https://www.facebook.com/869825229540980/

رابطة خريجين أكاديمية أخبار اليوم الصفحة الرسميه, أكاديمية أخبار اليوم, 6 October City, 6 October City (2026)

31/05/2026

حوار / سهير شريف
عرفنا بنفسك ؟
انا اسمي مي

قسم ايه وخريج دفعه كام؟
صحافه ٢٠١٤

ايه أهم ذكرياتك في الاكاديميه ؟
ذكرياتي هي اصحابي وعشره عمري
كنت بتشارك في ندوات في إلاكاديميه أو انشطه واستفادت منها ايه ؟

كنت بحضر لاكن مكنتش بشارك😂

ايه اكتر ذكريات أو مواقف فاكره مع الدكاتره اثرت فيك ؟

مواقف مع الدكاتره كلها هزار وضحك وكانوا طيبين اوي ولذاذ

اشتغلت في كذا مكان قبل كده وبتشتغل فين دلوقتي ؟

مشتغلتش غير فتره صغيره
ودلوقتي شغاله عند بناتي😂

ايه رأيك في فكره رابطه الخريجين والصفحه ؟

فكره لذيذه وجديده بصراحه براڤوا عليكم

نصيحتك للطلبه الحاليين؟

نصيحتي ليهم مش هقولهم ذاكروا والجو ده بصراحه
ختيار الأصدقاء من أهم القرارات في حياتكم. اختاروا الأشخاص اللي يشجعوكم، يفرحوا لنجاحكم، ويدفعوكم للأمام.
لا تضيعوا وقتكم مع أشخاص لا يضيفون لكم شيئًا أو يبعدونكم عن أهدافكم.
الصديق الحقيقي هو الذي يساعدك أن تصبح نسخة أفضل من نفسك، وليس من يضيع وقتك أو يقلل من طموحك.
استثمروا وقتكم في التعلم، وفي الصحبة التي تدعم أحلامكم… لأن الوقت والصحبة هما ما يصنعان مستقبلك

31/05/2026

حوار / ابراهيم علاء
اسمك اي؟
محمد ابراهيم

قسم ايه ؟
قسم صحافة

خريج دفعة كام ؟
خريج دفعة ٢٠٢٥

شغال فين دلوقتي ؟
شغال health safety environment member في الشركة المصرية للأسلاك

ايه رأيه فى فكرة رابطة الخريجين و الصفحة ؟
والله انا شايف ان رابطة الخريجين كويسة جدا عشان بتخليك تقدر تربط بين الشباب الخريجين بالطلبة و ازاي نقدر نفيد الطلبة بأي حاجة اتعلمناها في حياتنا المهنية او اننا ازاي نتعامل مع العالم الخارجي

أبرز زكرياتك فى الأكاديمية؟
والله من ابرز ذكرياتي هي الشغل في المشاريع و صحابي الي ع طول كنا مع بعض و بنحمس بعض علي اننا ع طول نشارك في فعاليات وندوات دكتور مها.

اي النصيحة اللى تحب تقدمها للطلبة؟
انا ك نصيحة مني للطلبة مش لازم تربط نفسك ب حد شارك وعيش وجرب كل حاجه في الجامعة واعرف ان كل الدكاترة هما اخواتنا الكبار الي دايما عايزين مننا احسن شغل عشان نطلع بعد الجامعة .

اي التحديات اللي واجهتك بعد التخرج؟
التحديات الي واجهتني بعد التخرج هي ان مش دايما الظروف هتساعدك انك تشتغل الي بتحبه عشان كدة لازم تعافر وتتعب عشان تقدر توصل للي انت عايزه اشتغل ع نفسك وسيبها علي ربنا .

إزاي ساعدتك الأكاديمية في بناء شخصيتك المهنية؟
مجال دراستي ساعدني اني ازاي اقدر اتكلم مع الناس بالطريقة الي يقدر كل شخص يفهمني بيها من غير ما اتعب وبقدر اواكب في شغلي ما بين كل طريقة و التانية

لو رجعت بيك الأيام، إيه الحاجة اللي كنت هتعملها بشكل مختلف؟
لو رجعت بيا الايام هشارك في مسرح الجامعة لأني بحب التمثيل بصراحة .

هل شايف إن في مهارات معينة كانت محتاج تتعلمها أكتر في الأكاديمية؟
عمتا الحياه الدراسية غير الحياه العملية مختلفة تماما و لازم تنزل تدريبات كتير وتاخد كورسات في المونتاج و جرافيك ديزاين و حاجات كتير تقدر بيها تفتح لنفسك ابواب كتيرة في سوق العمل الحر حتي لو مش هتبقي ملزم او متعين في مكان .

و حابب اشكر كل الدكاترة الي درسولي و بالاخص دكتور غادة ودكتور مها ودكتور احمد طلعت ودكتور احمد عطية و حقيقي كونوا جزء كبير من شخصيتي الي بقدر اتعامل بيها وسط الناس او بمعني اصح حياتي المهنية

29/05/2026

حوار/ بيارا مجدي

*١-عرفنا بنفسك خريج دفعه كام وقسم ايه*
أنا أحمد عواد، خريج قسم صحافة دفعة 2015.

*٢-شغال ايه حالياً؟ وازاي بدأت طريقك بعد التخرج ولو واجهت صعوبات خلال رحلتك بعد التخرج هتكون ايه؟*
حاليا أنا صحفي في بي بي سي بمكتب القاهرة. وقبل كده اشتغلت في أكتر من مؤسسة صحفية وإعلامية. في مصر اشتغلت في المصري اليوم وجريدة المال، كذلك اشتغلت في قناة العربية في (اقتصاد)، واشتغلت في قناة الحرة في أميركا لمدة سنتين قبل ما ارجع القاهرة السنة اللي فاتت.

