15/09/2026
Lənkəranda iki müasir məktəb binası istifadəyə verilib
15 sentyabr “Bilik Günü”ndə Lənkəran rayonu Viyən kənd tam orta və Lənkəran şəhəri Rövşən Bədəlov adına 9 nömrəli tam orta ümumtəhsil məktəblərinin açılış mərasimi keçirilib. Tədbirdə Lənkəran Şəhər İcra Hakimiyyətinin (ŞİH) başçısı Taleh Qaraşov,elm və təhsil nazirinin müşaviri Rüstəm Ağayev, Lənkəran-Astara Regional Təhsil İdarəsinin müdir müavini Rəhim Rəhimov, Lənkəran rayonu üzrə təhsil sektorunun müdiri Ağamməd Şənmədov və şəhid ailələrinin üzvləri iştirak ediblər.
Şəhidlərin xatirəsinin bir dəqiqəlik sükutla yad olunması və Dövlət Himninin səslənməsi ilə başlayan açılış mərasimlərində giriş nitqi ilə çıxış edən Lənkəran Şəhər İcra Hakimiyyətinin (ŞİH) başçısı Taleh Qaraşov bildirib ki, təhsil hər bir dövlətin gələcəyini müəyyən edən strateji sahədir, ölkənin davamlı inkişafı, cəmiyyətin tərəqqisi və gələcək potensialı məhz savadlı, yüksək intellektli, peşəkar və vətənpərvər nəslin yetişdirilməsindən asılıdır. Onun sözlərinə görə, məktəb yalnız bilik verilən məkan deyil, həm də şəxsiyyətin formalaşdığı, milli-mənəvi dəyərlərin aşılandığı və vətəndaşlıq mövqeyinin formalaşdığı mühüm tərbiyə ocağıdır. İcra başçısı Ümummilli Lider Heydər Əliyevin bütün fəaliyyəti boyu elmə, təhsilə və müəllim əməyinə böyük diqqət və qayğı göstərdiyini, Ulu Öndərin dövlətçilik fəlsəfəsində təhsilin insan kapitalının formalaşdırılmasının əsas vasitəsi hesab olunduğunu bildirib.
Taleh Qaraşov Ümummilli Liderin uğurlu təhsil siyasətinin cənab Prezident İlham Əliyevtərəfindən qətiyyətlə, uğurla və ardıcıl şəkildə davam etdirildiyini, Birinci vitse-prezident, Heydər Əliyev Fondunun prezidenti Mehriban xanım Əliyevanın təşəbbüsü və dəstəyi ilə ölkənin bütün ərazilərində, o cümlədən Lənkəran rayonunda da ümumtəhsil müəssisələrinin təmirinin və yenidən inşasının həyata keçirildiyini ifadə edib.
Elm və təhsil nazirinin müşaviri Rüstəm Ağayev son illərdə ölkəmizdə təhsil infrastrukturunun yenilənməsi, müasir məktəblərin tikilməsi və əsaslı təmiri istiqamətində genişmiqyaslı işlər həyata keçirildiyini vurğulayıb. Onun sözlərinə görə, dövlət siyasətinin əsas məqsədi hər bir şagird üçün keyfiyyətli və müasir təhsil imkanları yaratmaqdır. Maddi-texniki bazanın gücləndirilməsi ilə yanaşı, təhsilin məzmununun müasirləşdirilməsi, rəqəmsal texnologiyaların tətbiqi və müəllimlərin peşəkarlığının artırılması da diqqət mərkəzindədir.
Lənkəran-Astara Regional Təhsil İdarəsinin müdir müavini Rəhim Rəhimov dövlətin təhsilə göstərdiyi diqqət və qayğının Lənkəran rayonunda da özünü aydın şəkildə büruzə verdiyini, rayonda bir sıra məktəblərdə tikinti, yenidənqurma və əsaslı təmir işlərinin davam etdirildiyini vurğulayıb.
Müdir müavini təhsilə qoyulan hər bir sərmayənin ölkəmizin gələcəyinə qoyulan investisiya olduğunu, bu gün sinif otaqlarında yetişdirilən şagirdlərin sabah ölkəmizin idarə olunmasında, elmində, iqtisadiyyatında və ictimai həyatında həlledici rol oynayacaqlarını bildirib.
Qeyd edək ki, Lənkəran rayonu Viyən kənd tam orta məktəbi 240 şagird yerlikdir, müəllimlərin sayı 47 nəfərdir, 2026-cı ildə birinci sinfə gedən şagirdlərin sayı 21 nəfərdir. Məktəb ən müasir səviyyədə təmir olunub, müəllim və şagirdlər üçün bütün lazımi şərait yaradılıb, yeni məktəb müasir sinif otaqları, laboratoriyalar, idman və akt zalları, eləcə də fasiləsiz istilik sistemi ilə təchiz olunub.
Repetitor asılılığını azaltmaq məqsədilə tətbiq olunan yeni təhsil modeli əsasında formalaşdırılan 540 şagird yerlik Lənkəran şəhəri Rövşən Bədəlov adına 9 nömrəli tam orta ümumtəhsil məktəbi artıq regionun ən uğurlu təhsil ocaqlarından birinə çevrilib. 2026-cı ildə məzun olan 131 şagirddən 124-ü qəbul imtahanlarında yüksək bal toplayaraq müxtəlif ali təhsil məktəblərinə, digər şagirdlər isə orta ixtisas və peşə təhsili məktəblərinə qəbul olunublar.
