Bərdə RİHB-nın Şatırlı İƏD üzrə nümayəndəliyi

17/09/2026

16/09/2026

15/09/2026

Erməni revanşist qüvvələrin diplomatik korpusun Qarabağ və Şərqi Zəngəzura səfərinə reaksiyası

Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura səfərinə Ermənistan cəmiyyətində və siyasi dairələrdə göstərilən mənfi münasibət qəbuledilməzdir. Xarici diplomatların Azərbaycanın suveren ərazisində həyata keçirdikləri səfərə qarşı etirazlar ölkəmizin suverenliyinə və ərazi bütövlüyünə hörmətsizlik olmaqla yanaşı, Azərbaycanın daxili işlərinə müdaxilə cəhdidir.
Qarabağ Azərbaycanın ayrılmaz tərkib hissəsidir və bu ərazi üzərində ölkəmizin suverenliyi beynəlxalq hüquq çərçivəsində tanınır. Diplomatik korpus nümayəndələrinin Qarabağ və Şərqi Zəngəzura səfəri onların təmsil etdikləri dövlətlərin Azərbaycanın ərazi bütövlüyünə verdiyi dəstəyi bir daha təsdiqləyir. Bu səfərə qarşı Ermənistan cəmiyyətində aparılan kampaniya isə regionda formalaşan yeni reallıqlara və Azərbaycanın legitim hüquqlarına dözümsüz münasibətin göstəricisidir.
Ermənistan tərəfinin Gəncəsər və Xudavəng kimi tarixi abidələri yalnız erməni irsi kimi təqdim etməsi, eyni zamanda indiki Ermənistan ərazisində Azərbaycan xalqına məxsus tarixi-mədəni irsin mövcudluğunu inkar etməsi tarixi həqiqətlərin təhrif olunmasıdır. Qafqaz Albaniyasının Azərbaycan ərazisində mövcudluğu və bu sivilizasiyanın zəngin mədəni irsi tarix elminə məlum olan faktlardandır. Sözügedən irsin məqsədli şəkildə inkar edilməsi və mənimsənilməsi tarixi hadisələrə birtərəfli, ayrı-seçkilikçi və dözümsüz yanaşmanı əks etdirir.
Ermənistanda revanşist qüvvələrin fəaliyyəti və onların yaydığı açıqlamalar regionda sülhün bərqərar olmasına mane olan əsas amillərdəndir. Diplomatik səfərlə bağlı sosial şəbəkələrdə və müxtəlif informasiya resurslarında yayılan materialların bir qismi siyasi dairələrə yaxın platformalarda dərc olunmuşdur. Bu isə kampaniyanın təsadüfi deyil, məqsədyönlü xarakter daşıması barədə əsaslı suallar yaradır. Ermənistan parlamentinin sədri Ruben Rubinyanın səfərlə bağlı açıqlaması da qəbuledilməzdir və Azərbaycanın daxili işlərinə müdaxilə kimi qiymətləndirilə bilər.
14 sentyabr tarixində Ermənistan parlamentində 2022-ci ilin 12–13 sentyabr tarixlərində baş vermiş sərhəd toqquşmalarında həlak olan hərbçilərin xatirəsinin bir dəqiqəlik sükutla yad edilməsi revanşist əhval-ruhiyyənin gücləndirilməsinə xidmət edən addım kimi dəyərləndirilir. Həmin hadisələrin Ermənistan tərəfindən törədilən hərbi təxribatlarla əlaqəli olduğu və Azərbaycanın öz ərazisini müdafiə etmək məcburiyyətində qaldığı nəzərə alınmalıdır.
Ermənistanın son açıqlamaları və siyasi ritorikası rəsmi İrəvanın sülh prosesində səmimi və ardıcıl mövqe nümayiş etdirmədiyini göstərir. Müharibədəki məğlubiyyətdən sonra sülh danışıqlarına yönələn Ermənistanın eyni zamanda revanşist qüvvələrin fəaliyyətinə şərait yaratması regionda etimad mühitinə və uzunmüddətli sabitliyə mənfi təsir göstərir.
Bununla yanaşı, Ermənistan ərazisində Azərbaycan xalqının əsrlər boyu formalaşdırdığı tarixi-mədəni irsin – məscidlərin, qəbiristanlıqların, yaşayış məskənlərinin və digər abidələrin dağıdılması, eləcə də bu irsin izlərinin silinməsi ciddi narahatlıq doğurur. Tarixi abidələrin qəsdən məhv edilməsi və mədəni irsin saxtalaşdırılması beynəlxalq hüququn, o cümlədən 1954-cü il Haaqa Konvensiyasının mədəni sərvətlərin qorunmasına dair müddəalarının ruhuna və tələblərinə ziddir.
Azərbaycan ərazisində yerləşən bütün tarixi və mədəni abidələr dövlət tərəfindən qorunur və onların mühafizəsi ilə bağlı məsuliyyət Azərbaycan dövlətinin üzərinə düşür. Ermənistan tərəfi isə tarixi həqiqətləri təhrif etmək və mədəni irsi siyasiləşdirmək əvəzinə, beynəlxalq hüququn prinsiplərinə hörmət etməli, revanşist ritorikadan uzaq durmalı və regionda davamlı sülhün təmin olunmasına töhfə verməlidir.