الحقيقة رحلة الشغل في الصحافة مكنتش سهلة بالتأكيد، خصوصا في ظل منافسة شديدة، وصعوبة في إيجاد الفرص المناسبة. لكن الحمد لله مع كل تجربة الواحد كان بيخوضها كان بيكتسب خبرات أكتر في مجالات مختلفة، من أول الصحافة المكتوبة والديجيتال والسوشيال ميديا وحتى التقديم التليفزيوني. لكن أهم عقبة الحقيقة كانت إن الواحد يلاقي فرصة يتعلم ويجرب حاجات جديدة، ودي مش متاحة في كل الأماكن للأسف. احنا عندنا مشكلة كبيرة في التدريب في المؤسسات الإعلامية، ومش كل المؤسسات بتدعم إنها تدرب الصحفيين اللي شغالين فيها، أو تستثمر فيهم عشان يكون عندها كوادر حقيقية. أنا في معظم شغلي كنت بنمي مهاراتي بمجهود ذاتي في الأساس، أو بمساعدات فردية من بعض زملائنا وأساتذتنا، لكن كنت مفتقد للجانب المؤسسي في الدور ده.

*٣-ايه اهم الحاجات اللي اتعلمتها من خلال دراستك في الأكاديمية*
الحقيقة الأكاديمية كانت بالنسبالي هي المدخل لأني اشتغل أكتر شغلانة أنا تمنيت أشتغلها وهي الصحافة. اتعلمت بالتأكيد من كتير من أساتذتنا اللي درسولي على مدار ٤ سنين واللي أدونا الأساس العلمي والمهني للعمل الصحفي. لكن أهم شيء اتعلمته هو أهمية الجانب العملي في أي دراسة، وإن أي شق نظري لا يوجد له تطبيق عملي من واقع سوق العمل، سيذهب في طي النسيان.

*٤-ايه اكتر تجربه او موقف أثر في بناء شخصيتك خلال سنين الأكاديمية؟*
في الحقيقة هما كانوا تجربتين والاتنين كانوا مع نفس الجروب تقريبا، واللي كنا مسمينه “التيم”، الأولى كانت واحنا في سنة تالتة لما عملنا وثائقي “نشاز”، وقد إيه كان الفيدباك عظيم من الدكاترة وزمايلنا، لإننا فعلنا تعبنا جدا في الوثائقي ده، واتعمل ما بين القاهرة وإسكندرية، وكان أول مشروع الواحد يفخر إنه كان جزء منه.
والتجربة التانية كانت مشروع التخرج “إنفوماج”، اللي كانت فكرة مختلفة تماما إننا نعمل مجلة بالكامل عبارة عن إنفوجرافيكس، وأكتر حاجة بتأثر فيا في المشروع ده، إن لحد دلوقتي مازالت المجلة دي بيأتي على ذكرها من دكاترتنا في الأكاديمية، وكل ما بقابل حد بيفكرني بيها ويشيد بالفكرة، أحس بفخر شديد، رغم إن لجنة تقييم المشروع كان رأيها مختلف شوية عن كده، واخدنا تقريبا أقل تقدير ضمن كل المشاريع، لكن كان كل همنا إننا نعمل حاجة مختلفة مش مجرد إننا بنعمل مشروع عشان ناخد درجات فقط، احنا كنا مؤمنين باللي بنعمله، وكان فيه خطة لاستمرار الفكرة لبعد التخرج بس للأسف لم يكتب لها النجاح.

*٥-مين اكتر دكتور اثر فيك خلال فتره الجامعه*
الحقيقة فيه أكتر من حد يعني أخص بالذكر د. نشوى يوسف، غير إني استفدت منها على المستوى العلمي في كل المواد اللي درستهالي، لكن كذلك على المستوى الشخصي أنا كنت دايما باستشيرها وباخد رأيها فيما يخص الدراسة أو الشغل، لما بدأت اشتغل واتدرب خلال فترة الدراسة.
د. مها مختار طبعا كانت من أجمل وأقرب الناس لينا، سواء خلال الدراسة أو بعدها. والحقيقة كل الأساتذة وقتها بداية من د. منى عمران ود. مي مصطفى وحتى كل المعيدات وقتها “د. أميرة - د. مي - د. سارة” الحقيقة كلهم كنا بنتعامل كعيلة كبيرة، محدش فيهم كان بيتأخر في مساعدة أو بيبخل علينا بحاجة.

طبعا مقدرش أنسى الجميل أيمن صلاح (رحمة الله عليه) اللي كان وقتها مشرف مشروع التخرج، وكان من أكتر الناس اللي الواحد اتشرف بمعرفته من الأكاديمية وأثر في كل واحد اتعامل معاه.

على المستوى المهني والعلمي الحقيقة، دايما بقول وبفكر نفسي بدكتور عثمان فكري، رغم إنه درسلنا أظن مادة واحد فقط، لكن طريقته في التدريس وتركيزه على إننا نتعلم فنون الكتابة الصحفية، وإزاي نكتب خبر أو تقرير أكتر من أي كلام نظري تاني، كانت من الحاجات اللي الواحد بيقدرها ويفتكرها كويس جدا.

