29/08/2022
..
من الشائع إن #الإنسان له #روح واحدة .. وإن القطة ليها 7 أرواح (أو 9 حسب انت منين) ..
في الفكر الطبيعي والديني المصري كنظرة الإنسان للطبيعة ولذاته الإنسان مكون من 7 مكونات رئيسية (أو 9 حسب بتعدهم ازاي) ..
كلهم مهمين .. بس الإنسان عنده من كل مكون حاجة واحدة .. عنده جسم واحد .. واسم واحد .. وعقل (أو قلب) واحد .. وظل واحد .. وكا (شخصية مميزة) واحدة .. وبا (روح حياة) واحدة .. وبعد الموت حيبقى عنده «عفريت» (آخ) واحد ..
لكن الآلهة بقى .. لالالالا .. مستوى تاني خالص ..
الآلهة عندها كميات في مخازنها من كل حاجة .. VIP بقى ..
وخصوصا كميات من الكا والبا ..
خلونا ناخد #رع كمثال .. رع إله الشمس .. هو #الشمس نفسها .. رع يعني #شمس قبل ما يبقى معناها اسم الإله ..
رع عنده 14 كا .. 14 شخصية .. 14 صفة .. 14 وش أو 14 خاصية فيه .. تعالوا نقراهم:
1- كا پحتي = روح القدرة.
2- كا نخت = روح النصر.
3- كا وني = روح النور.
4- كا وسر = روح الغنى.
5- كا واچ = روح النجاح / روح النشاط.
6- كا چفا = روح الوفرة.
7- كا شپس = روح الوقار / روح الشرف.
8- كا وش = روح الدمار.
9- كا ماآو = روح البصر.
10- كا سپد = روح التأهب / روح المهارة.
11- كا چد = روح الثبات / روح الديمومة.
12- كا سچم = روح السمع.
13- كا سيا = روح الإحساس / روح الإدراك.
14- كا إبح (كا دپن) (؟) = روح التذوق.
----------------------
- ملحوظة: حتلاقوا في الكتب «كا وش» متترجمة «روح الدفن»، بس بالمنطق البسيط كده .. انت بتعدد صفات في إله .. إيه علاقة الدفن بالموضوع؟! .. يبقى الأقرب ليها «وش» يعني الدمار.
- ملحوظة كمان: الترجمة الأدق للجملة عنوان الصورة اللي فوق «پا مچ فدو (14) إن كا إن رع» هي «الـ 14 في روح رع» .. وهنا استخدموا أداة تعريف المفرد «پا» رغم إن الكلام على جمع .. لأن كل الـ 14 دول في النهاية هما واحد .. هما رع.
------------
#شير