15/09/2026

Bərdə Rayon İcra Hakimiyyətinin başçısı Vidadi İsayevin 15 Sentyabr — Bilik Günü münasibətilə təbriki

Hörmətli müəllimlər, əziz şagirdlər və tələbələr, dəyərli valideynlər!

Sizi 15 Sentyabr — Bilik Günü və yeni tədris ilinin başlanması münasibətilə səmimi qəlbdən təbrik edir, hər birinizə yeni dərs ilində uğurlar, yüksək nəticələr və xoş nailiyyətlər arzulayıram.

Yeni tədris ilinin başlanması yalnız məktəb həyatının yenidən canlanması deyil, həm də yeni məqsədlərin müəyyənləşdirilməsi, bilik və bacarıqların artırılması üçün yeni imkanların yaranması deməkdir. Bu yolda şagirdlərin uğurlarında müəllimlərin zəhməti və valideynlərin dəstəyi mühüm əhəmiyyət daşıyır.

Bərdə rayonunun təhsil sahəsində son illər ərzində əldə etdiyi nəticələr böyük zəhmətin və məqsədyönlü fəaliyyətin göstəricisidir. Rayon məktəblərini bitirən məzunlarımızın ali təhsil müəssisələrinə yüksək nəticələrlə qəbul olunması, müxtəlif bilik yarışlarında, fənn olimpiadalarında və müsabiqələrdə uğurlar qazanması bizi sevindirir. Xüsusilə yüksək bal toplayaraq tələbə adını qazanan gənclərimizin nailiyyətləri onların qarşılarına qoyduqları məqsədlərə inamla addımladıqlarını göstərir.

Ölkəmizdə təhsilin inkişafı və gənc nəslin müasir biliklərə yiyələnməsi dövlət siyasətinin mühüm istiqamətlərindən biridir. Ulu Öndər Heydər Əliyevin müəyyən etdiyi təhsil strategiyası bu gün Azərbaycan Respublikasının Prezidenti cənab İlham Əliyevin rəhbərliyi ilə yeni mərhələdə uğurla davam etdirilir. Məktəblərin yenilənməsi, müasir təhsil infrastrukturunun yaradılması, tədris imkanlarının genişləndirilməsi və rəqəmsal texnologiyaların təhsil prosesinə tətbiqi bu siyasətin mühüm tərkib hissəsidir.

Təhsilin inkişafına göstərilən diqqət və qayğıda Birinci vitse-prezident, Heydər Əliyev fondunun prezidenti çox hörmətli Mehriban xanım Əliyevanın rəhbərliyi ilə Heydər Əliyev Fondunun həyata keçirdiyi layihələrin də xüsusi yeri vardır. Ölkənin müxtəlif bölgələrində müasir məktəblərin tikilməsi və təhsil şəraitinin yaxşılaşdırılması istiqamətində görülən işlər gələcəyimiz olan uşaqlara və gənclərə göstərilən böyük diqqətin nümunəsidir.

Hörmətli müəllimlər, əziz şagirdlər və tələbələr!
Yeni tədris ilində hər birinizə möhkəm cansağlığı, böyük əzm, uğurlu nəticələr və yeni nailiyyətlər arzulayıram.

15 Sentyabr — Bilik Gününüz və yeni tədris iliniz mübarək olsun!

Bərdə Rayon İcra
Hakimiyyətinin başçısı
Vidadi İsayev