*٦-كنت بتشارك في تنظيم فعاليات خلال فتره الجامعه؟ ولو اه اتعلمت ايه من التجربه دي*
فترتنا في الدراسة كانت الفعاليات قليلة شوية، أول على الأقل في قسم الصحافة، بس يمكن أفضل مرة كان يوم عرض الأفلام الوثائقية واحنا في سنة تالتة تبع مادة د. منى عمران رئيسة القسم وقتها. اليوم ده كان رائع وكان أشبه بمهرجان أفلام وثائقية الدفعة كلها عرضت أفلامها، وحتى كنا داعيين ناس أصدقائنا من بره الأكاديمية، وكان يوم احتفالي جميل ومشرف الحقيقة.

*٧-نصيحه تحب تقولها للطلاب الحاليين؟*
والله لو جاز ليا النصيحة للطلبة الحاليين، فأهم نصيحة أقولها خاصة لقسم الصحافة هي إنك تستثمر الـ ٤ سنين بتوع الدراسة فإنك تجرب كل حاجة في الشغل، وتستكشف نفسك وإيه أكتر حاجة ممكن تتميز فيها في سوق العمل اللي بقى صعب جدا. أوعى تستني لحد ما تخلص دراسة وبعد كده تشوف إيه اللي بيحصل بره في سوق العمل، هتكون ضيعت على نفسك فرصة كبيرة، تقدر فيها تستكشف فرص كتير وأنت شايل عن نفس الضغوط.

*٨-ايه رايك في فكره صفحه الخريجين؟*
الحقيقة فكرة جميلة جدا، فكرتنا بأيام حلوة وذكريات جميلة، وأعتقد إنها فرصة لربط أجيال الأكاديمية ببعضها.

29/05/2026

حوار / هاجر محمد - الاء ابراهيم

1- عرفينا بنفسك خريجة دفعة كام وقسم ايه ؟

أنا نورهان محمود ، خريجة قسم الصحافة دفعة ٢٠٢٠.

2- مكان عملك دلوقتي ، وإزاى قدرتى توصليله؟

حاليا بشتغل في شركة كونسنتريكس كخدمة عملاء في شركة فنادق كبيرة ، طبعا عشان أوصله اشتغلت على نفسي كتير في الانجليزي وال ICDL لأنهم الأساس في أي شغل طبعا ، الصعوبة بس كانت في بداية شغلي طبعا كنت زي أي حد لسه جديدة متلخبطة و مكانش عندي طاقة احتمال للمواقف الصعبة والضغوطات ، بس مع الوقت ابتديت أتعود.

3- اتعلمتى ايه من خلال دراستك فى الأكاديمية ؟

طبعا اتعلمت الأساسيات في الصحافة والإعلام ، زي كتابة المقال وباقي الألوان الصحفية ، وغير كده روح الفريق طبعا في كل مجموعة شاركت معاها في الشغل، والسرعة و إزاي أنظم وقتي صح عشان أقدر أنجز المطلوب مني وفي نفس الوقت أقدم شغل كويس.

٤- ايه اكتر الحاجات اللى أثرت فى بناء شخصيتك فى الأكاديمية ؟

السرعة والتعاون، وروح المنافسة الشريفة طبعا.

٥ -كنتى بتشاركى فى تنظيم فعاليات خلال فترة الجامعة ؟ اتعلمتى ايه من التجربة دى

شاركت بس تقريبا مرة واحدة ، اتعلمت إزاي أنسق مع زمايلي بشكل فعال عشان نقدر نقدم فعالية هادفة تنفع غيرنا.

٦-مين اكتر دكتور أثر فيكى خلال فترة الجامعة

دكتور مها مختار، ودكتور فاطمة بركة ، وطبعا دكتور نشوي اللواتي ودكتور غادة شكري و بشكل خاص دكتور محمد سيد عيد، عايزه بس أوضح الرجل الفاضل ده حببني أوي في مجال كتابة السيناريو رغم إن في ناس كتير كانت بتخاف منه وشخصية محترمة ودمها خفيف جدا، وكمان الشيخ أبو زياد ده بقي من الأقرب ليا كانوا في فترة الجامعة ، وطبعاً دكتور مى مصطفى عيشت معاها أجمل ذكريات أيام مادة إعلانات ، وكمان كنت بخاف منها في الأول بس مع الوقت اكتشفت قد ايه هي دمها خفيف وطيبة وعايزانا نكون ناجحين.

٧- احكيلنا بدايتك وإزاى اكتشفتى موهبتك فى تقليد الأصوات والدوبلاچ ؟

بدايتي في حب الوقوف قصاد المايك في الأساس ده كان بسبب حبي للغناء ، أنا جدي خال والدي الفنان الراحل ملك الموال محمد عبد المطلب، حبيت الغناء بسببه وكنت بشارك في كورال المدرسة بس بسبب حرص البيت عندي على التركيز في الدراسة مقدرتش أكمل، أما بالنسبة لتقليد الأصوات ده موهبة عندي من زمان كانت بدأت بحبي للراحلة ماري منيب، ومع الوقت مع المدرسة كان بالأفلام الكوميدي زي شخصية أطاطا وغيرها ، المفاجأة إني مع الوقت لقيت نفسي ساعات بجيب أصوات ممثلين كتير ، الدوبلاج بقي ده طبعا لعشقي للكارتون زي ناس بس بالنسبة لي خصوصا بسبب عشقي للأطفال ، لقيت إني بعرف أغير طبقة صوتي فيضحكوا وينتبهوا مثلا.

٨- هل فى موقف معين خلاكى تحبى المجال أكتر ؟

زي ما وضحت في السؤال اللي قبله عشقي للأطفال واللعب معاهم بالأصوات.

