26/02/2025
Fevralın 26-da Ağcabədi rayonu üzrə təhsil sektorunun kollektivi və müəssisə rəhbərləri tərəfindən Xocalı soyqırımının 33-cü ildönümü ilə əlaqədar Xocalı şəhidlərinin xatirəsinə ucaldılmış abidənin önünə güllər düzülüb və faciə qurbanları dərin ehtiramla yad olunub.
Daha sonra Ağcabədi şəhər M.F.Axundov adına 3 nömrəli məktəb-liseydə Xocalı soyqırımının 33-cü ildönümünə həsr olunmuş anım tədbiri keçirilib.
Tədbirdə Ağcabədi rayonu üzrə təhsil sektorunun müdiri Teymur Qasımov, Qarabağ Regional Təhsil İdarəsinin Təsərrüfathesablı Əsaslı Tikinti və Təchizat İdarəsinin Regionlarla İşin Təşkili şöbəsinin rəisi Gündüz Məmmədov, təhsil sektorunun əməkdaşları, məktəb direktorları, Əməkdar müəllim Camal Abbasov, məktəbin müəllim və şagird kollektivi iştirak ediblər.
Qonaqlar faciəni özündə əks etdirən rəsm və foto sərgisinə baxdıqdan sonra akt zalında keçirilən tədbirdə iştirak ediblər. Tədbir çərçivəsində şagirdlərin hazırladıqları ədəbi-bədii kompozisiyalar təqdim olunub, Xocalı soyqırımı ilə bağlı videoçarxlar nümayiş etdirilib.