akka qaban dhaamaniiru.

Odeeffannoo haaraa argachuuf:
Tiiktookii keenya: https://vm.tiktok.com/ZMH3f9RdAj8Eb-l5CPk/
Feesbuukii keenya: https://www.facebook.com/BCHUOO
Teeleegraamii: https://t.me/OJCVBureau
Yuutuubii: https://www.youtube.com/
Weebsaayitii: https://www.ojocv.gov.et/
E-mail: [email protected]

04/06/2026

Kolleejjii Poolii Teeknika Jimmaatti hojiileen misooma ogummaafi yaadama Kolleejjii intarpiraayizii milkeessuuf hojjetamaa jiran daawwataman.

Caamsaa 27, 2018 (Komn.BCHUOO)- Kolleejjii Poolii Teeknika Jimmaatti hojiileen misooma ogummaafi yaadama Kolleejjii intarpiraayizii milkeessuuf hojjetamaa jiran daawwatamaniiru.

Sagantaa daawwannaa kanarrattis Ittigaafatamaan Waajjira Kilaastara Magaalaa Oromiyaa obbo Mulugeetaa G/Hiyoot, Hogganaa Ittaanaan Biiroo Carraa Hojii Uumuufi Ogummaa Oromiyaa obbo Habtaamuu Kaasaafi qaamoleen garaagaraa hirmaataniiru.

Sagantaa daawwannaa kanaanis yaadama Kolleejjii intarpiraayizii milkeessuun galii kolleejjichaa guddisuuf lafa kolleejjichaa irratti sheedii balbala 34 qabu ijaaramee qarshii miliyoona 2 olitti kireeffamee jiru, horsiisa horii aannanii, hojii mukaafi misooma kuduraaf maduraa gaggeeffamaa jiru daawwatameera.

Akkasumas hojiileen kenniinsa leenjii, dhiheessii maashinoota adda addaa, hojii Dijiitaalaayizeeshiniifi magariisummaa BLTO, hojiin ceehumsa baadiyaatiif manneen moodela ijaaruun jiruuf jireenya hawaasa keenyaa jijjiiruuf omisha maashina xuubiifi xuubilee omishamanii hojiin ittin jalqabameefi hojiin Giddugala Kalaqaafi Cehumsa Teekinooloojiitti omisha riqaa rarra'aa hojjetamaa jiru daawwatameera.

Kana malees, hojiin incubation center mooraa kolleejjii keessatti intarpiraayizoonni hojii oomisha mismaaraa, zayita oomishuu, Saamunaa oomishuu, huccuu hodhuufi teekinooloojii baay'isuun walqabatee hojjetamaa jiran daawwatamaniiru.

Odeeffannoo haaraa argachuuf:
Tiiktookii keenya: https://vm.tiktok.com/ZMH3f9RdAj8Eb-l5CPk/
Feesbuukii keenya: https://www.facebook.com/BCHUOO
Teeleegraamii: https://t.me/OJCVBureau
Yuutuubii: https://www.youtube.com/
Weebsaayitii: https://www.ojocv.gov.et/
E-mail: [email protected]

03/06/2026