٩- إيه أصعب تحدي واجهتيه وأنتِ بتقلدى صوت شخصية مش معروفة وإزاى قدرتى تتغلبى عليه ؟

هي مكانتش صعبة بس جديدة إني أعمل شخصية ولد صغير ، اللي ساعدني أتغلب على التحدي ده هي ثقة مدربة الأصوات فيا وإن صوتي كمان حتى وأنا كبيرة قريب من الأطفال، ومؤخرا شخصية البنت الصعيدية في المسلسل الجديد اللي لسه نازل في رمضان النهاردة الصبح في إذاعة راديو مصر، بس أنا بالنسبة لي مفيش مستحيل أو صعوبة ، وكمان لما درست تمثيل صوتي اشتغلت على جوانب كتير خاصة بالدور، خصوصا التعبيرات المشهورة الخاصة بأهالينا في الصعيد، وبرضه أنا أشتركت مؤخرًا في مسابقة تبع أول أكاديمية أخدت فيها كورس الدوبلاج والتعليق الصوتي ، كان معايا سكريبت لمشهد من شركة المرعبين المحدودة ما بين مارد وشوشني وشلبي وكان مطلوب مني أعمل الشخصيتين، بالنسبة لي الأولانية كانت سهلة وقريبة مني بس التانية كانت صعبة شوية، بس ده مكنتش حقدر أتغلب عليه بدون توجيهات مدربة الأصوات الخاصة بيا.

١٠- إيه الحاجة اللى تحبى الناس تعرفها عن مهنتك بس قليل اللى يعرفها ؟

بالنسبة لخدمة العملاء، هي مهنة مش صعبة جسديا بس عايزة نفسية من فولاذ ، عشان تقدر تتحمل الضغوطات وتشتغل على نقط ضعفك وتتقبل أي تغيير ممكن يحصل سواء إيجابي أو سلبي ، أما بالنسبة للتمثيل الصوتي والدوبلاج لازم تسمع أفلام ومسلسلات كتير متنوعة عشان تقدر تجمع حصيلة عن شخصيات كتير وقصص تقدر تعبر عنها.

١١- نصيحة تحبى تقوليها للطلاب فى الأكاديمية ؟

متضيعش وقت ابدا من غير صحاب، اختار صحابك كويس ، سامح لو حد اتعامل معاك وحش، الحياة مش مستاهلة ، امسكوا في اللي بتحبوهم بجد، حاولوا تستمتعوا بفترة الجامعة كل ثانية عشان بجد حتوحشكم بعد التخرج ، واستفيدوا من الدكاترة بتوعكم عشان قدام حيسيبوا بصمات وذكريات جواكم.

29/05/2026

حوار / روان محمد

1- عرفنا بنفسك و خريج دفعة كام و قسم إيه؟

• أنا يوسف أحمد، دفعة 2023، قسم الصحافة

2- حابين نعرف مكان عملك دلوقتي و إزاي قدرت توصله؟ و هل واجهتك صعوبات خلال رحلتك بعد التخرج؟

• دلوقتي أنا بشتغل direct sales في شركة Procars للتأمين الشركة دي إحنا بنشتغل فيها مع شركات التأمين كلها زي AXA زي Allianz زي MetLife الشركات المعروفة كلها ، بشتغل في "GLOBAL ADVICE" بشتغل بالتأمين الفردي لو حد هيعمل تأمين لنفسه أو لأسرته أو هيعمل تأمين على عربيته كدة يعني.
ممكن الصعوبات اللي واجهتها هي إني اشتغلت كذا شغلانة قبل ما اشتغل في التأمين كنت شغال في Zara و قعدت فيها سنتين و نص،و قبلها برضو قعدت فترة صغيرة في اورانچ.

3- اتعلمت إيه من خلال دراستك في الأكاديمة؟

اتعلمت في الأكاديمة حاجات كتير زي مهارات التواصل،و التصوير و إعادة الصياغة و إزاي نكتب الأخبار.

4- أكتر الحاجات اللي أثرت فيك خلال فترة الجامعة؟

خلال الدراسة استفدت كتير جداً، زي صحافة الموبايل و دراستها و المواقع بتشتغل إزاي و الخبر بيطلع للناس إزاي بطريقة مختلفة، اختيار عناوين الصحفية، المحاضرات و المعلومات اللي استفدت منها و كل المشاريع اللي شاركنا فيها زي العملي.

5- مين أكتر دكتور أثر فيك خلال فترة الجامعة؟

فيه دكاترة كتير بصراحة زي دكتور مها و دكتور مي مصطفى و دكتور أحمد طلعت و مش هقدر انسى دكتور غادة طبعا.

6- إيه النصيحة اللي تحب تقولها للطلاب في الأكاديمة؟

لو هقولهم نصيحة فقولهم، اهتموا جداً بالحاجة اللي بتدرسوها متخدوهاش كتجربة أو أربع سنين و تبقوا عايزين تعدوا و خلاص لأ بالعكس، وكمان بعد كدة الحاجات دي هتفيدهم، ده غير ال CV لما بيتكتب فيه اسم المكان زي أكاديمية أخبار اليوم بيفرق جداً، و برضو على قد ما يقدروا يستفيدوا من الدراسة و ينموا نفسهم بالكورسات و يكون عندهم صبر و ميكسلوش و يكملوا مهما كانت الصعوبات.

