17/01/2026
مەکتەبی سیاسی بزووتنەوەی پەیوەندی ئیسلامی کۆبوونەوەی ئاسایی خۆی ئەنجامدا
سلێمانی - شەممە ٢٠٢٦/١/١٧
بەسەرپەرشتی بەڕێز کامیل حاجی عەلی ڕابەری گشتی بزووتنەوەی پەیوەندی ئیسلامی کوردستان، مەکتەبی سیاسی کۆبوونەوەی ئاسایی خۆی ئەنجامدا.
لە کۆبوونەوەکەدا دوای تاوتوێکردنی چەند پرس و بابەتێک، هەڵوێستە لەسەر ئەم خاڵانەی خوارەوە کرا.
١- مەکتەبی سیاسی لەسەر ڕاپۆرت و چالاکی مەڵبەندەکان و لیژنەکان سوپاسیکردن و بەردەوامییان بە پێویست زانی.
٢- مەکتەبی سیاسی جەختی لەسەر پاراستی یەکڕیزی ناوخۆی حزب کردەوە بە پێویستی زانی ئەندامان پابەندی زیاتری بڕیار و ڕاسپاردەکان و پەیڕەوی ناوخۆی حزب بن.
٣- مەکتەبی سیاسی داوایکرد هەرچی زووە پەرلەمانی کوردستان کارابکرێت و کابینەی ١٠ی حکومەتی هەرێم پێکبهێنرێت.
٤- مەکتەبی سیاسی داوای لە پەرمانتارانی کورد لە ئەنجومەنی نوێنەرانی عێراق کرد زیاتر و زۆرتر کاربکەن بۆ دەستەبەرکردنی ماف و شایستە داراییەکانی هەرێمی کوردستان و مووچەی فەرمانبەران و مووچەخۆرانی هەرێم و چیتر بڕینی مووچە و دواکەوتنی بەم شێوەیەی ساڵانی پێشوو نەمێنێتەوە.
٥- مەکتەبی سیاسی پاراستنی ئارامی و ئاسایشی کوردستان و ناوچەکە لە سەرووی هەموو کارەکانەوە دەبینێت و ئاڵۆزی و ناتەبایی ئاشتی ناوچەکە دەشوێنێت، بۆیە پێویستە حکومەتی هەرێم ڕێگری لە هەر کار و هەڵوێستەیەک بکات کە ببێتە هۆی شێواندنی ئاشتی کۆمەڵایەتی و پچڕانی ڕایەڵەی پەیوەندی نێوان هاوڵاتیان و تاکەکانی کۆمەڵگە، بەتایبەتی ئەوەی بینیمان لە هەندێک لە مزگەوتەکانی کوردستان لە چەند ڕۆژی ڕابردوودا.
لە هەمان کاتدا داوا دەکەین لە مامۆستایانی ئایینی بەرێز هەندێک بابەت نەوروژێنن کە خزمەت بە بانگەوازی ئیسلام و دۆزی ڕەوای گەلەکەمان ناکات.
٦- مەکتەبی سیاسی لەبارەی ئەو فەوزا و بێسەروبەرییەی میدیای کوردی و بڵاوکردنەوەی هەواڵ و هەموو جۆرە بابەتێک بێ لێکۆڵینەوەی ورد، کە دەبێتە مایەی پشێوی و هاوڵاتیان دەخاتە دڵەڕاوکێوە، داوا دەکات بابەتەکە ڕێکبخرێتەوە و زیاتر بەرپرسیارانە کاری میدیایی ئەنجام بدرێت.
٧- لەبارەی پێشهات و ڕووداوەکانی ڕۆژئاوای کوردستان، مەکتەبی سیاسی جەختی لەسەر مافە ڕەواکانی گەلی کورد کردەوە چ لە ڕۆژئاوا یان لە هەر شوێنێکی تر بێت، دژایەتی خۆشی بۆ هەر جۆرە توندوتیژییەک دەربڕی، کە ڕێگایەک بێت بۆ یەکلایکردنەوەی کێشە و گرفتەکان، پێویستە لە سوریای نوێدا مافەکانی کورد دەستەبەر بکرێت و پێویستە هەردوولای حکومەتی ڕاگوزەری سوریا و هەسەدە بە گفتوگۆ و لە چوارچێوەی ڕێککەوتنەکانی نێوانیاندا کێشەکان چارەسەر بکەن.
٨- هەر لەم نێوەندەدا، مەکتەبی سیاسی جەختی لەوە کردەوە و داوادەکات کە ناکرێ خەڵکانێکی قین لە دڵ و دژە دین ئەم ڕووداو و پێشهاتانە بقۆزنەوە بۆ هێرشکردنە سەر موسڵمانان و قسە وتن بە ئیسلام و پیرۆزییەکانی مسوڵمانان.
مەکتەبی سیاسی
بزووتنەوەی پەیوەندی ئیسلامی کوردستان
٢٠٢٦/١/١٧
