08/11/2023
Waxaan ka soo laabtay kormeer aan ku tagay 3da Gobol ee Koonfureed ee Deegaanka Soomaalidda ee fataahadda wabiyaddu saameeyeen: Liibaan, Afdheer, iyo Shabeele. Xukuumadda iyo hay’adaha ay khuseeyso ee Dawladda Fadaraalku waxay ilaa hadda qabteen hawlo badan oo lagu samatabixiyay dadkii halista ugu badan ku jiray. Waxaa socda gurmadka dhanka raashinka, daawooyinka, iyo agabka iyo gogosha kala duwan ee ay u baahan yihiin dadka ka barakacay guryahooda.
Waxaa iyana ilaa maanta hawlgalay kooxo isku dhaf ah oo ka shaqayn doona sidii loo dayactiri lahaa jidadka go’ay. Waxaa kale oo hawlgal bilaabi doonaa diyaaradaha qumaatiga u kaca oo ka qayb-qaadan doona daad-gureeynta dadka meelaha miyiga ah ku go’dooma, islamarkaana wixii degdeg ah ee loo baahan yahay gaadhsiin doona meelaha looga baahdo.
Waxaa horey xarumo cayiman sida Godey oo kale lagu sii diyaariyay raashin iyo agabka guryaha. Waxaa magaalooyinka Dollo-Ado, Jarati, iyo Qalaafo ku sugan guddiyo heer deegaan ah oo ka jawaabaya baahiyaha degdega ah ee shacabka. Mustaqbalka xal-waara waxaa noqon doona in dib loo eego qaabka dadku u dagan yahay wabiyadda dushooda iyo in la sameeyo dad leexin meelaha dadku ku badan yihiin.
Waxaan u mahadnaqayaa dhamaan shacabka ka qayb-qaatay taakuleeynta iyo martigalinta walaalahooda daadashu barakiciyeen. Waxaa kale oo aan aad ugu mahadnaqayaa Ciidanka Booliska Deegaanka iyo Ciidanka Qaranka oo kaalin wayn ka qaatay badbaadinta dadka saacadihii ugu horeeyay ee dhibaatadu dhacday, ilaa iyo hadana ku guda-jira hawlaha samatabixinta dadka fatahaaduhu saameeyeen.
W/Q: Mustafa Omar