27/05/2026

حوار / هاجر محمد
1- عرفنا بنفسك؟

طارق نور.. رئيس القسم الرياضي بالأخبار
ومدير تحرير موقع تتويج نيوز

2- قسم ايه وخريج دفعة كام؟

قسم صحافة دفعة ٢٠١٣/٢٠١٤

3- ايه أهم ذكرياتك في الأكاديمية؟

الصراحة بعد سنين كتير مرت علي التخرج استطيع دلوقتي اوكد ان ايام الاكاديمية كانت من احلي ايام حياتي بكل ذكرياتها

واهمها علي الاطلاق حياتى مع زملائي واصحابي بكل ما فيها من لمة وعزوة مليان هزار وضحك وحب ومذكرة ومشاريع وافكار ومناقشات كل حاجة بكل ما تحمله الكلمة من معني

وكمان في فترة تواجدنا في الكلية كانت ايام انفتاح فكرى وثقافي خاصة اننا حضرنا الثورتين وقت دراستنا فكانت فترة مليان بالثقافة والمناقشات بين الزملاء والدكاترة فاظن انها اثرت بشكل او باخر في تفكيرنا وحياتنا بعد ذلك

ولو اتكلمت علي الذكريات بشكل شخصي فاكيد مش ناسي ايام مشاريع الكلية كلها كانت ايام حلوة
وكمان انا كنت محظوظ كان عندى اصحاب كتير انبسط بصحبتهم طوال سنين الاكاديمية وعملنا مشاريع مميزة

وفاكر ايام الامتحانات والمراجعة الصبح مع اصحابي
وفاكر بعد الكلية او البريك واحنا بنتلم كلنا ونقعد سوا نهزر

4- كنت بتشارك في ندوات في الأكاديمية أو أنشطة واستفادت منها ايه؟

علي ايامنا كان في ندوات كل يوم احد علي ما اذكر كان بيبقي فيه نجم او شخصية بارزة بنعمل معاه ندوة نقاشية كنت بحضرها
وكنت بشارك طبعا في جريدة ٦ اكتوبر مع استاذة فاطمة بركة اللي شهدت اول العمل الصحفي اللي بجد في حياتي المهنية واتعلمت الشغل الميداني

5- ايه أكتر ذكريات أو مواقف فاكرها مع الدكاترة وأثرت فيك؟

انا فاكر ثلاث مواقف وحتي الان لم أنساهم

الأول مع دكتورة مها لانها كانت من اقرب الدكاترة للطلاب
ساعتها كنت في سنة اولي بمر "بدروب" وفترة سيئة في حياتي الدراسية وكان عندي شبه انعدام ثقة في نفسي
دكتورة مها اتكلمت معايا في مكتبها بكلام داعم ومنحتني الثقة في نفسي من جديد
واللي فرق معايا بجد وقتها وبعد مامرت السنوات اتكلمنا تانى انا وهي يوم مشروع التخرج وفكرتني بالكلام القديم وكتبتلي اهداء علي مجلتي بيؤكد كلامها ليا اللي كان مجمله "امن بنفسك وثق بنفسك"

والثاني كان مع دكتور نشوي اللي كانت من اقرب الدكاترة ليا برضو، كنت قلقان من الامتحان وروحت سئلتها اعمل ايه عشان ننجح
قلتلي متقلقش انت شاطر حل بس ومتخليش حاجة تقلقك وبالفعل دايما في امتحاناتها كنت بجيب امتياز

وفي جملة برضو مش قادر انساها لدكتور محمد مصطفي كان دايما يقولها لينا كطلاب قبل ايام الامتحانات
كان بيقول " سيبوا الشخص الغبي في البيت"
وكان يقصد ساعتها ان كلنا كويسين وفاهمين وشطار ولكن اللي بيحصل في الامتحان بنسيب نسختنا الاصلية في البيت وبنجيب نسختنا الغبية الامتحان اللي هي بتبقي متوترة ومركزة في الغش والقلق والخوف ومش مركزة في الاهم الا وهو الامتحان اللي لو ركزنا فيه عادي هنحل بكل سهولة

والصراحة انا حابب اشكره علي النصيحة دي مش عشان الامتحان فقط ولكنها نصيحة لسه بستخدمها في اي حاجة في حياتي والشكر موصول لكل الدكاترة اللي تتلمذت وتعلمت علي ايديهم

6- ايه هو الطريق اللى حضرتك مشيته من بعد التخرج لحد ما وصلت لمجال شغلك حالياً؟

انا دخلت الصحافة منذ البداية حبا فيها فمن اول سنة في الاكاديمية وانا بتدرب في الاخبار في القسم الرياضي وابتديت عملي الصحفي من ساعتها لحد دلوقتي الحمدلله
ومن بعد التخرج استمريت في عملي في الاخبار لعدة سنوات كانت صعبة جدا لانها كانت بدون عقد او تعيين وكانت فترة ضبابية ، المستقبل مش واضح ولكن استمر السعي حتي تم تعييني ومن ثم دخولي نقابة الصحفيين
وايضا العمل في عدة اماكن اخري خاصة بالرياضة والظهور الاعلامي كناقد رياضي علي شاشات التليفزيون

7- هل فى حاجة فى حياة حضرتك كانت سبب فى نجاحك ياريت تتذكر ازاى حصل دا ، ياريت تحكيهالنا

انا مش هحكي موقف ولكن هلخص ده في جملة بسيطة: "الحياة كل يوم هتديك مبرر للفشل قوي جدا ومحدش هيلومك لو فشلت ولكن النجاح انك تقول كل يوم لا انا هكمل وهنجح"

وعايز اقولكم ان النجاح ده شئ نسبي جدا.. في ناس النجاح الخاص بيها فلوس وفي ناس نجاحهم في المنصب وغيرهم في العلاقات وغيرهم في الراحة والسلام النفسي وغيره وغيره وغيره
فشوف نجاحك انت فين وامشي وراه وملكش دعوة برحلة حد تاني غيرك
اعمل اقصي ما لديك في اللي عارف انه هدفك وحلمك
واوعي حد يزعل لو فشل الحياة مش بتقف هتقوم وتقف وهتكمل تاني غصب عنك.

