09/06/2015
Uşaqlar dünyada hamı üçün əzizdir. Dünyanın hər yerində uşaqlara qayğı və uşaqların qorunması xüsusi əhəmiyyət kəsb edir. Təsadüfi deyil ki, Uşaqların Beynəlxalq müdafiəsi günü bütün dünyada keçirilir və hər bir ölkə, hər bir dövlət uşaqları qorumağı, uşaqları müdafiə etməyi özünün əsas vəzifəsi hesab edir.
1 iyun - Uşaqların Beynəlxalq Müdafiəsi günüdür. Dünyanın əksər ölkələrində olduğu kimi, bu gün Azərbaycanda da qeyd edilir.Nəzərə alsaq ki, uşaqlar bizim gələcəyimizdir və ölkəmizin gələcəyi onların əlindədir, onların müdafiəsinə hamılıqla qoşulmaq bizim borcumuzdur. Bu istiqamətdə hər il ənənəvi olaraq Bakı Şəhər Mədəniyyət və Turizm İdarəsi tərəfindən müxtəlif layihələr həyata keçirilir. Bu il də 1 iyun tarixində İdarənin təşkilatçılığı ilə Uşaqların Beynəlxalq Müdafiəsi günü ilə əlaqədar Bakının Suraxanı rayonunda Heydər Əliyev parkında “Hər birimiz bir çiçək” adlı konsert proqramı təşkil edildi.
Əmircan qəsəbə Mədəniyyət evinin direktoru Afaq Bayramova konserti açıq elan edərək uşaqları bayram münasibətilə təbrik etdi. Daha sonra S.Bəhlulzadə adına Mədəniyyət Sarayının “Buta”, “İgidlər” rəqs qrupları,M.Ə.Sabir adına Bülbülə qəsəbə Mədəniyyət evinin "Günəş" rəqs qrupu və "Cəsurlar" rəqs kollektivi,Q.Abbasov adına Mədəniyyət Sarayının "Fidan" rəqs qrupu və “Buratino” rəqsi, 37 nömrəli Uşaq Musiqi Məktəbi İ.İsmayılov sazda ifa, Zığ qəsəbə Mədəniyyət evi T. Babayeva “Azərbaycan” mahnısı, Hövsan qəsəbə Mədəniyyət Sarayı “Əfsanə” rəqs qrupu, Əmircan qəsəbə Mədəniyyət evi dram dərnəyinin uşaqları, M.A.Əliyev adına Mədəniyyət evi F.Vəliyev “Sənsiz” mahnısı, Əmircan qəsəbə Mədəniyyət evinin gənc repçiləri, 3 nömrəli uşaq incəsənət məktəbinin skripkaçılardan ibarət qrupu, “8 mart” adına Mədəniyyət evinin “Azad” rəqs kollektivi və mədəniyyət müəssisələrində fəaliyyət göstərən ansamblların gənc solistlərinin çıxışı uşaqlar tərəfindən maraqla qarşılandı. Şən musiqi sədaları altında davam edən tədbirdə uşaqlar cizgi film qəhrəmanlarının göstərdikləri nömrələri maraqla izlədilər.
Sonda konsertə dəvət olunmuş tanınmış müğənnilərdən - Sevda Yəhyayeva, Nazim, Sevil və Sevinc bacıları, Zamiq, Emil Bədəlov çıxış etdi.
