03/06/2026
“Memarlıq və Şəhərsalma İli” çərçivəsində Qaradağ rayon Heydər Əliyev Mərkəzində 3 iyun 2026-cı il tarixində Tikinti Quraşdırma İşləri üzrə Bakı Dövlət Peşə Təhsil Mərkəzinin tələbələri üçün mərkəzin kiçik elmi işçisi Nuranə Davrinbəyova tərəfindən “Ulu Öndər Heydər Əliyev və Azərbaycan memarlığının intibahı” adlı açıq dərs keçirilib.
Açıq dərsin məqsədi iştirakçılara Heydər Əliyevin Azərbaycan memarlığının, şəhərsalmanın və mədəni irsin qorunmasındakı xidmətlərini çatdırmaq, onlarda milli memarlıq nümunələrinə maraq və vətənpərvərlik hissini gücləndirmək olub.
Dərsdə bildirilib ki, Heydər Əliyevin rəhbərliyi dövründə ölkəmizdə tarixi-memarlıq abidələrinin qorunmasına xüsusi diqqət yetirilib, İçərişəhər, Qız Qalası və Şirvanşahlar Sarayı Kompleksi kimi abidələrin bərpası istiqamətində mühüm addımlar atılıb. 1970–1980-ci illərdə Bakıda və respublikanın digər bölgələrində çoxsaylı mədəniyyət sarayları, parklar, muzeylər və yaşayış kompleksləri inşa olunub, şəhərlərin memarlıq siması müasirləşdirilib. Həmçinin qeyd olunub ki, Ulu Öndərin müəyyən etdiyi inkişaf strategiyası bu gün Prezident İlham Əliyev tərəfindən uğurla davam etdirilir, işğaldan azad olunmuş ərazilərdə, xüsusilə Şuşa, Ağdam və Füzuli şəhərlərində genişmiqyaslı bərpa-quruculuq işləri aparılır.
Açıq dərs zamanı mövzuya uyğun olaraq hazırlanmış PowerPoint təqdimatı vasitəsilə Azərbaycan memarlığının incilərini əks etdirən slaydlar nümayiş olunub. Slaydlarda tarixi abidələr, müasir memarlıq nümunələri və Heydər Əliyev Mərkəzi haqqında ətraflı məlumat təqdim edilib.
Daha sonra iştirakçılara mövzu ilə bağlı test sualları təqdim olunub. Tələbələr sualları cavablandıraraq mövzu üzrə biliklərini nümayiş etdiriblər. Tədbirin sonunda Mərkəz əməkdaşları tərəfindən hazırlanmış “Heydər Əliyev və Azərbaycan memarlığı” adlı videoçarxa baxış keçirilib.