8- ايه رأيك في فكرة رابطة الخريجين والصفحة؟

فكرة حلوة لانها بتوصل الاجيال ببعضها وبتخلي الجديد يتعلم من تجارب من سبقوه
وبترجع لينا احنا كمان ذكرياتنا بالمكان اللي عيشنا فيه سنين حلوة في حياتنا وبتفكرنا ببعضنا تاني

9- نصيحتك للطلبة الحاليين؟

في الاول انا حابب اقولكم ان كل جيل جديد هو افضل من اللي قبله الدنيا كل شوية بتطور ودماغكم في سنكم ممكن تكون افضل واحسن منا لم كنا في سنكم.
فالفرصة قدامكم افضل
ودايما دايما حاول تفكروا وتغيروا.. رويتي ان احنا عايشين في فترة ليست الافضل علي المستوي الاعلامي والصحفي فابيدكم انتم تغيروا ده بعدين وتخلوه احسن

ثانيا في عالم الصحافة بيقولوا انسوا اللي درستوه واتعلمتوه في الكلية .. الحقيقة هي جملة حقيقية لان الحياة العملية مختلفة تمام
ولكن انا بقولكم اوعوا تنسوا اللي اتعلمتوه وحاولوا تتعلموا اكتر واكتر وثقفوا نفسكم
لان ده اللي بيفرق صحفي عن صحفي .. الصحفي المتعلم والمثقف والفاهم غير "الصحفي البصمجي"

واخيرا الصحافة في معناها الحقيقي شى عظيم .. فاللي حابب اقول للأجيال الجديدة التفكير في العمل الصحفي لوحده كعمل مش مقياس للاستمرار ولكن لازم يكون في شغف وحب لانه مش مجال سهل الا لو حبيته بجد

وموفقين ان شاء الله في خطواتكم القادمة وكل واحد منكم يوصل لحلمه.

27/05/2026

حوار / روان محمد

1- عرفينا بنفسك و خريجة دفعة كام و قسم إيه؟

• أنا رضوى سيد كمال خريجة دفعة 2023 قسم الصحافة

2- مكان عملك دلوقتي و إزاي قدرتي توصليله ؟ و هل واجهتك صعوبات خلال رحلتك بعد التخرج ؟

• حالياً أنا بعمل في عمل حر، بس بدور على عمل في مكان مناسب لشهادتي.

3- أكتر الحاجات اللي أثرت في بناء شخصيتك في الأكاديمة؟

• في الأكاديمة كنت انطوائية جداً بس هي أثرت فيا و إديتني فرصة كبيرة إني أعبر كتير عن رأيي، و مستمر معايا التأثير ده بفضل ربنا، و كمان الجامعة ساعدتني كتير إني أعرف أجمع بين تعليمي و بين إني أكون أم و ده بفضل الدكاترة بتوعي بعد ربنا.

4- كونك أم وقت الدراسة كان تحدي كبير ..قدرتي توفقي بين دراستك وحياتك الشخصية إزاي؟

• كان أكبر تحدي عدى عليا بس بفضل ربنا ثم مساعدة الدكاترة بتاعتي في الجامعة قدرت أعدي حاجات كتير.

5- يومك كان بيمشي إزاي بين المحاضرات ومسؤوليات البيت؟

• كنت بحضر محاضراتي كتير و أنا حامل و حتى في شهور حملي الآخيرة كنت بمتحن و بعد فترة كنت بحضر و معايا بنتي بتبقى مستنياني برا في عربيتي مع مامتي حتى كانت بتبقى معايا و أنا بعمل مشروع تخرجي و لفينا الدنيا سوا، و ماما ربنا يباركلي فيها كانت بتبقى مجهزالي كل إحتياجاتي قبلها عشان اقدر أرجع و اعمل كل اللي ورايا، الحمد لله ربنا رزقني ب أب و أم دايماً في ضهري و بيساعدوني و زوج متعاون جداً و متفهم كل الظروف دي و ده ساعدني كتير خلال فترة دراستي.

6- إيه أكتر موقف حسيتي فيه إن الموضوع كان تحدي حقيقي؟

• أكتر وقت حسيت فيه إن الموضوع كان تحدي لما كان كل اللي بيسمع إني حامل و بمتحن أو أول لما ولدت و كان مينفعش أتحرك و لا أنزل جامعتي، كان كله بيقولي أجلي سنة أو بيقولولي كدة مش هتعرفي تنجحي ، فخدتها تحدي و كملت عشان أفرح بابا و ماما و جوزي و بنتي اللي تعبوا معايا و الحمد لله قدرت أعمل ده و افرحهم كلهم.

7- مين أكتر دكتور أثر فيكي خلال فترة الجامعة؟

• فيه دكاترة كتير بصراحة زي دكتور نشوى و دكتور أميرة و دكتور مها و دكتور أحمد طلعت ربنا يجازيهم كل خير ساعدوني كتير جداً إني أحضر و إنه ميجليش حرمانات من المواد.

8- إيه النصيحة اللي تحبي تقوليها للطلاب في الأكاديمية ؟

• إنه بجد مفيش حاجة صعبة و إن اللي عايز يوصل لحاجة بيوصلها ، المهم يحط لنفسه هدف و يعمل الحاجة اللي عايز يعملها حتى لو صعبة المهم إنه يوصل.

