11/02/2025
🔴 𝑬𝑼 𝑷𝑹𝑶𝑷Ó𝑵 𝑼𝑵 𝑷𝑳𝑨𝑵 𝑬𝑿𝑻𝑹𝑨𝑶𝑹𝑫𝑰𝑵𝑨𝑹𝑰𝑶 𝑫𝑬 𝑳𝑰𝑴𝑷𝑬𝒁𝑨 𝑬 𝑴𝑨𝑵𝑻𝑬𝑴𝑬𝑵𝑻𝑶 𝑫𝑨𝑺 𝑩𝑬𝑰𝑹𝑨𝑹𝑹Ú𝑨𝑺 𝑫𝑬 𝑪𝑬𝑴𝑬𝑵𝑻𝑶 𝑬𝑵 𝑽𝑰𝑳𝑨𝑮𝑨𝑹𝑪Í𝑨
🔴 Esquerda Unida insta ao goberno local a aprobar un plan extraordinario de limpeza, mantemento e mellora das beirarrúas de cemento do concello, ante o preocupante estado de degradación e sucidade que presentan. O voceiro do Grupo Municipal trasladará esta petición ao goberno, alertando do risco para a seguridade peonil, especialmente en días de chuvia, debido á acumulación de verdín que fai as beirarrúas extremadamente esvaradías.
🔴 Vilagarcía está inmersa nunha transformación urbana baseada no modelo de cidade accesible, impulsado pola concelleira de urbanismo. Non obstante, a súa execución errada e a falta de mantemento transformaron as novas beirarrúas en espazos dominados polo cemento, cuxa limpeza insuficiente converte moitas rúas en zonas perigosas para a circulación peonil.
🔴 A deterioración destas superficies afecta directamente á calidade de vida da cidadanía, xerando un incremento das caídas e accidentes, sobre todo entre persoas maiores, rapazada e persoas con diversidade funcional. Esta situación limita o dereito destas persoas a desfrutar da cidade en igualdade de condicións e, ao mesmo tempo, contribúe a unha imaxe de abandono que prexudica o atractivo da cidade para residentes e visitantes.
🔴 EU reclama un plan urxente que inclúa accións de limpeza, mantemento e reparación das zonas máis deterioradas. Esta medida debe garantir que as beirarrúas sexan seguras, accesibles e transitables, protexendo á veciñanza de perigos evitables e facendo de Vilagarcía unha cidade máis inclusiva e cohesionada.
