12/02/2026
Pyetje pa përgjigje.
Disa pyetje që secili prej nesh i ben ne heshtje, por që mbeten pa përgjigje logjike prej vitesh ..
-Paradoksi i "Vendit të pasur me
njerëz të varfër"
Pyetja.. Si është e mundur që një vend me dy dete, me pasuritë më të mëdha nëntokësore në Ballkan (naftë, krom, bakër), me burime ujore të pafundme dhe me 300 ditë diell, nuk arrin të sigurojë mirëqenie e cilësi jete, por detyron jo vetem rininë të emigrojë?..
- Misteri i Pronës (Ligji 7501)
Pyetja.. Kush është pronari i vërtetë i tokës në Shqipëri?
Pas 35 viteve tranzicion, askush nuk mund t'i japë një përgjigje përfundimtare kësaj. Ka qytetarë që kanë certifikatën e pronësisë, qytetarë që kanë tapinë e vjetër të mbretërisë, dhe qytetarë që e kanë marrë me ligjin 7501. Ky lëmsh juridik a nuk është "vrasësi" i vërtetë i bujqësisë.?
- "Shqiptarë dembelë apo te suksesshëm "
Pyetja.. Pse shqiptarët janë kaq punëtorë ,të suksesshëm dhe të disiplinuar kur shkojnë në Gjermani, Greqi, Itali, Angli apo gjetkë , por nuk arrijnë të ndërtojnë të njëjtin sistem funksional brenda shtëpisë së tyre?
Pse sapo kalojmë kufirin, "softueri" ynë ndryshon, ndërsa brenda vendit jemi në konflikt të vazhdueshëm me rregullin.?
- Kostot e Çmendura
Pyetja… Si shpjegohet që çmimet e ushqimeve, karburanteve, të shërbimit mjekësor, apo dhe të apartamenteve në Tiranë e kudo janë të barabarta me Berlinin apo Romën, ndërkohë që rroga mesatare është 4-5 herë më e ulët?
Matematikisht kjo nuk del, ekonomikisht është një mister që asnjë shqiptar nuk di ta shpjegojë me shifra, por vetëm me supozime për qarkullim të "parasë së pistë ".
-"Pse-ja" e fshatit të braktisur…
Pyetja… Pse po hamë produkte importi pa shije dhe të dyshimta nga vende të largëta, kur toka jonë është pothuaj djerrë dhe e gatshme për të prodhuar ushqimin më cilësor në Evropë?
Kjo është pyetja që godet direkt "degjenerimin" total të bujqësisë, por që asnjë qeveri nuk i ka dhënë përgjigje ligjore
Dhe si për humor..
Pyetja e vetme që një shqiptar nuk i kthen dot përgjigje, është kur e pyet kamarieri.. " Kush do ta paguajë faturën ?" Ne ate moment fillon revolta kush ta rrëmbejë faturën i pari..
Rifat Kullolli