15/05/2026

حوار / إيثار علاء

عرفنا بنفسك:
انا أمل علام قسم
صحافه خريجة دفعه ٢٠٢٤

مكان عملك حالياً:

فوتوغرافر تصوير اماكن وافراح وبراندات والتسويق ليها
وشغل جانبي هاند ميد

ايه رايك في صفحة رابطة الخريجين:

الصفحه فكره كويسه اوي للطلبة بحيث انهم يعرفو ويتشجعو لما يشوفوا خريجين من نفس كليتهم وصلوا لمناصب أو عملوا مشاريع ناجحة
وده بيديهم حافذ واقعي مش نظري
وفكره كويسه بردو من حيث ان الخريجين يقولو استفادو ازاي وقدرو يوصلو للمكانه الي هما فيها ازاي ،سواء كورسات او الاخطاء الي وقعو فيها
وكمان دي بتعزر صوره الاكاديمية لان الصوره الكويسة للخريجين وانها تبان فا دي حاجه تشيد بنجاح وتقدم الاكاديمية

مين الدكاتره اللى كانوا ليهم دور كريم فى رسم شخصيتك:

من اهم الدكاتره الي اثرو فيا كانو
دكتور غاده شكري من اهم واحسن الدكاتره الي كنت بحبهم وكانت مثال للشطاره والنجاح مش ليا بس كانت لينا كلنا ، دكتور مروه علي الذ دكتور بجد وكانت اخت لينا كلنا
دكتور احمد طلعت كان بيساعدنا وكنا بنلجأله كتير في المشاريع وعمره ما قفل بابه
ومن اهم الدكاتره الي اثرو فيا وكنت بحبهم جدا دكتور ندي فرايم ،كانت بتدعمنا ودايما موجودة للي محتاجها وجودها في الاكاديمية فرق معانا كلنا
كل الدكاتره ليهم دور مهم اوي ومصدر الهام وقوه لينا كلنا

تفاعلك فى الأكاديمية أفادك فى شغلك:

اكيد تفاعلي وشغلي في الاكاديمية ساعدني في حياتي العملية دلوقتي ، كنا دايما بنسمع في الاكاديمية ان العملي بيساعدك وبيأهلك لحياتك فيما بعد
المشاريع والشغل علمتني كتير وخلتني اشوف واوصل لتفكير اوسع ومهارات اكتر زي اني ابحث وادور ،التزم بمواعيدي ،اكون ضمن فريق واعرف اتعامل ،سواء تعامل مع الشارع الخارجي ،او اكتساب مهنه جديدة لاننا كنا بنعمل كل حاجه بنفسنا اي شغل كنا بنعمله بنفسنا
يمكن وانا في الجامعه مكنتش مدركه اوي اهمية كل ده بس بعد ما اتخرجت فهمت وعرفت ان كل حاجه اتعلمتها وعيشتها انعكست علي حياتي دلوقتي

ذكرياتك فى الأكاديمية:

ليا ذكريات كتير في الاكاديمية ،صحابي الي وحشوني ،فعاليات الاكاديمية والانشطة ،كل مكان فيها ليا ذكري حلوه والاكيد ان فيها ذكريات وحشه بس كانت بتعدي من اهمهم ذكرياتي مع صديقتي رند القاضي ربنا يرحمها ويغفر لها

نصيحتك للطلبه الحاليين:

نصيحتي للطلبه انهم يستغلو كل فرصه الاكاديمية تقدمهالهم ،وكل وقت في المرحله الي هما فيها استغلو فتره الاكاديمية مش بس علشان تنجحو علشان تكتسبو حاجات كتير وتبنو نفسكم
ومع وقت الاكاديمية حاولو تفكرو في المستقبل وشغلكم وتاخد خطوه من دلوقتي انك تكون في شغل ،تدخلو في كورسات وتكبر علاقاتك
والاهم صاحب ناس شاطره وعندها شغف لان الاكاديمية محتاجه حركة والي هيساعدك بعد نفسك هما الناس الي حواليك

15/05/2026

حوار: همسة عبد الغفار
مع شهاب أبو الحسن – خريج دفعة 2022
س: ممكن تعرفنا بنفسك وسنة التخرج؟
ج: أنا أسمي شهاب أبو الحسن محرر صحفي اتخرجت من الجامعة عام 2022.
س: إيه اللي خلاك تختار قسمك في الأكاديمية؟
ج: أنا قبل ما أدخل في الأكادمية كنت بحب الكتابة وبحب متابعة الاخبار جدا ودايما كنت بتابع المواقع والقنوات الأخبارية وبناء على حبي وده وشغفي اختارات ان أخش قسم الصحاقة واتعمق اكتر.
س: إزاي بدأت مسيرتك المهنية؟
ج: انا من وانا في اولى جامعة وانا بفضل الله ابتديت مسيرتي المهنية في عدد من المواقع الاخبارية في البداية كا تدريب واتعلمت كتير وبدأت اطور من نفسي واما دخلت الاكاديمية الدكاترة عملتني حاجات كتير واستفدت منهم كتير.
س: إيه أبرز ذكرى ليك في فترة الجامعة؟
ج: مستحيل انساه لمتنا في الجامعة في المدرج في الملعب عند الشيخ نشرب حاجة عند أحمد بناكل حاجة، كل الحاجات دى حاجات متتنسيش.
س: اشتغلت إيه بعد التخرج؟ وإزاي بدأت طريقك المهني؟
ج: بعد ما أتخرجت اشتغلت في جريدة الوطن ومنها روحت أماكن كتير منها المصري اليوم وصحف خليجية، بدأت طريقي كانت اي حاجة بتيجي قدامي بتشغلها ولازم انجح فيها. اشتغلت محرر صحفي سياسة واقتصاد ومنوعات وغيرهم، واشتغلت سوشيال في بعض الاماكن.
س: إيه أول خطوة خدتها بعد ما خلصت دراسة؟
ج: أول خطوة خدتها بعد ما خلصت دراسة أن أطبق اللى اتعلمته في الأكادمية، عاوزه بقى اطبق اللى اتعلمته على أرض الواقع، فسعيت ان ادور على أمكان اشتغل فيها.
س: إيه أكبر تحدي واجهك في بداية شغلك؟
ج: واجهت مشاكل كتير، أول حاجة الخريجيين بيقبلوها انهم اما يروحو يشتغلو في أماكن غالبا هيكون هو أصغر واحد في المكان واللى حواليك كبار ووحوش في المجال، فا التعديلات عليك كتير جدا والتجاهل كبير جدا.
بس حاولت ان اتعامل من ده أن استحمل اللى حوليا واحاول اتعلم منهم اللى ناقصني عشان اكون زيهم، ادوس على نفسي في الشغل عشان ابان وسطهم، وشغلك كدا كدا اللى هيبنك وعمرها ما كانت بالسن بشغلك فقط.
س: إيه دور الجامعة والدكاترة في تكوينك؟
ج: الجامعة ساعدتني كتير، في كل مادة كنت بدرسها كنت لازم استفاد منها بحاجة. مافيش مادة مش بتسفيد منها لو طبقت الاسايمنت بتاعها بجد مش عشان انت عاوز تخلص وخلاص، هتفرق كتير.
الجامعة ساعدتني ان اروح ادرب في اخبار اليوم وودتني المطبعة وشوفت مرحلة الانتاج ودى فرقت كتير.
الدكاترة دايما واقفة جمبك وبتعلمك، ولو احتاجت اي حاجة بتلاقيهم ويشغلوك كمان.
دكتور أحمد طلعت كان صاحب مش دكتور، دايما كان معاك في اي حاجة ويستحمل ويعلمك، ودكاترة كتير طبعا دكتور غادة شكرى وكتور مي مصطفي وغيرهم.
س: تنصح الطلبة يبدأوا تدريب أثناء الدراسة؟
ج: أنصح الطلبة أنهم يبدأو اثناء الدراسة. التدريب امر وااااجب لازم يتعمل ويتنفذ. الدنيا مقفلة خليك بتعافر وتكلم ده وده يكلم ده لغاية ما تررح بس اول مكان، وساعتها تقفش فيه ب ايدك وسنانك وتتعلم في كل حاجة.
وانصحهم انهم يهتموا ب المواد اللى بيدرسوها هتفيدهم جدا وبتعمل المجال بجد. لازم تبقي خريج عندك اساسيات الصحافة وفاهمها عشان متعطلش بعد ماتتخرج.
واخر نصيحة اهتموا بالحاجات اللى بيطلوبها منهم الدكاترة ونفذوها عشان انتو عاوزين تتعلموا مش عشان تنحجوا. مش هستفاد حاجة اما تنجح ومش عارف حاجة عن المجال هتلاقي نفسك في البيت.
س: إيه أكبر غلطة ممكن الطالب يقع فيها؟
ج: أكبر غلطة ممكن الطالب يقع فيها انه يكون اتخرج ومش عارف حاجة عن المجال وميكنش عنده مهاارات تخليه اما يتخرج اما يروح يقدم في مكان يقولهم انا بعرف اعمل كذا وكذا.
س: إيه نصيحتك لطلاب القسم دلوقتي؟
ج: طلاب القسم دلوقتي استغلوا كل يوم بيعدو عليكو وانتو في الجامعة، اتعلموا اتعلموا. دلوقتي الدنيا بقت سهلة في التعلم، افتح يعم يوتيوب وانت في البيت اتعلم مونتاج جرافيك، اقري اخبار شوف بتتكتب ازاى وهكذا.
س: إيه طموحك اللي شغال عليه دلوقتي؟
ج: طموحي اللى ماشي فيه حاليا ان ادخل نقابة الصحفيين وأكون عضو فيها وأن افتح موقع إلكتروني خاص بيا.

15/05/2026

توفت فجر اليوم إلى رحمة الله تعالى أستاذة

سناء عبدالله

اللَّهمَّ اغفِر لحيِّنا وميِّتِنا وصغيرِنا وكبيرِنا وذَكرِنا وأنثانا وشاهدِنا وغائبِنا».«اللهم إنّها في ذمتك وحبل جوارك، فقهِا فتنة القبر، وعذاب النار، وأنت أهل الوفاء والحمد».«اللهمّ ارحمها فإنّها كان مسلمه، واغفر لها فإنّها كان مؤمنة، وأدخلها الجنّة فإنّها كان بنبيّك مصدّقه، وسامحها فإنّها كانت لكتابك تاليه».«اللهمّ أبدلها داراً خيراً من دارها، وأهلاً خيراً من أهلها، وأدخلها الجنّة، وأعذها من عذاب القبر ومن عذاب النّار».«اللهمّ عاملها بما أنت أهله، ولا تعاملها بما هى أهله، واجزها عن الإحسان إحساناً وعن الإساءة عفواً وغفراناً».«اللهمّ افسح لها في قبرها مدّ بصرها، وافرش قبرها من فراش الجنّة، وآنس وحشتها، وارفع درجتها».

رابطة خريجين أكاديمية أخبار اليوم الصفحة الرسميه

31/05/2026

31/05/2026

29/05/2026

29/05/2026

29/05/2026

27/05/2026

27/05/2026

15/05/2026

15/05/2026

15/05/2026

Address

Website

Alerts

Shortcuts

Share

Category